Biblia Todo Logo
Bib sou entènèt

- Piblisite -

TAIGÜTHUM 8 - Cho Bible Common Language 2016


Aaron la a Hta gui ami phyuhtheh nak
( Phn 29:1-37 )

1 Bawipa naw Moses am,

2 “Aaron la a hta gui cu kei ah om nak ah Phung ung valuh nak ung na law püi gui vai. Taigü suinu gui, hluk nak ah situi, katphyawn-douthak nak vai ah vantang nong, htome akhla hnih, la k’caw kä shum ah m’htut dawn ät cu nami law püi vai.

3 Cun kawn ah changbum avan cu acu ah na khü law gui vai” cik ci.

4 Bawipa naw ang thumkhän ah mäih ah Moses naw bik ci. Chang gui cu ng’bum yawp u khäta,

5 ani naw ngami am, “Kei naw tuhbäi ka bi law vai cu, Bawipa ah thumkhän ah kyak ci” ciah pyen na gui ci.

6 Moses naw Aaron la a hta gui cu law püi gui neta, theingthap nak tui ami ng’si vai ah pyen na gui ci.

7 Ani naw Aaron am k’htu la suinu m’sui ne, akhei phi khih sak ci. Ani naw kyang sui phi sui sak ci. Akni ah tah ah kheipat awn acun cu khawng ne akhei pat sak ci.

8 Ani naw ng’e saphaw k’bah sak ne, Urim la Thummim cu acun ah kyong ah tha ci.

9 Ani naw alu ung sam sawm sak ne, sam ah mawng ah ghui lukang awn pyan pek ci. Cun cu Bawipa ah thumkhän ah mäih ah ng’ap nak cu ng’ciim sei m’dang nak ah kyak ci.

10 Cun kawn ah Moses naw hluk nak ah situi cu la neta, Bawipa ah om nak ah Phung ah khan ah k’peh ci, a kyong ah om ci nü ah khan ah phi k’peh ci, acu cha ah ani naw avan cu Bawipa am ap ci.

11 Ani naw situi cu la ne sonkiang la pyan nak gui ah khan, la tui shawk la akung yung ah chih vei k’peh ci. Cun cu Bawipa am apnak ah bi ah kyak ci.

12 Ani naw Aaron ah lu khan ah phyuh nak situi awn shawi ne phyuhtheh ci.

13 Cun tawi ne Moses naw Aaron ah hta gui cu law püi gui ne, k’htu m’thuh gui ne, ami ng’kyang ung kheipat awn pat gui ne, ami lu cu lukhu awn htuih sak gui ci, cun cu Bawipa ah thumkhän ah kyak ci.

14 Cun kawn ah Moses naw vantang hta cu katphyawn-douthak nak vai ah law püi khäta, acun ah lu khan ah Aaron la a hta gui naw ami kut taih ci gui.

15 Cun cu Moses naw ngawn ne asi amshah la neta, a kutpyün awn, sonkiang ah akit gui ung alawi gui cu hluk ci, cun cu ng’apnak ah kyak ci. Ani naw pawih ba ciah asi gui cu sonkiang ah akung ah huk ci. Acu cha ah ani naw ng’apnak bi ne ng’gängsei sak ci.

16 Moses naw a chikyong ah kaa a thau avan, amsin ung akni pi, amke gui la acun ung a thau gui, cu la neta sonkiang khan ah avan m’khih ci.

17 Ani naw pawih ba ciah vantang ah avun, amcii la a chihta gui cu Bawipa ah thumkhän ah mäih ah Phung ah akpung ah m’khih ci.

18 Cun kawn ah Moses naw htome akhla cu m’khih ne douthak vai ah law püi khäta acun ah lu khan ah Aaron la a hta gui naw ami kut taih ci gui.

