TAIGÜTHUM 9 - Cho Bible Common Language 2016Aaron naw Khawihnah nak Douthak ci 1 Phyutheh nak kümsei ami bi nak ah a hnüüp cheit hnüüp Moses naw Aaron la a hta gui la Israel ng’vai gui cu khü gui ci. 2 Ani naw Aaron am, “Api ah phi kä kheihlik ciah vantang hta la htome hta cu la neta Bawipa am na douthak vai, vantang hta cu katphyawn-douthak nak ah kyak khai, htome hta cu m’khih ne douthak nak ah kyak khai. 3 Cun kawn ah Israel chang gui na m’thein gui vai, katphyawn douthak nak vai ah me amca ami law püi vai, m’khih ne douthak vai ah api ah phi kä kheihlik ciah, kum ät lüng ciah seipat hta tumat la kum ät lüng ciah htome hta tumat ami law püi vai. 4 Hmuhchum douthak nak vai ah vantang hta la htome hta akhla ami law püi vai. Cun gui cu situi awn k’caw ah htang douthak nak awn a täng ah Bawipa am khawihnah ak vai. Ngami naw cun ah ami bi vai, a i ah kyasei ci ung tuhngawi Bawipa cu ngami ah ma ah ng’dang khai. 5 Ngami naw Phung ah hmai ung Moses naw thumkhän ne am cäi gui phung cu law püi ci gui. Chang gui ami van cu Bawipa khawihnah vai ah ng’bum lawk ci gui. 6 Moses naw, “Shin gui avan nami bi vai ah Bawipa naw thumkhän ning pe gui ci nei, cun ah kyasei dei ne ng’shü ciah ak khang ah a om nak cu nangmi ah khan ah ng’dang lawk khai nei” cik ci. 7 Cun kawn ah ani naw Aaron am, “Sonkiang ah hteit ne chang gui ah katnak la ami katnak nawt heng khai ah katphyawn douthak nak la m’khih ne douthak nak cu na douthak vai. Bawipa ah thumkhän ah mäih ah chang gui ah katnak nawt heng nak ah shin ah douthak cu na bi vai” cine pyen nak ci. 8 Aaron naw sonkiang ah hteit ne vantang hta cu gawn ci, cun cu amät ah katphyawn douthak nak ah kyak ci. 9 A hta gui naw asi cu law püi ci gui, ani naw acun ung a kutpyün gui yuk phum ci, amshah cu sonkiang ah kit gui a lawi gui ung mek nak ci, pawih ba cicu sonkiang ah akung ah huk ci. 10 Cun kawn ah ani naw Bawipa naw Moses am thumkhän a pek ah mäih ah a thau ni, amke ni, amsin ung akni pi gui cu sonkiang ung m’khih ci. 11 Cun ung phi a meh la avun cu Phung ah akpung ah m’khih ci. 12 Ani naw amät ah hmawk ah m’khih ne douthak nak vai ah seime cu ngawn ci. A hta gui naw asi cu thak law u sei, sonkiang ah ang leng phli ung ani naw huk ci. 13 Ngami naw alu la asa kiüh gui cu a kut ung pe u sei, ani naw sonkiang ung m’khih ci. 14 Ani naw a chikyong gui la a phei khaw gui cu m’si neta, sonkiang ung m’khih ne douthak gui ah a khan ung m’khih ci. 15 Cun kawn ah ani naw chang gui ah douthak nak cu pek ci, ani naw chang gui ah katnak ah phäh ah douthak vai ah me hta cu la ne ngawn ne, amät ah katphyawn nak a bi ah mäih ah douthak ci. 16 Ani naw m’khih ne douthak vai ah seime cun phi la neta, thungyo ah ciah douthak ci. 17 Ani naw htang-douthak nak cu pe ne, m’htut den shum ät cu la neta, sonkiang ung m’khih ci. (Cun cu a hnüüp tä ami bi ah m’khih ne douthak akbe nak ah kyak ci.) 18 Ani naw chang gui ah hmawk ah hmuhchum douthak nak ah vantang hta la htome hta cu ngawn ci. A hta gui naw acun ah si cu thak law u sei, sonkiang ah angleng phli avan ung ani naw huk ci. 19 Aaron naw vantang hta la htome hta ah a thau gui cu, 20 seime ah ang kyang khan ah taih neta, avan cu sonkiang ah law püi ci. Ani naw a thau cu sonkiang ung m’khih neta, 21 ang kyang la akpat täng khaw gui cu Moses ah thumkhän ah mäih ah, taigü gui ah hmawk ah aktung pi ah Bawipa am m’cümhnah ah pek ci. 22 Aaron naw khawihnah nak avan cu pyi yawp neta, chang gui ah khan ah a kut shäng ne hriham pe gui ci, cun kawn ah kyum law ba ci. 23 Moses la Aaron cu Bawipa ah om nak ah Phung ah kyong ah hteit ni neta, lut law ba ni ne chang gui cu hriham pek ci goi. Pyü ne ng’shü ciah Bawipa ah akdei ah om nak cu chang van ah khan ah dang ci. 24 Ang ghit ah Bawipa naw mei yuk chah sei, acun naw sonkiang khan ungka m’khih ne douthak la a thau gui cu ui yawp ci. Chang gui naw cun cu hmu u neta, ami van m’lau u ne, ami hmai naw m’dek tawn khai ah kawp ci gui. |
Cho Bible Common Language © Bible Society of Myanmar, 2016.
Bible Society of Myanmar