THUSHÄUTU 1 - Cho Bible Common Language 2016

Ghin nak cu Akholä

¹ Shin cu David ah htapa, Jerusalem ghangpughang, ak thuuk hmat ciah ng’thu ah kyak ci.

² Ak thuuk hmat ci naw pyen ci, Shin cu akholä nei, akholä ne, ghin nak cu akholä nei, avan akholä nei.

³ Nangmi naw nami ghin nak cu bilawh nak, khüighat nak awn nami ng’pyi sak ci.

⁴ Ng’shon ät hteit sei ng’shon ät law ba ci, cun ung phi khomdek khan cu a cun ah om ci.

⁵ Khokhi cu lut law ne, hang law ba ne, ang tün nak ba vai ah cüm bawng ne hteit ba ci.

⁶ Khokhi cu a htumtäng ah khi ne, a siiptäng ah khi ne ng’veing ne, ng’veing ne khi ne, a cun ung gawk ba ci.

⁷ Tuilawng päng cu tuinu ah ng’dawn ci gui, cun ung phi tuinu cu kä be phung ci. Tui gui cu tui ah khawng nak ah ng’hlat ne gawk ba u ne, cun ungka long ba mä ci gui.

⁸ Apäng avan cu khüikha nak täng ah mang ci-khüikha nak cu ng’thu awn pyen vai ah däm aih ci nei. Mi mik naw kä hmu yap lawt ci, mi hnga naw kä ng’ya yawp hlawt ci.

⁹ A yan kya man cicu kya ba mä khai. A yan bi bi man cu bi ba mä vai kyak ci. Khomdek khan avan ung akthai a i kä om ci.

¹⁰ “Teng vä, shin cu akthai nei!” cine chang naw pyen thei ci. Cun ung phi, cun avan cu a cau kya pyi man ci nei, kä mi ng’tüi pha ung kya pyi man ci nei.

¹¹ A cau kya man cicu a u naw kä shüm ba ci. Tuhbäi la ngawi ah ang’lak ung kya lawk khai gui cu, lawk khai ah hnüüp gui ung om ciah a u naw kä shüm khai.

Ak Thuuk Hmat ciah Buitäng gui

¹² Kei, ak thuuk hmat cicu Israel kho ung ghangpughang ah kya ne, Jerusalem ung ka om ci.

¹³ Shin ah khomdek khan ung bilawh gui phung, kei naw cet ne k’tä ne, ka teng khai ah ka om ci. Khanpughi naw khüikha nak ah mawngma cu mikmi ah khan ah yuk cha pyi ci nei.

¹⁴ Shin ah ah khomdek khan ung bilawh gui nü cu kei naw ka hmuk ci nei, kei naw ka ning m’thein gui cu, cun gui avan cu akholä nei, Cun cu khokhi k’täm ne pha ah mäih ah kyak ci nei.

¹⁵ Ng’koi cicu kä nami ng’düng sak hlawt khai; kä om cicu kä nami khei hlawt khai.

¹⁶ Kei naw ka mät ka pyen nak ci, “Kei cu dämduh ciah chang ah ka kyak pyi ci, ka hnu ung Jerusalem uk ci gui ah ka cüivai pi ci. Cüivai nak la hmuhmat nak akcang cu kei naw ka hmat ci.”

¹⁷ Hmuhmat nak la gu ang nak, cüivai nak la gu k’tak nak gui ah ng’lak mah nak cu kei naw ka ng’thei khai ah ka k’bäi pyi ci nei. Cun ung phi, kei phi khokhi gawt ne phak ciah mäih ah ka kyak khai cicu ka hmuk ci.

¹⁸ Chang cu cüivai law pi ci, ng’ä ai law pi ci, hmuhmat law pi ci, a cun naw nat sak pi ci.