THUSHÄUTU 10 - Cho Bible Common Language 2016

¹ K’pi k’si tumat naw situi tui ng’ui palang ät thu sak ci, sheit nak api naw, dämduh pi ciah cüivai nak m’shet sak ci.

² Cüivai ciah chang naw hman ci bik ci, angtam ciah chang naw hma ci bik ci, cicu kyaman khät ciah kyak ci.

³ Chang shekha cu lam ah hmuk ciah chang gui naw phi, ani ah gu-ang nak cu hmat ci gui; ani naw amät a gu-ang cu chang päng am hmat sak ci.

⁴ Ning uk ciah chang, na khan ah a m’lungshe law ah a kyak ung na bi kä na nawng en vai; nang cu a düm ah na om ah akyak ung, cheishoh nak aktung phi ning m’gein khai nei.

⁵ Shin ah khomdek khan ung kä taga ci gui cu kei naw ka hmuk ci — cun cu uk ci gui ah bi ah kyak ci.

⁶ Chang shekha gui cu huham mah ciah bawi ah m’hmoh gui u ne, bühmang ci gui cu ami nawng gui.

⁷ Changshäm gui cu ng’se ung cum u sei, chang pacawng gui cu changshäm ah mäih ah ami kholek awn hteit hton ci gui. Kei naw ka hmu gui ci.

⁸ Khui shawk cicu khui ung ng’kyak ci, k’pang phyet cicu k’phyu naw m’cuuk ci.

⁹ Lung khui ung lung bik cicu lung awn leim ci, sing thek cicu sing awn leim ci.

¹⁰ A ghei pun ci kä k’tah ci naw, cun amang vai ah tha ghat pi ci. Ng’dawt ne pawng m’hteiu cu bä pi ci.

¹¹ K’phyu naw aning k’dawk ma vai ah na bi ah akyak ung, phyu m’hlen nak ah mawng na hmat cu akholä ah kyak ci.

¹² Cüivai ciah chang cu angthu naw ng’tamkhah sak ci, cun ung phi angtam ciah chang cu amät ah ang thu naw m’di ci.

¹³ Ani naw ang thu cu ak-ang thu awn tün ne, akgu ng’thu awn khüp ci.

¹⁴ Chang gu-ang cu ng’thu ne ng’thu ci. Ngawi ah a i ah kya lawk khai cu a u naw kä hmat ci, mi sih kawn ah a i ah kyak khai ci phi a u naw kä na m’thei gui hning ci.

¹⁵ A im ah a hteh nak ba vai lam kä hmat ciah chang bäng naw va, amät naw amät bawngbai ne bi lawh sak ci.

¹⁶ Ghangpughang cu hmaw ne, ang vai gui cu, amü pum ei aw ne ami kyak ung, cun ah khawpäng cu khüikha nak ung gawk khai nei.

¹⁷ Amät ah m’hnüt bäi nak awn bi hning ciah ghangpughang om ne, a khin awn ei ne, amät naw amät m’htei ne, kä awktat ciah angvai gui ah om nak ah khawpäng cu bänak om ci nei.

¹⁸ Chang tumat cu dam aih ne, a im k’cih nak kä a pyan ba ah akyak ung, ak cih cu htee ne, im cu ng’phyek khai nei.

¹⁹ Ei ah pawi naw ning yei sak ci, awk ah pawi naw ning yei sak ci, cun ung phi ngui kä a om ung cun kä na bi hning khai.

²⁰ Ghangpughang cu kä na pyen sak vai, adüm ah phi kä na pyen sak vai, bühmang cicu kä na pyen sak vai, na mät ah ih nak kyong ung phi kä na pyen sak vai, cun ah ng’thu cu kha naw hteh püi ne, nang ah pyen cu ngami am m’thein ba gui hngaw khai nei.