TAIGÜTHUM 5 - Cho Bible Common Language 2016

Katphyawn-Douthak nak Hlü ah Mawng gui

¹ Katphyawn-douthak nak gui cu aka ah a mawng ma gui ung hlü ci. Chang tumat cu yung ah saksi khai ah k’thäh u khäta, a hmuh ang yak ah mawng cu kä pyen ne a om ah a kyak ung, acun ah akat nak cu amät naw chaw nak khai.

² Chang tumat naw kä ngaih-tüh ah kä theingcim ciah khisa aksi a tawn ah a kyak ung, ani cu kä theingcim ciah kyak ci, cun bik ciah a hmat vai am ani cu cheishoh ciah kyak ci.

³ Chang tumat naw kä ngaih-tüh ah kä theingcim ciah chang ah shämtawng a tawn ah a kyak ung, a i ah a kyak ung phi, cun bik ciah a hmat vai am ani cu cheishoh ciah kyak ci.

⁴ Chang tumat cu kä ngaih nak ah ang taam ah a kyak ung, a i ah mawng ah a kyak ung phi, cun bik ciah a hmat vai am ani cu cheishoh ciah kyak ci.

⁵ Chang tumat cu a cheishoh ah a kyak ung a katnak cu ang paa vai.

⁶ Akatnak a gei nak vai ah htome ak khik baw, me baw Bawipa am douthak vai ah a law püi vai. Taigü naw cun ah chang ah katnak ah phäh ah khawihnah ne douthak pek khai.

⁷ Cun ah chang naw htome baw, me baw kä am hnüt hlawt ah a kyak ung, ani naw akatnak ah phäh ah Bawipa am a pek vai ah, müm kha hnih, käcung mümhta hnih a law püi vai. Tumat cu katphyawn ne douthak nak ah kyak khai, tumat cu m’khih ne douthak vai ah kyak khai.

⁸ Ani naw taigü am a thak law vai, taigü naw katphyawn douthak nak ah cun ah kha cu, douthak ma khai. Ani naw alu kä ci pit en nah ak hnü ten pit khai.

⁹ Asi amshah cu sonkiang ah hnungtuk täng ah k’peh khai. Pawih ba ciah asi cu sonkiang ah kung ung a huk vai. Shin cu katnak nawt heng nak ah douthak nak ah kyak ci.

¹⁰ Cun kawn ah a hnih nak ah kha cu m’khih ne douthak ah a douthak vai. Cun cu thungyo ah ciah bi ah kyak ci. A shicha ah taigü naw katnak bik ciah chang ah phäh ah khawihnah douthak khai, ani cu m’geinsei nak gah khai.

¹¹ Cun ah chang naw mümkha hnih, käcung mümhta hnih kä am hnüt hning ah a kyak ung, katphyawn douthak nak ah, m’htut den a pie a law püi vai. Cun cu oliv situi awn phi kä shawi vai, ang ui phi kä shum vai, a i ah kyasei ci ung cun cu katphyawn-douthak nak ah kyak ci, htang douthak nak ah kä kyak ci.

¹² Ani naw taigüpa ah a law püi vai, taigüpa naw m’hnüt nak ah shum ät a lak vai, cun cu avan Bawipa am douthak ah kyak ci, ani naw cun cu sonkiang ung ei-douthak ah am khih vai. Cun cu katnak nawt heng nak ah douthak ah kyak ci.

¹³ A shicha ah taigüpa naw chang ah katnak ah phäh ah khawihnah nak douthak khai, cun ung ani cu m’geinsei nak gah khai. Pawih ba ciah m’htut den cu taigüpa naw yawk khai, cun cu htang douthak nak ah kyak ci.

Thungba nak Douthak nak

¹⁴ Bawipa naw shin ah thungyo gui cu Moses am pek ci.

¹⁵ Chang tumat naw kä ngaih-tüh ah Bawipa am pek vai ah ak theing cu a pek vai a häu ah a kyak ung, ani naw thungba nak douthak nak ah kä kheihlik ciah htome baw, me baw ak hla a law püi vai. Cun cu aküikyang ah a phu ami k’bäi ah kyak ci.

¹⁶ Ani naw am häu ah phäh ah a thung ba kawn ah bum hma ung bum ät awn a khap vai, cun cu taigüpa am a pek vai. Cun kawn ah taigüpa naw cun ah chang ah kat ah phäh ah seime awn khawihnah nak a douthak vai, cun ung ani cu m’geinsei nak gah khai.

¹⁷ Chang tumat naw kä ngaih-tüh ah Bawipa ah thumkhän tumat mat m’shet ne a kat ah a kyak ung, ani cu cheishoh ciah kyak ci. Ani naw a kat ah phäh ah a pek vai kyak ci.

¹⁸ Ani naw kä kheihlik ciah htome hla baw, me hla baw, thungba nak douthak ah taigüpa am a thak law vai. Cun ah a phu cu akükyang ah ami k’bäi ah kyak ci. Taigüpa naw katnak ah phäh ah khawihnah nak cu douthak khai, cun cu chang naw kä ngaih-tüh ah a katnak ah kyak ci, ani cu m’geinsei nak gah khai.

¹⁹ Shin cu chang naw Bawipa hnungtuk püi ne a katnak thungba nak douthak nak ah kyak ci.