TAIGÜTHUM 7 - Cho Bible Common Language 2016

Thungba nak Douthak nak

¹ Shin gui cu thungba nak douthak nak ah thungyo gui ah kyak ci. Cun gui cu ang htei ah theingcim ci.

² Shi ah douthak nak vai ah seime cu sonkiang ah alu täng ah ngawn vai, cun cu m’khih ne douthak nak ah seime ngawn nak ah kyak ci. A si cu sonkiang ah ak kit phli avan hnungtuk nak khai ah huk vai.

³ Athau avan la ne sonkiang ung douthak vai; ang mei ung athau, a chi kyong hlawp ciah athau,

⁴ amke gui la cun ung athau, amsin ung akni pi,

⁵ Taigü naw Bawipa am ei-douthak ah kyak khai ah sonkiang ung a thau avan cu am khih vai. Cun cu thungba nak douthak ah kyak ci.

⁶ Taigü kyong pami phung naw cun cu a ei vai. Cun ung phi cun cu a theingcim nak ung ei vai, a i ah kyasei ci ung cun cu ang htei ah theingcim ci.

⁷ Katphyawn douthak nak la thungba nak douthak nak ng’dang sak ciah thungyo tumat om ci. Khawihnah nak douthak ciah taigü naw cun ah meh cu khäm ci.

⁸ M’khih ne douthak nak seime ah avun cu khawihnah nak douthak ciah taigü naw khäm ci.

⁹ Meibum ung ng’shai, hlaw k’am ung hlaw la m’sii k’am ung hlaw ah htang douthak phung cu, acun Khanpughi am douthak ciah taigü naw khäm ci.

¹⁰ Cun ung phi situi awn k’caw pyi, m’kyan pyi ne kä shon pa ah htang-dothak cu, Aaron tuu taigü gui ami van nah kaa ah kyak ci, ami ng’pai vai ah kyak ci.

Hmuhchum Douthaknak

¹¹ Shin gui cu Bawipa am pek ah hmuhchum-douthak nak ah mawng thungyo gui ah kyak ci.

¹² Chang tumat naw shin ah douthak nak cu, Khanpughi am yeikyai douthak nak ah a bi ah a kyak ung, ani naw a täng ah a pek vai. Khawihnah nak vai ah seime, k’caw kä shum ne douthak ah m’htut, olive situi awn m’htut den k’caw ne pyan ah m’htut ak shah, käcung olive situi awn pyan ah biskuit m’htut, käcung olive situi awn k’caw ne den ah keik m’htut.

¹³ Akbe nak ah ani naw k’caw awn pyan ah m’htut cu a douthak vai.

¹⁴ Ani naw m’htut tumat ungka k’bou ät ci la ne, Bawipa am aktung ah a pek vai. Cun cu seime ah asi la ne sonkiang ah a hnutäng ah huk ciah taigü naw akhäm vai.

¹⁵ Seime ah asa cu acun awn khawihnah hnüüp ung ei vai. A ngawi ung khawngawi güt a i phi kä pawih nak vai.

¹⁶ Chang tumat naw khäntam bukbe nak ah hmuhchum douthak a law püi ah a kyak ung, käcung amät ah yum ah a douthak ah a kyak ung acun douthak hnüüp ung avan kä ei vai, pawih ba cicu lawk ciah hnüüp ung ei ba vai.

¹⁷ A hnüüp thum güt pawih ciah asa cu mei ung m’khih vai.

¹⁸ A hnüüp thum güt cun ah a sa cu ei ba ah a kyak ung, chang ah douthak cu Khanpughi naw kä dou khai. Douthak cu ani naw kä khei khai, kä theingcim ciah k’bäi khai. Cun ei ciah chang cu acun ah a phu ma na ne yaica khai.

¹⁹ Cun ah a sa cu kä theingcim ci awn ang dawn ah a kyak ung, kä ei vai, mei ung m’khih vai. Akcang ah theingcim ciah chang naw cun ah sa cu a ei vai.

²⁰ Cun ung phi kä theingcim ci naw a ei ah a kyak ung ani cu Khanpughi ah chang ah kä kya ba khai.

²¹ A cun ah mäih ah chang tumat naw kä theingcim ci a tawn kawn ah cun ah douthak ah sa a ei ah a kyak ung, chang ungka ah a kyak ung phi, sei ungka ah a kyak ung phi, ani cu Khanpughi ah chang ah kä kya ba khai.

²² Bawipa naw Moses am shin ah thungyo gui cu pek ci.

²³ Cun gui cu Israel chang gui ah hmawk ah kyak ci. Seipat, htome, me ni ah thau phung cu kä ei vai.

²⁴ Amät sik ci, käcung sa ah lawh ah seime ah a thau phung cu kä ei vai, cun ung phi a hei lam ah mang vai.

²⁵ Chang tumat naw Bawipa am ei-douthak ah douthak ah seime ah a thau a ei ah a kyak ung, ani cu Khanpughi ah chang ah kä kya tuba khai.

²⁶ Israel gui cu a hawi ami om ung phi, ngami naw kha ah si, seime ah si phung cu ei vai ah kä ami mang en vai.

²⁷ Chang tumat mat naw shin ah thumkhän am shet ah a kyak ung, ani cu Khanpughi ah chang tumat ah kä kya tuba khai.

²⁸ Bawipa naw Moses am shin ah thungyo gui cu pek ci.

²⁹ Cun cu Israel chang gui ah hmawk ah kyak ci. Hmuhchum-douthak law püi ciah, chang phung naw amshah cu Bawipa am aktung ah m’cümhnah ah a pek vai.

³⁰ Cun cu ei-douthak ah amät ah kut awn a law püi vai. Ani naw seime ah a thau cu amakaw mah ah law püi ne, Bawipa am aktung ah m’cümhnah ah a pek vai.

³¹ Taigü naw a thau cu sonkiang khan ah am khih vai, cun ung phi amakaw cu taigü gui naw ami khäm vai.

³² Seime ah akpat täng a khaw cu aktung pi pektak ah

³³ asi la a thau hmuhchum-douthak pek ciah taigü am pek vai.

³⁴ Seime ah amakaw cu aktung m’cümhnah ah, akpat täng a khaw cu aktung pektak ah, Bawipa naw Israel chang gui ah la neta, taigü gui am pe gui ci. Shin cu Israel chang gui naw Taigü gui am lawk ciah akhin päng ung, ami pek vai ah kyak ci.

³⁵ Shin cu Aaron la a hta gui taigü gui ah kyak khai gui ah phyuhtheh gui hnüüp ung Bawipa am ei-douthak amshah ah kyak ci.

³⁶ Israel chang gui naw shin ah douthak amshah cu, ngami am ami pek gui vai ah, cu hnüüp ung Bawipa naw thumkhän gui ci. Shin cu Israel chang gui naw lawk ciah a khin avan ung ami läk vai ah thungyo ah kyak ci.

³⁷ Shin gui cu m’khih ne douthak, htang-douthak, katphyawn-douthak, thunghba nak-douthak, phyuhtheh douthak, hmuhchum-douthak nak ah thungyo gui ah kyak ci.

³⁸ Shin cu bungpuk, Sinai M’htung khan ah, Bawipa naw Moses am a pek ah thumkhän gui ah kyak ci. Cun cu Israel chang gui naw douthak nak ami bi vai ah am thein nak gui ah hnüüp ung ah kyak ci.