THUSHÄUTU 6 - Cho Bible Common Language 2016

¹ Shin ah khomdek khan ung nuipai ciah kä taga nak bi gui cu kei naw ka hmuk ci.

² Khanpughi naw chang tumat am, khawh, m’tamkhah nak, la bühmang nak, ä, ang yak hlü nü pek ci, cun ung phi a cun gui naw ani kä yeikyai sak ci. Cun nak vaisü ung chang thai tumat cu yeikyai sak khai nei. Cun cu a kholä nei, avan hma ci nei.

³ Chang tumat cu phia ah hta ne, ak sho a ghin ung phi, a i güt a ghin ung phi, ani ung yeikyai nak kä om ne, akni ah htüm kaw nak phi kä a om ah a kyak ung, hta nak vai am sik ciah hta-yüt ah ta ka tuba ci nei.

⁴ Cun ah a hmaw hta nak cu a i ah phi abä nak kä om ci; ani cu hmüp khui ung mäih düt ci, chang gui naw phi m’hnih ci gui.

⁵ Ani naw kho hnüüp akdei phi kä hmu tuk ci, ghin nak cu a i ah mäih ah phi kä hmat tuk ci, cun ung phi ani naw ng’düm nak cu hmuk ci —

⁶ cun ah kyasei kho kum phia m’ku a ghin ung phi, a ghin nak ung yeikyai nak kä om ci cu, ng’düm nak hmu pi ci nei. Ak hnu ah, a ni nik hnih cu hmun ät ung hteit ci goi nei.

⁷ Chang tumat naw a ei vai a gah ah abi vai avan cu bik ci, cun ung phi kä ng’büh hlawt ci.

⁸ Cüivai ciah chang cu a hawkcha ah ang ak gu-ang ah mä abä tuba vei? Dukhaih ciah chang naw, a i cha ghin vai ciah a hmat nak awn, a i ang a bä nak a om kaw?

⁹ Cun cu a kholä nei; khokhi k’täm ne pha ah mäih ah kyak ci nei. Ang täi sei a i baw ng’ya hlü ne om ah k’dam ah, mät ung om ci awn ng’büh cu bä tuba ci nei.

¹⁰ A i phi kya lawk ci nü cu, a cau ge am hnüt bäi pyi ah kyak ci. Chang tumat naw amät ah mä gaigawng pi cicu ng’cucan püi ne kä gah ci, cicu avan naw mi hmat ci.

¹¹ Na ng’cucan law pik’täi ung, akholä ah kya law pik’täi ci, nang ung ani nak pi a i kä om lawk khai.

¹² Tawi ne a kholä ah kyak ciah mi ghin nak — püipüi ah mäih ah kyak ciah ghin nak ung, chang tumat naw, mimi ah phäh ah akni pi cu, a i hawkcha ah a hmat vai ang? Chang tumat naw m’sih kawn ah khomdek khan ung a i ah kya lawk khai ci cu, a i hawkcha ah hmat hning khai aw?