THUSHÄUTU 3 - Cho Bible Common Language 2016

Apäng avan ah phäh ah Akhin

¹ Khomdek khan ung kyak ci gui nü cu Khanpughi naw aghü ah khin ung kyak lawk ciah kyak ci.

² Ani naw m’hnüt ci, ng’tüi nak ah khin om ne, sih nak ah khin om ci; ng’lin nak ah khin om ne, mawih nak ah khin om ci;

³ Ngawn nak ah khin om ne, gaisak nak ah khin om ci; phyet nak ah khin om ne, cawh nak ah khin om ci;

⁴ Ani naw m’hnüt ci, Thüi kyah nak ah akhin la yeinak ah khin om ci; Thüi kyah nak ah khin om ne, ng’lam nak ah khin om ci;

⁵ Ng’khawt nak ah a khin om ne, kä ng’khawt nak ah akhin om ci; Ng’ui hnam nak ah a khin om ne, kä ng’ui hnam nak ah khin om ci;

⁶ Ani naw m’hnü ci, Shui ne hmuh nak ah a khin om ne, a maih nak ah khin om ci; M’cun m’seh nak ah a khin om ne, fih ghawh nak ah khin om ci.

⁷ K’teh nak ah a khin om ne, chui ba nak ah khin om ci; Düm ah om nak ah a khin om ne, ng’thu htau nak ah a khin om ci;

⁸ Ani naw m’hnüt ci, yumhni nak ah khin om ne, thüi gen nak ah khin om ci; ng’tuk nak ah khin om ne, dimdeeih nak ah khin om ci.

⁹ Mi bi nak avan ungka, a i nimä mi mang vai a om?

¹⁰ Khanpughi naw gih ciah phuih ana phuih sak gui cu kei naw ka hmat ci.

¹¹ Ani naw ang nü ah phäh ah hman ciah akhin k’bäi ci. Ani naw ma lam ah mawng hmat nak hlü vai cu na pe gui ci, cun ung phi ani ah bi gui akbe ah hmat nak hlü vai cu kä na pe gui ci. Cun ung phi ng’büh nak vai ah hmuhmat nak cu kä na pe gui ci.

¹² Cun ah kyasei kei ka hmat ci, mi bi hning phung avan cu yeikyai nak vai kyak ci. Mi ghin yah ung akni pi mi bik khai.

¹³ Mikmi, mi van naw, ei ne, aw ne, mi bi lawh gah tang awn yeikyai vai ah kyak ci. Cun cu Khanpughi ah m’cümhnah nak ah kyak ci.

¹⁴ Khanpughi ah abi phung khonglän ung om ciah kei naw ka hmat ci. Nangmi naw cun cu k’be ne phi kä nami gah khai, la ne phi kä nami gah khai. Khanpughi ah abi tumat cu ani mi kyih aa vai ah ana pyan gui ah kyak ci.

¹⁵ Kyasang ci la kya law hning ci gui cu, ayän ä, kya man pyi ci gui ah kyak ci. Khanpughi naw cun ah mäih cu kyak ba sak ci.

Khomdek Khan Ung Kä Taga nak gui

¹⁶ Be nak ah taga nak la ng’düng nak a om nak vaisü ah shin ah khomdek khan ung shetkat nak düt mi hmuk ciah kei naw ka hmat ci nei.

¹⁷ Ka mät naw kamät ka pyen nak ci, “Khanpughi naw düng ci la shekhat cicu atäng ah m’khoichak khai, a i ah kyasei ci ung apäng nü, bilawh nü cu, amät am hnüt nak pek ah khin ung kya lawk khai nei.”

¹⁸ Kei naw ak hnu ah ka pyen cu, Khanpughi naw na m’nüm gui ci, mikmi cu seime gui ah kä mi bä tuba ah mawng dang sak ci.

¹⁹ Cun kawn ah chang la seime cu täng ciah mawng naw na ngäng gui ci. Tumat cu a hei tumat ah mäih ah sik ci. Ngami cu a tüisho gui täng täng ah kyak ci. Hnicim chang cu seime ah ta kä bä tuba ci, a i ah kyasei ci ung, ani nik hnih ah phäh ah ghin nak cu a i ah kä hmat ah kyak ci.

²⁰ Ngani ani nik hnih cu a hmun ät ung hteit ci goi — m’vut ung hteit ci goi. Ani nik hnih cu m’vut ungka lawk ci goi, m’vut ung hteit ba khai goi.

²¹ Chang ah mümcha cu khan ah kai ne, khisa ah mümcha cu m’dek ah ka ah yu kyum ci, ci cu, a u pi naw a i cha hmat khai aw?

²² Cun ah kyasei kei naw ka hmat cu, akni pikbäih mikmi naw mi bi hning cu, mi bilawh ah khan ah mi yeikyai vai ah kyak ci. Mikmi naw mi bi hning a i phi kä om ci. Mi sih kawn ah a i ah kya lawk khai ci cun phi mi hmat nak vai ah lam kä om ci.