THU PHLAAN 10 - Cho Bible Common Language 2016

Cakchaw Hta Kawt Ciah Khankho Chang

¹ Cun kawn ah khankho ah kaa m’gääi ciah khankho chang tumat kyum law sei ka hmuk ci. Ani cu khongmei sui ne ng’hlawp ci, alu cu yapi naw koi ci, a hmai cu khohni ah mäih lawk ci, a khaw gui cu mei ah däi ciah k’tung gui ah mäih lawk ci.

² Ani cu k’phiaat pyi ah ca k’chaw hta a kut ung kawt ci. Akpat lam a khaw awn tuinu ung ng’leh ne, ak eng lam a khaw awn khaw kawng ung ng’leh ne ng’düi netah;

³ phongkawng ah m’ngaw ah mäih ah thüng sei ng’khü ci.

⁴ Cun ah ng’hmumkyeek ciah ng’thu cu ka guk khai ah pawng ngätah, “kä na guk-en vai nei, chih vei ng’hmumkyeek ciah ng’thu cu na m’yih vai nei” ciah khankho ah k’aw cu ka ng’yak ci.

⁵ Cun kawn ah tuinu la khaw kawng ung ng’düi ciah khankho chang naw, ak pat lam a kut khankho ah han shäng ne,

⁶ ng’shon päng ung ghing ne, khankho la khomdek, tuinu la apäng avan tüi sho ciah Khanpughi ah ming cu han be netah, “Cän kawn ah kä shou shü ba khai nei!

⁷ akchih nak ah khankho chang naw pyungheng a tum law ung, Khanpughi naw ak chang, purofet gui amcäi gui ah mäih ah, thuuk ciah apawng püi gui cu pyi phleh sak gui khai nei,” ci ne pyein ci.

⁸ Khankho ah ng’thu sei ka ng’yak ah k’aw naw kei-am, “Hteit ne tuinu la khomdek ung ng’leh ne ng’düi ciah, khankho chang ah kut ung k’phiaat ah ca k’chaw cu na lak vai nei” cine pyein ci.

⁹ Cun ah kyasei kei naw, cun ah khankho chang ah hteit netah, cakchaw hta cu ana peit vai ah ka k’thäh ci. Cun ah khankho chang naw, “La netah ei ä, tui khai nei” cine pyein ci.

¹⁰ Kei naw khankho chang ah kut ungka ca k’chaw cu la ne ka ei ci. Cun ah ca k’chaw cu ka m’gawng ung khawitui ah mäih ah tui pang ne phi, ka yuk düh kawn ah ka chikyong ah kha ne ng’liit ci.

¹¹ Cun kawn ah khankho chang naw, “Nang cu khaw akda ung, a hlü hlü ah ng’thu ciah khui päng pa päng la ghangpughang gui ah ma ah Khanpughi ah ng’thu cu ng’shäu ne na pyein ba khai nei” cine na pyen nak ci.