19 Moses naw cun cu ngawn neta, asi cu sonkiang ah angleng phli avan ung huk ci.

20-21 Ani naw htome cu kiük neta, a chikyong ah ka gui la a phei khaw gui cu tui awn m’si ci, alu ni, a thau ni, htome ungka pawih ba ci avan cu, sonkiang ung m’khih ci. Cun cu Bawipa ah thumkhän ah mäih ah bi ah kyak ci. Cun ah m’khih ne douthak cu ei-douthak ah kyak ci. Ang ui naw Bawipa cu yeikyai sak ci.

22 Cun kawn ah Moses naw ak hnih nak ah htome khla cu la ci, cun cu taigü gui phyuhtheh nak gui vai ah kyak ci. Cun ah alu ah khan ah Aaron la a hta gui naw ami kut taih ci gui.

23 Moses naw cun cu ngawn neta, asi amshah cu la ne Aaron ah akpat täng a hnga gäp, akpat täng akutnu la akpat täng akhawnu ung mek ci.

24 Cun kawn ah Aaron la a hta gui cu khü gui ne, acun ah si awn ami pat täng hnga gäp gui, ami pat täng kutnu gui la ami pat täng khawnu gui cu mek gui ci. Moses naw pawih ciah si cu la neta, sonkiang ah angleng phli avan ung huk ci.

25 Ani naw athau, angmei thau, a chikyong ung a thau avan, amsin ung akni pi, amke gui la a cun ung a thau gui, la akpat täng aphei khaw cu lak ci.

26 Ani naw Bawipa am ap ah k’caw kä shum ah m’htut dawn ungka m’htut apum, situi awn shawn apum, biskuit m’htut tumat, gui cu la neta a thau gui la aphei khaw ah khan ah tha ci.

27 Ani naw shin gui avan cu Aaron la a hta gui ah kut ung pe gui ci. Ngami naw cun cu Bawipa am aktung ah m’cümhnah nak ah pek ci gui.

28 Cun kawn ah Moses naw ei cu ngami ungka la neta, phyuhtheh douthak ah kyak khai ah m’khih ne douthak ah sonkiang khan ah m’khih ci. Cun cu ei-douthak ah kyak ci, ang ui naw Bawipa yeikyai sak ci.

29 Cun kawn ah Moses naw amakaw cu la neta, aktung ah m’cümhnah ah Bawipa am pek ci. Shin cu Moses naw phyuhtheh nak htome ung abi amshah ah kyak ci. Moses naw a päng avan cu Bawipa ah thumkhän bä bä ah bik ci.

30 Moses naw hluknak situi amshah la sonkiang ungka si amshah cu la neta, Aaron la hta gui ah khan la ami sui gui ah khan ah k’peh ci. Cu cha ah ani naw ngami la ami sui gui cu theing sak ne, Bawipa am ap ci.

31 Moses naw Aaron la a hta gui am, “Bawipa ah om nak ah Phung ung valuh nak ung meh cu hteh püi ne, shong ne, Bawipa ah thumkhän ah mäih ah phyutheh douthak nak ah dawn ungka m’htut la ne, meh ne, acun ah nami ei vai.

32 Pawih ciah meh ni, m’htut ni avan cu nami m’khih vai.

33 Phyutheh nak nami bi nak kä a khüm pha ah chuih, khaw hnüüp chih ung Phung ung valuh nak ungka kä nami hteh en vai.

34 Tuhngawi shin ah kami bi gui cu, Bawipa naw kami bi vai ah thumkhän ana pek gui ah kyak ci, cun cu nangmi ah katnak nawt heng nak ah kyak ci.

35 Nangmi cu Phung ung valuh nak ah m’kawt ung amü, a hnüüp, khaw hnüüp chih ung nami om vai, Bawipa ah thumkhän cu nami bi vai. Kä nami bi ung nami sik khai. Shin cu Bawipa naw thumkhän ana pek ah kyak ci.

36 Cun ah kyasei Aaron la a hta gui naw, Moses ung Bawipa naw thumkhän a pek phung cu bik ci gui.

Cho Bible Common Language © Bible Society of Myanmar, 2016.

Bible Society of Myanmar
Swiv nou:



Piblisite