THU PHLAAN 12 - Cho Bible Common Language 2016

Hnuminu La Shawk

¹ Cun kawn ah khankho mik ung küikyang ciah ng’cängbang nak dang law sei ka hmuk ci. Acun ung om ciah hnuminu cu hni liing sui ne, chaa ung ng’leh ne, aisi ghalei-goi kawp ciah lukhu ng’büng ci.

² Ani cu hta law ge khai kya ne, a nau poi m’neh ne m’lau ci.

³ Cun kawn ah khankho mik ung a hei ng’cängbang nak dang law ba mä ci, cun cu shawk asennu tumat ah kyak ci. Ani cu alu chih, aki ghaa law sei, alu päng ung lukhu ng’büng ci.

⁴ Ani naw khankho mik ah aisi gui bumthum bum ät cu ang mei awn hang kui ne m’dek ah yuk chah gui ci. Cun ah shawk sennu cu hnuminu ah maa ah ng’düi ne, a hta law nak ge vai ah ak hmaw cu, ei khai ah ngäng ci.

⁵ Cun kawn ah cun ah hnuminu naw, chang ah hta avan m’si hteipawng awn uk khai ah, htapa cu hta nak ci. Cun ah htapa cu anu ah k’coi ung kaa Khanpughi ah om nak amangkiaang ung yu chaang ci gui.

⁶ Hnuminu cu bunghmu ah Khanpughi naw a pyan nak peitah hteit ci. A cu ah hnüüp 1, 260 ung ani cu ami m’hteihtang ah kyak ci.

⁷ Cun kawn ah khanmawpi ah ng’tuk bi nak om ci. Michaela la ak khanchang gui naw, shawk cu ng’tuk püi ci gui. Shawk la ak khanchang gui naw phi ng’tuk tu ba püi ci gui.

⁸ Cun ung phi shawk la ak khanchang gui cu m’khüt gui u sei, khankho ah kä om tuba ci gui.

⁹ Khomdek chang gui m’yaw gui ciah khoshe, kä cun ung Satan ming nak ciah shawknu cu ak khanchang gui awn a täng ah khomdek khan ah ami yuk täm law gui ah kyak ci.

¹⁰ Cun kawn ah khanmawpi ah ng’shan ciah k’aw naw, “Tuhbäi Khanpughi ah hun nak cu gawk law pyi ci nei! Tuhbäi Khanpughi naw Ghangpughang ah a kyak ah mawng dang sak pyi ci nei! Tuhbäi a Messiah naw a huham dang sak pyi ci nei! Mi Khanpughi ah maa ah ng’düi netah, amü ak hnüüp mi phäi nau gui shetkat sak gui ci cu khankho ah kaa k’täm pyi ci gui nei.

¹¹ Mi phäi nau gui naw Htomehta ah si awn la ami ng’shäu ah ng’düng nak awn Satan cu m’khüt pyi ci gui nei. Ngami cu ami hnun gui apit ung phi kä ng’hlat khai gui nei.

¹² Cun ah kyasei khanmawpi la khankho chang gui yeikyai vä. Khomdek la tuinu ah phäh ah thüisei vai ah kyak ci nei. A i ah kiasei ci ung khoshebawi cu amät ah akhin apihta bäng om ba ciah hmat netah, ang htei ah m’lungshe ne ngami ah om nak ah a gawk law pyi ah hmawk ah kyak ci nei” cine a pyein cu ka ng’yak ci.

¹³ Shawk naw ani cu k’täm ne m’dek khan ah ami yuk gawt ah mawng cu hmat netah, pamihta ah hta ciah hnumi cu shui ne phak ci.

¹⁴ Cun ah hnumi cu khaw k’häu ung a yawn nak thei vai ah vanbuk hmu ah ng’phia hnih cu gah ci. Ani cu acu ah kum thum la avang ung shawk kphyunu ah gaa phiawn nak khai ah m’hteihtang khai gui ah kiak ci.

¹⁵ Shawk naw, cun ah hnumi cu tui naw a hteh vai ah am gawng awn tuinu ah ng’tat ne lawng khai ah muh ci.

¹⁶ Cun ung phi khomdek naw am gawng m’aan ne, shawk ah m’gawng ung lut lawk ciah tui avan cu m’yaw yawp netah hnuminu cu phiawn sak ci.

¹⁷ Cun kawn ah shawk cu ang htei ah m’lungshe netah, k’pawih ba ciah hnuminu ah a hta ng’shon gui ah kyak ciah Khanpughi ah ng’thukhän läk ci gui la, Bawipa Jesuh ah dang sak ah düng nak ung bekhüt ci gui cu, ng’tuk püi gui khai ah ng’düi law ne hteit ci.

¹⁸ Cun kawn ah shawk cu tuinu kem ah ng’düi ne om ci.