THUSHÄUTU 5 - Cho Bible Common Language 2016

Akten ah Shai Kä Tak vai

¹ Taigüim ah nami hteh ung ng’thei vai ah hteh cu ni pi ci. Nami geing nak vai. A cu ah hteit ne ngaih yak cu a hma la a hman kä hmat ciah chang gu-ang naw khawihnah a douthak ah ta bä tuba ci.

² Kä ng’thu pha ung ngaih-tüh ma vai, Khanpughi ah akten ah shai kä tak vai. Ani cu khankho ah om ci, nang cu khomdek ung na om ci. Cun ah kyasei, pyen khin vai ah kawn ah däm khai ah kä nami ng’thu vai.

³ Na ng’ä ai law pi ung, nang ng’mang akshe ah she law pi khai, akda ah na ng’thu law pi ung, na ng’thu akgu ang da law pi khai.

⁴ Cun ah kyasei, Khanpughi ah shai na tak ung, ang ghit ah nak pan vai. Chang gu-ang cu ani ah phäh ah mang vai kä kyak ci. Bi vai ah shai na tak cu na bi vai.

⁵ Shai tak bi neta kä k’pan ah ta, shai kä tak ling cu bä tuba ci.

⁶ Bü ne ka bi ah kä kyak ci nei, ciah Khanughi ah taigü ah ma ah na pyen awng vai ah na mät ah ng’thu naw katnak ung kä ning gawk en püi sä. A i ah kyasei Khanpughi naw aning m’lungshe nak vai ah na bi ang? Nang naw na bi gui cu a i vai na m’dishum sak ang?

⁷ A i chü na ng’mang a shet ung phi, a kholä ah kyak khai, a i chü na bi ung phi, a i chü ah na ng’thu ung phi, Khanpughi cu kyih aa ne na om vai.

Ghin nak cu Akholä

⁸ Acoyah naw dukhaih ci shedam ah ne, taga nak la ami chaw cu ma na gui sei, nami hmuh ung kä nami cäicat vai. Bawi päng cu amät ah khan ung om ci naw shung vong ci, a cun goi cun phi ani khan ung om ciah bawi naw shungvong ba goi ci.

⁹ Ghangpughang phi geit khäm ah khan ung va ng’düi ci.

¹⁰ Nang naw ngui na m’hni ah a kyak ung, a i yah ung phi kä na ng’büh hlawt khai; nang cu na büh mang hlü ah akyak ung phi na ng’yak hlü avan kä na gah khai. Cun cu akholä ah kyak ci nei.

¹¹ Nang cu na büh mang law pi ung, shai da law pi ci na tumbei khai. Nang naw na gah avan cu, na ng’büh mang ciah na mät naw na hmat ah kyak ci.

¹² Bi bik ciah chang cu a phü ah a ei ung phi kä a ei ung phi, mü ah akni ah ip thei ci. Ng’büh mang ciah chang cu, akda tak ciah kya ne, ng’ä ai ne, kä ip hlawt ci.

¹³ Shin ah khomdek khan ung kyih vai sei, shin ung kei naw ka hmuh cu; chang gui naw a hlü law ung ami mang vai ah ami ngui cu m’cun m’sep ci gui,

¹⁴ Cun kawn ah amawng ama akshe awn avan maih yawp sei, ami hta nau am ami pek vai phi kä om ne ng’pyi ci.

¹⁵ Shin ah m’dek khan ung a i kä law püi ah mi luh law ah mäih ah, a i kä hteh püi ah mi nawng shüt ci. Mi bi akda mi bi ung phi, cun avan cu mi mät awn atäng ah kä mi hteh püi hlawt ci.

¹⁶ Cun cu kä hman ci nei! Mikmi cu mi law ah mäih ah mi hteit ba ci. Mikmi naw k’tha na ne, khokhi cu mi phak ci, cung phi a i ang mikmi naw mi gah?

¹⁷ Mikmi cu hmüp khui ung om ne, thüisei ne, ng’ä ai ne, m’lungshe ne, gawpyam ne mi kyak ci nei.

¹⁸ Shin cu kei naw ka hmuh ah kyak ci; chang tumat naw akni pikbäih ah abi hning cu, ei ne, aw ne, hnünthaw ne, Khanpughi naw a pek ah ghin nak aktawi ung, abi lawh nak ung a yeikyai nak ah kyak ci; shin cu chang ah buitang ah kyak ci.

¹⁹ A vaisü ah Khanpughi naw chang tumat am bämang nak la khawh cham pek ne, a yeikyai sak ah akyak ung ani naw m’hlüngtai ne, a cun ah abi gui awn a yeikyai vai ah kyak ci. Shin cu Khanpughi ungka letsawng nei.

²⁰ Khanpughi naw ani am yeikyai nak a pek ah akyak ung ani cu, a i hlawk ah ghin nak tawi ciah kä ng’ä ai ba khai.