THUSHÄUTU 9 - Cho Bible Common Language 2016

¹ Kei naw shin ah mawng avan cu ang shäi ah, ak nui ah ngaih-tüh neta ka hmuh cu, cüivai ci la ng’düng ciah chang gui ah hnün thawh cu Khanpughi naw k’pang ci, ami m’hni nak la ami ng’gen nak phi k’pang ci. A ma ung a i ah kya lawk khai ci cu, a u naw phi kä hmat ci.

² Hmat ung phi a i kä ng’lak nak ci. Täng ciah buitang nak cu düng ci la omshek ci, nik ci la kyak ci, yum nak om ci la kä om ci, khawihnah douthak ci la kä douthak ci, avan ah khan ah gawk lawk ci. Changni cu katnak bik ciah ta kä bä tuba ci; ng’khäntam ci cun phi kä khäntam ciah ta kä bä tuba ci.

³ Buitang nak tumat cu van ah khan ung atäng ah gawk lawk ci, a shin cun phi khomdek khan ung kya lawk ci gui ah mäih ah cheishoh ciah kyak ci. Chang gui cu ami ghin ah chuih ami m’lung cu akshekha la gu nak awn be sei, ngami cu ang ghit ah sik ci gui.

⁴ Cun ung phi, ghin nak ah khaw ung, ghin ne om ci phäh ah ngaih u nak cu om ci nei: ghing ciah ui cu sik ciah kawng ah mä bä tuba ci nei.

⁵ Ä, ghing ci gui naw ami sih law vai cu hmat ci gui, cun ung phi sik ci naw a i kä hmat ci. Ngami ung m’cümhnah nak kä om ba ci; ngami cu akshe m’hnih gui ah kyak ci.

⁶ Ami m’hni nak, ami ng’gen nak, ami m’lung nak, avan cu ngami awn atäng ah sik ci. Ngami cu shin ah khomdek khan ung kya lawk ciah a i ung phi kä ng’päng tuba khai gui.

⁷ Cun ah kyasei, na buh ei ne yeikyai ä, na sapyit tui aw ne lünlawi ä. Cun cu Khanpughi ung bä ci nei.

⁸ Angtäi sei yeikyai ne lünlawi ä.

⁹ Na m’hni ah hnumi awn yeikyai ne om ä, cun cu shin ah khomdek khan ung na ghin hta yah ung Khanpughi naw aning pek ah akholä ah ghin nak ah kyak ci. Akholä ah kyak ciah a hnüp tä yeikyai ä, a i ah kyasei ci ung cun cu na khüikha nak avan ah phäh ah nang naw na gah vai avan ah kyak ci nei.

¹⁰ Na bi lawh phung cu tha na ne na bi vai nei, a i ah kyasei ci ung, hnünthawh nak, ngaih-tüh nak, hmuhmat nak, cüivai nak gui cu sih nak ah khaw ung kä om ba khai nei — cun cu nang naw na hteh nak ah kyak ci.

¹¹ Kei naw ka hmat ah a hei tumat cu, shin ah khomdek khan ung, dawng gai ciah chang päng angtäi sei dawng kä näng ci, m’gäi ciah chang päng angtäi sei ng’tuk kä näng ci, cüivai ciah chang, angtäi sei kä gahtang ci, hmuhmat ciah chang päng angtäi sei kä bämang ci, m’khütnäng ciah chang päng angtäi sei bawi ah kä ngok ci. A chang päng ah khan ah akshe cu gawk law thei ci.

¹² Na mät ah khin a i sang ung a gawk law vai cu nang naw kä na hmat ci. Kha gui ang ghit ah cuun ung pha ah mäih ah, nga gui ng’vai awn pha mäih ah, kä ngaih-tüh ah ng’yo a yaw khin ung, mikmi cu mi ng’pha thei ci nei.

Cüivai nak la Aanglam nak ah mawng Ngaih Tüh nak

¹³ Kei naw ka hmuh tumat om ci, shin ah khomdek khan ung cüivai nak cu a hawkcha ang ciah m’tumtäng nak akni ah kyak ci.

¹⁴ Chang kä da hnga ciah gawnu aläm tumat om ci. Huham mah ciah ghangpughang naw cun cu tuk ci. Ani naw cun cu koi neta, gawnu pang gui gäi ne luh vai ah pawng ci.

¹⁵ Acun ung dukhaih ciah chang tumat om ci, cun ung phi ani cu lulang aih ci kya ne gawnu cu gung hning ci. Cun ung phi ani ah mawng a u naw kä ngaih-tüh ci.

¹⁶ Kei naw angtäi sei, ka pyen ci, cüivai nak cu thagui ah ta bä pi ci, cun ung phi cun ah duhkhaih ciah chang cu a u naw cüivai ciah kä ngai ci, ani pyen phi a u naw kä ngai ci.

¹⁷ Cüivai ciah chang ah a düm ah angthu ngaih yak cu, ak aanglam gui ah ng’bum nak ung uktu ah m’lau ngaih yak ah ta bä tuba ci.

¹⁸ Cüivai nak naw likhim ah ta bä pi ci akni bi thei ci, cun ung phi hmakat ciah chang tumat naw ani nak akda m’di hning ci.