THUSHÄUTU 2 - Cho Bible Common Language 2016

¹ Kei cu ka mät ka yei vai ah om ne, yeikyai nak cu a i ang ci phi hmuh vai ah ka k’bäi ci. Cun ung phi, cun cun phi akholä ah kyak ci, ciah ka hmuk ci.

² Gaih cu gu ang ah kyak ci, yeikyai nak naw kä akni ah ning kyak sak ci, cicu kei naw ka hmuk ci.

³ Cüivai nak ng’yak nak hlü cu gah nak vai ah, sapyit tui aw ne hüithaw ne, a khin k’ni gah vai ah ka k’bäi pyi ci nei. Cun cu khomdek khan ung chang gui naw ami ghin nak aktawi ami ng’pyi sak nak vai ah, akni pi ah ka ngai man ci nei.

⁴ Kei naw dämduh ci gui ka pyi phleh ci nei. Ka mät naw ka im co ne, sapyit gui phi ka geit ci nei.

⁵ Kei naw dum gui, lo gui ka geit ci, a cun ung sing theih gui avan om ci;

⁶ A cun gui tui shawi nak vai ah tuishawk phi ka pyang ci.

⁷ Kei naw changshäm akda ka hleih ci, ka kyongkhui ung changshäm gui ah hta gui phi om ci. Jerusalem ung om tu man ciah chang gui ah tak man phung ah da pi ciah seime ka tak ci.

⁸ Ka uknak ah khawlei mang gui ah khawh ungka ngui la ghui gui cu k’bum ne ka phluk ci. Hnumi pami gui naw ng’äi m’cu ne na khinchah nak ci gui, pami tumat ah ng’yak hlü bä sak khai ah hnumi avan kei ung om ci.

⁹ Ä, kei cu ka dämduh ci, Jerusalem ung om man ciah chang phung ah ka dämduh pi ci nei, ka cüivai nak naw a i yah ung phi kä na yuk kyak sak man ci nei.

¹⁰ Ka ng’yak hlü phung cu, ka gah ci. Yeikyai nak phung kei ka ma man ci. Kei cu ka bilawh gui phung ah phäh ah ka khähghah ci nei, cun gui avan cu kei ah m’cümhnah nak ah kyak ci nei.

¹¹ Ka bi gui nü avan la a i hlawk ah k’tha na ne cun gui ka bi avan cu ka ngaih-tüh ah a kyak ung, a i hta phi bä ci kä om ci, cun cu khokhi gawt ne pha ah mäih ah kyak ci — a i phi mang vai kä om ci.

¹² Cun kawn ah ghangpughang tumat naw a yanä ghangpughang gui ah bi man bä cu bi hning ci nei. Cun ah kyasei, cüivai nak, kä geingbawng nak, guktak nak ah mawng cu tün ne ka ngaih-tüh ci.

¹³ Akdei cu a hmüp ah mä abä tuba ah mäih ah, cüivai nak cu gu-ang nak ah mä bä tuba ci, cicu ka hmat ci.

¹⁴ Cüivai ciah chang naw a hteh nak ah lam cu hmat ci, gu-ang ci naw kä hmat ci.” Cun ung phi täng ciah manak vai naw mi van na ngäng gui ciah ka hmat ci.

¹⁵ Ka mät naw ka mät ka ngaih-tüh ci, “Akgu-ang ah manak ah mäih cu kei naw phi ka manak khai, cun ung kei ah ka cüivai nak naw a i ung ang ana bä sak kaw?” Ka mät naw ka m’hlan ci, “Akholä nei,” ka m’shang ci, “A bä tumat phi kä om ci.”

¹⁶ Cüivai ciah chang a u naw kä shüm ba ci, gu-ang ci phi a u naw kä shüm ba ci. Lawk ciah khohnüüp gui ung, mikmi, mi van cu na m’hnih gui khai gui nei. Mikmi, mi van mi sik khai — cüivai ci la gu-ang ci atäng vai.

¹⁷ Cun ah kyasei ghin nak cicu kei ah phäh ah a i ah phi kä hmat ci, a i ah kyasei ci ung, a cun ung om ci naw a i phi kei ah kä law püi ci, khuikha nak bäng law püi ci. Shin gui avan cu akholä ah kyak ci, kei cu khokhi gawt ne ka phak ciah kyak ci.

¹⁸ Kei naw ka bi lawh gui la bilo ne ka gah gui cu kei ah phäh ah akholä ah kyak ci, a i ah kyasei ci ung cun gui cu ka khui m’düng ci am ka pe shüt khai ah kyak ciah ka hmat ci,

¹⁹ ani cu cüivai ci, käcung gu-ang ciah — a u naw hmat khai aw? Cun ung phi kei ah ka bi gui nü, khomdek khan ung, kei ah cüivai nak naw a gah gui nü cu, ani naw ka nak khai ah kyak ci. Cun gui avan cu akholä ah kyak ci.

²⁰ Cun ah kyasei k’tha na ne ka bi ah phäh ah ka ng’yu ba ci nei.

²¹ Nang naw na cüivai nak avan, na hmuhmat nak avan, na m’khütnäng nak avan awn na bik ci, cun kawn ah, shin gui avan cu, shin ah phäh ah a i phi kä bik ci am na nawng pek khai kyak ci. Cun cu akholä nei, kä hman ci nei!

²² Nang cu na ghin ah chuih na bilo ci, na ng’ä ci, cung phi na m’dang vai a i om ne ang?

²³ Na ghin ah chuih na bi lawh nü cu akholä ah kyak ci, cun ung phi ng’ä ai nak la cäicat nak bäng ah kyak ci. Khomü ah phi na m’lung cu kä ng’düm ci. Acun cu akholä ah kyak ci.

²⁴ Chang tumat naw akni pikbäih abi hning cu ei vai, awk vai, gah tang ah khawh cham awn yeikyai vai ah kyak ci. Cun ung phi cun gui avan cu Khanpughi ung ka lawk ciah kei naw ka hmat ci.

²⁵ A i hawkcha ah nang, na mät ei aw ne, yeikyai ne na om hlawt ci ang?

²⁶ Khanpughi naw cüivai nak, hmuhmat nak la yeikyai nak gui cu ani yumhni ciah chang gui am pe gui ci. Cung phi ani naw shekak ci gui phi, bilaw, shuiyap, m’cum sak gui ci, ngami ah gah tang cu ani yumhni ci gui am pe gui ci. Cun cu avan akholä ah kyak ci. Khokhi gawt ne pha ah mäih ah kyak ci.