THUSHÄUTU 8 - Cho Bible Common Language 2016

¹ Cüivai ciah chang bäng naw va, apäng avan ah akcang ah akyak ah mawng cu hmat ci. Cüivai nak naw hmai kyang sak ne hmai m’kyum nak cu maih sak ci.

Ghangpughang Ngaih Nak

² Ghangpughang ah ng’thu nami ngaih vai, Khanpughi ah ang ghit ah shai kä nami tak vai.

³ Ghangpughang naw am’hni ah bi bi hning ci, cun ah kyasei ani ah ma ungka nami ng’nawn vai, cun ah mäih ah kyihkyawk vai ah hmun ung kä nami om vai.

⁴ Ghangpughang cu a huham awn hnüntho ci, ani ah bi lawh cu, a u naw kä ng’shi thäh hning ci.

⁵ Ani ah thumkhän na ngaih ah chuih, nang cu phyawn nak om ci, cüivai ciah chang naw a i cha bi vai, a i sang ung bi vai cu hmat ci.

⁶ Amawng ama päng ung bi nak vai ah khin la bi nak vai ah lam om ci, cun ung phi mikmi naw apihta bäng mi hmat ci.

⁷ Mikmi a u naw phi, a i i ah kya lawk khai cicu kä mi hmat ci, na m’thein gui ci phi a u kä om ci.

⁸ A u chang naw phi sih nak phyawn nak vai ah kä bi hning ci, a sih nak vai ah hnüüp phi kä m’hnawn hning ci. Cun cu mikmi naw kä mi phyawn nak hlawt vai ah ng’tuk nak ah kyak ci; mikmi naw hleei hlak ne kä mi phyawng hlawt ci.

Chang Omshe la Chang Omveih

⁹ Khomdek khan ung ami bi lawh gui ka ngaih-tüh ah akyak ung shin gui avan cu ka hmuk ci, cun ah khaw ung chang amshah cu huham om ci, amshah cu a cun gui ah ka ung yaica ci.

¹⁰ Ä, ka hmu gui ci, chang omshe gui cu phuh gui neta ami ng’phuh hmun ung, ng’cim hmun ah ka ng’hlah law ba ung, ngami naw akshe ami bi nak ah a cun ah mang gaw bäng ung, chang gui naw ngami cu m’tamkhah gui u sei kei naw ka hmuh gui ci. Cun cu akholä ah kyak ci.

¹¹ A i ah kyasei chang gui naw ang ghit ah cawipang nak cu ami bi ang? Cawipang nak cu ang ghit ah kä ami m’kyuk ah phäh ah kyak ci.

¹² Hmakat ciah chang naw cawipang nak phya bi ne, ghing ne om lä ci. Ä, kei naw chang gui naw a i ami pyen cu ka hmat ci nei: “Nang naw Khanpughi na ngaih ung a päng avan cu bä khai nei.

¹³ Cun ung phi chang omshe gui ah phäh ah ni nak kä om khai. Ngami ah ghin nak cu püpüi ah mäih ah kya ne, ngami cu ami nong yah ung sik khai gui, a i ah kyasei ci ung, ngami naw Khanpughi kä ngai ci gui.”

¹⁴ Cun ung phi cun cu a lämaih ah kyak ci. Khomdek khan ung a i ah akyak cu teng vä. A hnü ät ung chang om veih gui naw chang omshe gui ah gah vai ah m’kyuk nak cu gah ci gui, chang omshe gui naw chang omveih gui ah gah vai ah m’cümhnah nak ah gah ci gui. Cun cu akholä ah kei naw ka pyen ci.

¹⁵ Cun ah kyasei kei naw ka hmat ci, chang mikmi cu mi yeikyai vai ah kyak ci, a i ah kyasei ci ung, mi ghin sang ung na yei sak cicu ei la, awk la, amät ah yeikyai nak ah kyak ci. Shin ah m’dek khan ung, Khanpughi naw a pek ah a ghin nak ung mikmi naw bilo lä aih ci kyasei mikmi naw shin hlawk ah läi cu bi hning ci.

¹⁶ Kei naw cüivai chang ah kyak vai ah ka tha nak sang ung la khomdek khan ung a i ah kyak ci, cicu ka ng’thei sang ung, kei naw ka hmat cu, nang cu amü a hnüüp na thawhlet khai.

¹⁷ Cun ung phi, Khanpughi naw a i bik ci, cicu nang naw kä na hmat hlawt khai. Nang naw a i hlawk ah na tha nak ung phi kä na hmu hlawt khai. Cüivai chang gui naw kami hmat ci nei, cik khai gui, cun ung phi kä hmat khai gui.