THUSHÄUTU 4 - Cho Bible Common Language 2016

¹ Cun kawn ah khomdek khan ung om ciah kä taga nak gui avan cu kei naw ka teng ba mä ci. Ami shedam nak gui cu thüi kyap ci gui, ngami m’htei tu gui khai a u kä om ci. Ngami m’htei gui khai a u kä om ci, a i ah kyasei ci ung, ngami shedam na gui ci gui ung huham om ci.

² Si ne hteit pyi ci gui ah khan ah kei cu ka ng’vanglak ci; ghing ne om ci gui ah ta ngami cu bä pi ci gui ah kyak ci.

³ Cung phi, a cun gui ah ta, chang ah kä ng’tüi tu phak ci gui la khomdek khan ung om ciah kä taga nak kä hmu tu man ci gui cu bä pi ci nei.

⁴ A i ah kyasei chang gui naw m’khütnäng vai ah ami tha nak aih ang ci ung; ngami naw ami im ng’gi ami m’thüi ah phäh ah kyak ci. Cun ung phi cun cu akholä ah kyak ci. Cun cu khokhi k’täm ne pha ah mäih ah kyak ci, cicu ka hmat ci nei.

⁵ Ngami naw pyen ci gui, ei ah cawi ne asih güt ung a kut kep ne ngok ci cu, chang gu-aang ah kyak ci.

⁶ Cun cu hman haw khai, cun ung phi, akphlüt sei, kut vang goi vei awn k’tha na ne tawtshi ah dam ah, khawh api hta awn m’lung ding gei sei om cu bä pi ci nei.

⁷ Ghin nak ung akholä ah kyak ciah amawng ahei phi ka hmuk ci.

⁸ Shin ung amät bäng om ciah chang tumat om ci. Ani cu a hta kä om ci, a phäi nau phi kä om ci, cun ung phi ani cu ang’täi sei bi bik ci, amät ung om ciah khawh awn kä ng’büh ci. Ani naw hüithaw nak phi nawng-en ne, a u ah phäh ah shin ah k’tha na ne abi ang? Shin cu akholä ah kyak ci-cümbawng ne ghin nak ah kyak ci.

⁹ Tumat ah ta, hnih cu bä bi ci, a i ah kyasei ci ung, chang hnih naw bä pi khai ah bi lo hning ciah kyak ci.

¹⁰ Avaisü ah chang tumat angtäät ah a kyak ung, ahei tumat naw m’tho tu ba hning ci. Cun ung phi chang tumat amät bäng om ne ta, angtäät ah a kyak ung, kä bä aih ci, a i ah kya sei ci ung, ani m’tho tuba khai a u kä om ci.

¹¹ Kho am yu ah akyak ung chang hnih cu, atäng ah ip ni ne, atäng ah om ni sei lum-awh ci, cun ung phi namät naw namät a i cha na lum-awh sak khai aw?

¹² Chang tumat näng hning ciah ng’tuk nak cu, chang hnih naw näng hnin ci. Thum pyu ne choh ah gui cu ci pit vai kä yäi ci.

^13-14 Dukhaih ciah chang tumat cu amät ah khaw ung ghangpughang ah kya law hning ci, thawng kyum te ci phi mang kyang ung ngo hning ci. Cun ung phi ani cu ghi law aih ne, chang m’cäi m’cat khai ah a ang law ah akyak ung ani cu a du aih ung phi cüivai ciah changnong kä pha ba hlawt ci.

¹⁵ Khomdek khan ung om ciah chang avan ah mawng cu, kei naw ka ngaih-tüh ci, ngami ungka a hawi ah baw om ciah changnong tumat cu ghangpughang ah hnün ung ngok khai cicu kei naw ka hmat ci.

¹⁶ Ghangpughang tumat ah uknak ung chang a i chü lawk khai ciah m’hnüt bäi nak kä om ci, ani a sih ah a kyak ung, ani naw abi gui ah phäh ah, ani yei nak khai a u kä om ci. Cun cu akolä ah kyak ci. Khokhi gawt ne pha ah mäih ah kyak ci.