THUSHÄUTU 7 - Cho Bible Common Language 2016

Ghing nak ah mawng Ngaih Tüh nak

¹ Nik ciah mingthang cu küikyang ciah tui ng’ui ah ta bä pi ci; sih nak hnüüp cu ng’tüi nak hnüüp ah ta bä pi ci.

² Sih gook htüm tu cu yu ng’kawi ung ng’lak tu ah ta bä pi ci, a i ah kyasei ci ung, chang mi van cu sih nak naw na ngäng gui ci nei ciah, ghin nak naw angtäi sei, a na m’shüm thein gui ah hmawk ah kyak ci.

³ A-yä nak cu gaih ng’pyan ah ta bä pi ci; a cun naw na hmai ning m’sau sak ci, cun ung phi na hmuhmat nak ning ghat sak ci.

⁴ Angtäi sei yeikyai nak ah mawng bäng ngaih-tüh cicu akgu ah kyak ci. Cüivai ciah chang naw sih nak ah mawng ngaih-tüh ci.

⁵ Cüivai ciah chang ah m’cäi m’ä nak cu, chang gu k’taak ah m’hlüngtai nak ah ta bä pi ci.

⁶ Chang gu-ang ah gaih cu ng’hling mei ah uih ah ng’gin ah mäih ah kyak ci. Cun cu a i ah phi kä ng’hmat ci.

⁷ Nang cu na cüivai ci, cung phi chang na m’hleei ung a gu-ang ah mäih ah hnüntho ciah kyak ci. Ng’mü khawh dou ci cu, a om ih m’di ciah kyak ci.

⁸ A mawng tumat ah khüt nak cu ang tün nak ah ta bä pi ci. M’lung sau nak cu chang ah ng’shei nak ah ta bä pi ci.

⁹ Nami m’lung nami k’üüp vai; ng’u hneit nak cu guktaak nak ah kyak ci.

¹⁰ “A i ah kyasei cau a i baw gui cu ayan ah ta a bä pi ang?” cine kä nami ng’shi phung vai. Cun cu hmuhmat ciah ng’shi k’ca ah kä kyak ci.

¹¹ Ghing ne om ciah chang phung cu a cüivai ah khin ci; cun cu pupa khawh gah ah mäih ah nik ci,

¹² a cun naw ngui naw m’lung üp nak a pek ah mäih ah ning pek khai. Cüivai nak naw ning phyawn sak ci — cun cu hmuhmat nak ah abä nak ah kyak ci.

¹³ Khanpughi naw a i a bi cu ngaih-tüh vä. Khanpughi naw ang koi sak cu a u chang naw ng’düng sak hning khai aw?

¹⁴ Nang ah phäh ah apäng avan abä yah ung yeikyai vä, khüikha nak a gawk law läi ung shüm ba düt vä: Khanpughi naw yeikyai nak la khüikha nak cu a tüih law ah kyak ci; cun kawn ah a i kya ba khai, cicu nang naw kä na hmat ci.

¹⁵ Kei ah ka ghin nak cu akholä ah kyak ci, cun ung phi a cun ah kyong ah kei naw a päng ka hmuk ci. Changni gui cu sik khai gui amshah gui cu ghing khai gui. Akshe ami kyak tupang ung phi.

¹⁶ Cun ah kyasei kä na ni aih vai, kä na cüvai aih vai — a i ah kyasei a cun awn na mät naw na mät na ngawn ang?

¹⁷ Cun ung phi kä shekat aih vai, kä guk’tak aih vai — a i ah kyasei a khin kä gawk sei na sih hlü ang?

¹⁸ Akit vang goi vei cu nami hlawi vai. Nang cu Khanpughi na kyih aa ah a kyak ung, nang cu a i ung phi näng nak na gah khai.

¹⁹ Uktu chang gha naw mang gaw tumat ah phäh ah ami bi hning ah ta, cüivai nak naw chang tumat phäh ah bi hning pi ci.

²⁰ Angtäi sei a hman bi ne, a hma kä bi phung ciah chang khomdek khan ung a u kä om ci.

²¹ Chang ah ng’thu päng geing na ne kä na ngaih vai, — na changshäm ah päipih nak ng’thu phi na ng’ya hning ci,

²² na mät naw phi akda vei chang na päipih cu namät naw na hmat ci.

²³ Kei naw shin gui avan m’nüm nak vai ah, ka cüivai nak cu ka mang ci. Kei cu ka cüivai vai ah ka thanak ci, cun ung phi ka hnu nak ci.

²⁴ Ghin nak cu a i ang, cicu a i cha ah, a u naw hmuteng hning khai ang? Cun cu mikmi ah phäh ah thuk aih ci nei, hmat vai ah khak aih ci nei.

²⁵ Ka mät naw ka mät hmuhmat vai ah tha na ne, ka ng’thei ci; kei naw cüivai nak hmuh vai la ka shi nak gui m’shan nak gah vai ah ka tha nak ci, cun kawn ah shetkat nak la gu-ang nak ah shekha nak phi ka ng’thei thang ci.

²⁶ Sih nak ah ta kha pi cicu ka hmuk ci, cun cu cuun ah mäih lawk ci hnumi nei. Ani ah ning pek ah m’hni nak cu ng’vai ah mäih ah kyak ci. Nang cu ning phak khai; a ning k’awi nak ah kut naw m’si gui ah mäih ah ning khit khai. Khanpughi yeikyai sak ciah chang naw a cun cu phyawn nak khai, cun ung phi katnak bik cicu a cun naw phak khai.

²⁷ Ä, Thushätu naw pyen ci, shin ah m’shan nak ka shui sang ung a piktäi ah ka hmu lawk ci nei.

²⁸ Kei naw a hei m’shan nak ka shui ci, cun ung phi kä ka hmuk ci. Chang phia gha ung ka, ka chang m’sui vai chang tumat ka hmuk ci, cun cu hnumi tumat ah kä kyak ci.

²⁹ Kei naw ka theithang avan cu: Khanpughi naw a htingling a khüsuh ah ana tüipyan gui ah kyak ci, cun ung phi mi mät naw mi mät mi cawngcam gonggan sak ah kyak ci.