THU PHLAAN 11 - Cho Bible Common Language 2016

Saksi Pahnih

¹ Khankho chang naw kei-am nüt nak vai htung tumat na pe netah, “Hteit ne Khanpughi ah pum im la sonkiaang cu na nüt vai nei, pum im ung khawihnah ci gui phi na khei gui vai nei.

² Cun ung phi pum im ah ak pung lam cu kä na nüt vai, a i ah kia sei ci ung, cun cu changpakhui hei gui-am ap gui ah kyak ci. Ngami naw Manggaw Theing cu cha phlikip lei-goi ung ami khaw awn leh m’hnep khai gui nei.

³ Kei naw ka saksi pahnih ka tüi lawk khai nei. Ngani cu ng’yu nak sui sui ni ne, hnüüp 1, 260 ah kyong ung Khanpughi ah ng’thu cu shäu khai goi nei,” cine pyein ci.

⁴ Cun ah saksi pahnih cu khomdek uk ciah ma ah ng’düi ciah olive singghing pahnih la mei im pahnih ah kyak ci.

⁵ Ngami cu plawsheh law gui ci a om ah a kyak ung, ami m’gawng ung mei lut law ne ami gaa gui cu m’khih yawp ci. Acun ah mäih ah ngami ci gui khai ah k’tha nak ci phung cu ngawn ghäm ghäm ci gui.

⁶ Khanpughi ah ng’thu ami pyein sangung khaw kä a aa vai ah khankho khai nak hning ah huham ngami ung om ci, tui cu si ah ami lat nak hning ah huham phi ngami ung om ci, ami ng’yak hlü ah khomdek khan ah khaw yaw tui shek khai ah ami bi nak hning ah huham phi ngami ung om ci.

⁷ Ngami ah ng’thu ng’shäu ang pyi ah a kyak ung, m’htei lungkhui ung kaa khiküi lut law ne, ngami cu ng’tuk püi gui ne, näng gui ne ngawn gui khai.

⁸ Ami gook cu ami Bawipa kutlamtung ung ami ngawn nak ah mang gaw, lam k’cawih ung ng’yän shüt khai. Cun ah mang gaw ah ming m’hlün cu Sodom, kä cun ung Egypt ah kyak khai.

⁹ A khawpäng ungka a hlü hlü ah ng’thu ciah khui päng pa päng naw law ne, ami gook gui cu kä m’cim düt vai cine, hnüüp thum la am cawt ung teng khai gui nei.

¹⁰ Cun ah purofet goi ani sih ah hmawk ah khomdek chang gui cu, yeikyai u ne, khawhchaam ng’khih ng’bah tu u ne, näng nak bik khai gui nei. A i ah kyasei ci ung cun ah purofet goi naw, chang ah hta gui cu ang htei ah ani geinvai sak ah hmawk ah kyak ci.

¹¹ Hnüüp thum la am cawt lüng khätah, Khanpughi ungka hnun ghin nak cu kyum law ne, ngani ung lut khätah, ngani cu tho law ne ng’düi ci goi. Cun hmuk ciah chang gui cu ang htei ah cäicat ci gui.

¹² Cun kawn ah purofet goi-am, “Shin ung kai law nä” ciah khankho ah m’lau ne ng’khü ah k’aw cu thang lawk ci. Ngani cu gaa gui naw ami teng goi ah chung ung, khawmei ng’cum ne khankho ah kai ci goi.

¹³ Acun vai-am shihpi thüng ne ng’hmum law sei, mang gaw ah bumghaa ung bum ät cu di yawp ci, chang phia chih-kip phi si yawp ci gui. K’pawih ba ciah chang gui cu cäicat u ne, khanmawpi ah Khanpughi ah hlüngtai nak cu m’kümtou ci gui.

¹⁴ Akhnih nak ah kyuihkyawk nak cu ng’pyi pyi ci, akthum nak ah kyihkyawk nak cu gawk law ba ge khai.

Akchih Nak ah Phyungheng

¹⁵ Cun kawn ah akchih nak ah khankho chang naw ak phyungheng cu tum khätah, “Khomdek uknak ah hlüngtai nak cu mi Bawipa la a Messiah naw khäm pyi ci nei, ani naw ngawi yä uk lä khai nei” ci ne khankho ah k’aw naw pyein ci.

¹⁶ Khanpughi ah maa ah mangkiaang gui ung ngok ci gui ah a ghaampa m’ku lei-phli naw, Khanpughi cu khawihnah u netah,

¹⁷ “Yanta, tuhngawi, ngawi yä ghing ne om ciah Hlüngtai pi bäih ciah Bawipa Khanpughi Küikyang ciah na hlüngtai nak awn na uk pyi ciah kyasei, Kami ning yeikyai nak ci nei!

¹⁸ Na m’lungshe nak ah a khin cu gawk law ne, Si pyi ci gui m’khoichaa nak ah akhin cun phi gawk law sei, m’dek chang gui cu m’lungshe ci gui nei. Bawipa ah akchangshäm gui, purofet gui, nak chang gui la ning kyih aa ci gui naw, a yaw a däm ah ciah, m’cümhnah nak ami gah nak vai ah khin gawk lawk ci nei. Khomdek shekat sak ciah chang gui, m’shet m’kat nak gui vai ah, a khin gawk lawk ci nei” ci ne Khanpughi ah maa ah ng’thu pyein ci gui.

¹⁹ Cun kawn ah khanmawpi ah pum im cu ng’hmawng law khätah, Thukhän M’küm cu ka hmuk ci. Acun yah ung khaw lailäp ne ng’hmumkyeek ne, shipi thüng ne, gääi nu bawh ne khawshe ne aa lawk ci.