THUSHÄUTU 11 - Cho Bible Common Language 2016Cüivai ciah Chang ah Abi 1 Na ngui cu akhohei ah sumlei nak vai ah na tha vai, khohnüüp ät ung anglawn na gah khai. 2 Khohmun akda ung sumlei nak na bi vai, a i ah kyasei ci ung, shin ah khomdek khan ung a i ah mäih ah ng’yo yaw nak na buitang vai cu nang naw kä na hmat ci nei. 3 Sing ghing cu a i täng ah a kyuk ung phi, a kyuk nak ung ng’yän ci nei. Khomei a be law ah akyak ung kho aa ci nei. 4 Khokhi kho aa a hman güt bäng ging ciah chang cu, a i yah ung phi kä geit kaw hlawt khai, kä khämkhi hlawt khai. 5 Khanpughi naw apäng tüipyang ci, m’gäi ciah hnumi ah puk kyong ah ghin nak akthai a i cha ng’tün ci, cicu kä na hmat ah mäih ah Khanpughi naw a i a bi cu kä na hmat ci. 6 Na geit m’shi cu kho ngawi lam ah phi phu ä, mühun lam ah phi phu ä. Na phu avan cu pyo khai, käcung na phu htük ah mä na phu ba cu ni pi khai, cicu nang naw kä na hmat ci. 7 Kho hnüüp ah akdei ung yeikyai tu cu nik ci nei. 8 Akum tä ne na ghin nak phäh ah na m’hlüngtai vai nei. A i güt na ghin ah akyak ung phi, na sih nak cu akdäm shou pi khai cicu na shüm vai nei. Ma täng ung na ngaih u vai a i phi kä om ci nei. Changnong gui M’cäi nak 9 Chang nong gui, nami nong yah ung hüithaw vä. Nami hmaw yah sang ung yeikyai vä. Nami bi hlü cu nami bi vai nei, nami m’lung ah ng’yak hlü cu nami läk vai nei. Cun ung phi nami bi nak phung ung Khanpughi naw ning ng’thumcha gui khai ci cu, nami shüm vai nei. 10 A i naw phi kä a ning ng’ä ai sak gui vai, a i naw phi kä a ning nat sak gui vai. Nangmi cu akshou nu chang nong ah kä nami kyak khai nei. |
Cho Bible Common Language © Bible Society of Myanmar, 2016.
Bible Society of Myanmar