TAIGÜTHUM 6 - Cho Bible Common Language 2016

¹ Bawipa naw shin ah thungyo gui cu Moses am pek ci.

² Chang tumat naw Bawipa hnungtuk püi ne katnak a bi ah a kyak ung, douthak nak abi vai. A Israel chang paw naw anawng tu shüt kä pe ba ci naw, ani ah khawh m’guk pek ci naw, m’hleeihlak ci naw,

³ chük ciah khawh ah phäh ah kä ka hmuk ci, cine, hleeihlak ne ng’taam ciah chang naw,

^4-5 chang tumat cu shin gui ungka, tumat mat a kat ah a kyak ung, ani naw kä düng nak awn a gah phung cu, a pek ba vai. Ani cheishoh ciah ang hmat hnüüp ung, kaa nak ciam avan a pek ba vai, cun kawn ah bum hma ung bum ät awn am khah vai.

⁶ Ani naw thungba nak douthak ah Bawipa am pek vai ah kä kheihlik ciah htome baw, me baw ak hla cu, taigüpa ah a law püi vai. Cun cu aküikyang ah a phu ami k’bäi ah kyak khai.

⁷ Taigüpa naw chang ah katnak ah phäh ah khawihnah nak a douthak vai, cun ung ani cu m’geinsei nak gah khai.

Avan M’khih ne Khawihnah

⁸ Bawipa naw Moses am thumkhän a pek cu,

⁹ m’khih ne douthak nak ah mawng shin ah thungyo gui cu, Aaron la a hta gui am na pek vai, m’khih ne douthak nak cu khomü pum ung sonkiang khan ung tha vai, mei phi acun ui lä khai ah m’khih vai.

¹⁰ Cun kawn ah taigü naw linen suinu sui ne, linen k’chi sa neta, sonkiang khan ung situi ah ng’shüi ciah m’vut cu heng ne sonkiang ah ang leng ung a tha vai.

¹¹ Cun kawn ah ani naw a suisak ng’thong neta, m’vut cu la ne Phung ah k’pung ah atheingcim nak ah hmun ung a tha vai.

¹² Sonkiang khan ah mei cu a uih lä vai, kä a sih phung en vai. A khawngawi tä sei taigü naw mei ung sing am sui ba vai. M’khih ne douthak nak cu a bi vai. Hmuhchum douthak nak ah a thau am khih vai.

¹³ Sonkiang khan ah mei cu angtäi sei ui khai, kä si phung khai.

Htang-Douthak nak

¹⁴ Shin gui cu htang douthak nak ah thungyo gui ah kyak ci. Aaron taigüpa gui naw Bawipa am htang douthak nak cu sonkiang ah ma täng ung ami bi vai.

¹⁵ Ani naw m’htut den shum ät la situi cu la ne, tui ng’ui awn sonkiang khan ah m’khih ci, cun cu Bawipa am avan douthak ah bi ah kyak ci. Cun ah douthak ah ang ui cu Bawipa naw yeikyai nak ci.

^16-17 Ak pawih ba cu taigü gui naw ei ci gui. Cun cu k’caw kä shum ah ng’shai ah m’htut ah kyak ci. Bawipa ah om nak a hlüng nak ah Phung ung ei ci gui. Ei douthak nak ah angpai ah Bawipa naw taigü gui am a pek gui ah kyak ci. Cun cu ang htei ah theingcim ci, kat phyawn-douthak nak la thungba nak douthak ah mäih ah kyak ci.

¹⁸ Angtäi sei Aaron ah ng’shon pami cu law ne, Bawipa am douthak ah ei, ngami ah chaw phung cu ei ci. Ei-douthak nak tawn ciah chang phung cu ani ah theingcim nak ah huham naw nat sak khai.

¹⁹ Bawipa naw Moses am shin ah thungyo gui a pek cu

²⁰ Aaron tuu taigüpa gui phyuh theh nak vai ah hmawk ah kyak ci. Ani phyuh theh vai hnüüp ung, ani naw htang k’den apie pe ne Bawipa am douthak nak abi vai. Cun cu a hnüp tä htang douthak nak bi chü ah kyak ci. Khawngawi ah amshah, mühun ah amshah ah kyak ci.

²¹ Cun cu situi awn k’caw vai, m’sii k’am ung shon vai, cun kawn ah chem neta, htang douthak ah pek vai. Ang ui cu Bawipa naw yeikyai nak ci.

²² Lawk ciah akhin avan ung shin ah douthak nak cu taigütung ah kiane, bii bik ciah Aaron ah htangshon päng ah bi ah kyak ci. Cun cu Bawipa am khawihnah nak ah kyasei avan m’khih yawp vai.

²³ Taigü naw a bi ah htang douthak nak cu api ah phi kä ei vai, avan m’khih vai.

Katphyawn-Douthak nak

²⁴ Bawipa naw Moses am thumkhän a pek cu,

²⁵ Aaron la a hta gui am katphyawn-douthak nak ah phäh ah shin ah thungyo gui na pek vai. Katphyawn douthak nak ah seime cu sonkiang ah alu täng ah ngawn vai. Cun cu m’khih ne douthak nak ah seime gui ngawn nak ung ah kyak ci. Shin cu ang htei ah theingcim ciah douthak ah kyak ci.

²⁶ Seime awn khawihnah ciah taigü naw cun cu a theingcim nak ung a ei vai. Cun cu a hlüng nak ah Phung, Bawipa ah om nak ung ah kyak ci.

²⁷ A u phi, a i phi, seime ah asa tawn ci phung cu, acun ah theingcim nak huham naw nat sak khai. Seime ah si naw ang peh ah suisak ungka phung cu a theingcim nak ung m’suu ba vai.

²⁸ A sa shon nak ah m’dek am phung cu, sheiuh vai, m’sii k’am ah a kyak ung tui awn k’tuh ne m’si ba vai.

²⁹ Shin ah douthak ah ei cu taigü kyong pami gui naw ami ei vai. Cun cu ang htei ah theingcim ci.

³⁰ Avaisü ah asi api cu Phung ah kyong ah law püi ne, katnak nawt heng nak ah mang ah a kyak ung, cun ah seime cu kä ei vai, mei awn m’khih vai.