THUSHÄUTU 12 - Cho Bible Common Language 2016

¹ Nami hmaw chang yah ung, kä yei nak vai ah khohnüüp la kho kum gui kä ah gawk law pha ung, ning tüisho gui cicu shüm vä, a cun a gawk law ung nangmi naw, “Kä ka yeikyai ci nei” nami cik khai.

² Cun yah ung nangmi ah hmawk ah ng’hni ci, cha ni, aisi gui ni ah akdei cu hmüüp lawk khai, khongmei gui phi kä maih hlawt khai.

³ Cun kawn ah ning shungvong gui ciah nami kut cu ng’hlet ne, tuhbäi khüighat ciah nami khaw gui cu k’tha maih khai. Nami ha cu ken law sei ei akni ah kä nami htui khai, nami mik cu mü sei ng’htei sei kä nami hmuk khai.

⁴ Nami hnga cu pang sei lam ungka k’aw cu kä nami ng’yak khai. Sum den ah k’aw la tumkhawn gui bäng nami ng’yak khai, kha ah ng’gin naw nami ih nak ungka ning m’thou gui khai.

⁵ Nangmi cu a hlüng nak ung nami kyik khai, lam nami hteh ung kyihkyawk vai kyak khai. Nami lusam bawk khai; nami mät naw nami mät khak sei nami hteit khai, nami ng’yak hlü nak phung avan maih khai. Mikmi cu ak hnu ah ng’düm nak ah hmun ung mi hteit khai, lam yung ah chang gui kyap khai gui.

⁶ Ngui gui choh cu pit ne, ghui mei im cu kya law ne payak khai, lam yung ah chang gui kyap khai gui.

⁷ Mi pumsa cu m’dek ung m’vut ah hteit ba khai, ghin nak hnun cu acun na pe gui te ciah Khanpughi ah hteit ba khai.

⁸ Akholä nei, akholä nei, avan cu akholä nei, cine Thushätu naw pyen ci.

Khüm nak

⁹ Cun ung phi Thushätu cu cüivai ci kya ne, ani naw a hmat cu chang gui am m’thei htang gui lä ci. Ani naw thu thuuk gui cu ng’thei ne a hman nak cu m’nüm ci.

¹⁰ Thushätu naw shungvong nak ah calung gui cu tha na ne shui ci, cun ung phi ani ah guk ah calung gui cu ni nak ah kyak ci.

¹¹ Cüivai ciah chang ah ng’thu pyen gui cu htoshäm naw htome gui lam am shüm nak ah htung m’shum ah mäih ah kyak ci, a cääp ah ng’thu thuuk gui cu khäng sei khen ah m’si ah mäih ah kyak ci. Cun gui cu chang van ah htoshäm tumat ah kyak ciah Khanpughi naw a pek ah kyak ci.

¹² Ka hta aw, nang naw na geing nak vai tumat om ci nei. Ca uk ah ca guk ung kä ng’pyi hlawt khai kyak ci, aktä ah nami ng’thei ung nami cümbawng khai nei.

¹³ Shin gui avan kawn ah pyen vai tumat bäng om ci; Khanpughi kyih aa ne, ang thumkhän cu läk vai, a i ah kyasei ci ung a cun vai ah chang avan cu a tüisho ah kyak ci.

¹⁴ Mi bi nü nü, aka, m’zih ne bi gui avan cu Khanpughi naw m’khoichak khai nei.