TAIGÜTHUM 4 - Cho Bible Common Language 2016

Acapka ah Katnak ah Phäh ah Douthak

¹ Bawipa naw Moses ang thumkhän ci,

² cun cu Israel chang gui am am thein gui vai ah kyak ci. Chan tumat naw acapka ah Bawipa ah thumkhän cu kat na ne, m’shet ne a kyak ung shin ah thung gui cu a läk vai.

³ Taigütung naw katnak bi ne, chang ah khan ah a shetkat ah a kyak ung, kä kheihlik en ciah seipat anong a pek vai. Akat ah phäh ah Bawipa a khawihnah ah kyak khai.

⁴ Ani naw Phung ung luhnak ung vantang cu law püi neta, alu khan ah a kut taih ne, Bawipa ah ma ah acun ung a ngawn vai.

⁵ Cun kawn ah taigütung naw vantang ah si cu la ne, Phung ah kyong ah a law püi vai.

⁶ Ani naw a kutpyün gui cu cun ah si ung yuk phum neta, theing ciah yihdung ah ma ung chih vei ak peh vai.

⁷ Ani naw Phung ah kyong ah m’khih nak ah ng’ui ciah sonkiang ah akit gui ah alawi gui ung cun ah si awn a mek vai. Phung ung valuh nak ah m’khih ne khawihnah nak ah sonkiang ah akung ung pawih ba ciah si cu ak peh vai.

⁸ Cun ah vantang ungka a thau avan a lak vai, ak chi kyong ah a thau gui,

⁹ amke la acun ung a thau gui, amsin ung aknipi gui a lak vai.

¹⁰ Taigüpa naw a thau cu la neta, m’khih ne douthak nak ah ami mang ah sonkiang ung am khih vai. Hmuhchum-douthak ah sei ngawn ung a thau ami bi ah mäih ah a bi vai.

¹¹ Cun ung phi avun, amci avan, alu, a khaw gui, a chi khawn mah ah a puk kyong ungka gui cu la neta,

¹² Phung ah akpung ah hteh püi ne, m’vut huk nak vai ah ami sei pyan nak ung, sing hnawn ah khan ah taih neta mei awn am khih vai.

¹³ Israel a pahta pum naw katnak bi ne, kä ngaih-tüh ah Bawipa ah thumkhän cu m’shet u khäta,

¹⁴ kä shou pha sei katnak cu ang hmat ah a kyak ung, a pahta ng’khä naw kat-douthak nak ah vantang hta cu ami law püi vai. Ngami naw Bawipa ah om nak ah Phung ung ami law püi vai.

¹⁵ Ami pahta ung ang vai gui naw vantang ah lu ah khan ah ami kut taih u neta, a cun ung ami ngawn vai.

¹⁶ Taigütung naw vantang ah si amshah cu Phung ah kyong ah a law püi vai,

¹⁷ acun ung a kutpyün yuk phum neta, yihdung ah ma ung chih vei ak peh vai.

¹⁸ Ani naw Phung ah kyong ah ang ui douthak nak sonkiang ah aki gui ah alawi gui ung cun ah si cu a mek vai. Pawih ba ciah si cu m’khih khawihnah nak ah sonkiang ah kung ung ani naw a shawi vai, cun cu Phung ung luh nak ung om ci.

¹⁹ Cun kawn ah ani naw a thau avan la neta, sonkiang ung am khih vai.

²⁰ Ani naw katnak-douthak nak abi ah mäih ah a shin ah vantang awn bik khai, a shin ah mäih ah chang gui ah katnak ah phäh ah ani naw khawihnah nak cu bik khai, ngami cu m’geinsei nak gah khai gui.

²¹ Cun kawn ah ani naw vantang cu Phung ah k’pung ah hteh püi neta, m’khih khai, cun cu amät ah katnak ah phäh ah douthak ah vantang am khih ah mäih ah kyak ci. Shin cu chang akda ang bum ah katnak nawt heng khai ah douthak nak ah kyak ci.

²² Avaisü ah uktu tumat cu katnak bi ne, kä ngaih-tüh ah Bawipa ah thumkhän tumat cu m’shet ne,

²³ ani ah cuun ngaih nak cu katnak ah a kyak ah a kyak ung ani naw a douthak vai ah kä kheihlik ciah me akhla cu a law püi vai.

²⁴ Ani naw acun ah lu ah khan ah a kut taih neta, sonkiang ah a lu täng ung a ngawn vai. Cun cu m’khih ne douthak nak ah seime gui ami ngawn nak ah kyak ci. Shin cu katnak nawt heng nak ah douthak nak ah kyak ci.

²⁵ Taigü naw a kutpyün gui cu a cun ah me ah si ung yuk phum neta, sonkiang ah akit gui ah alawi gui ung yuk mek ne, pawih ba cicu sonkiang ah a kung ung a shawi vai.

²⁶ Cun kawn ah ani naw a thau avan cu sonkiang ah khan ah am khih vai. Cun cu hmuhchum-douthak nak ah seime ah thau am khih ah mäih ah kyak ci. A shicha ah taigüpa naw uktu ah katnak ah phäh ah khawihnah nak cu a douthak vai. Ani cu m’geinsei nak gah khai.

²⁷ Avaisü ah chang düt tumat naw kä ngaih-tüh ah katnak bi ne, Bawipa ah thumkhän tumat am shet ah a kyak ung,

²⁸ ani ah cuun ngaih nak cu katnak ah a kyak ah a kyak ung ani naw a douthak vai ah kä kheihlik ciah me akhik cu a law püi vai.

²⁹ Ani naw cun ah khan ah a kut taih neta, sonkiang ah alu täng ah a ngawn vai, cun cu m’khih ne douthak nak vai ah seime gui ami ngawn nak ah kyak ci.

³⁰ Taigüpa naw acun ah me ah si ung a kutpyün yuk phum neta, sonkiang akit gui ah alawi gui ung a hluk vai. Ak pawih cu sonkiang ah akung ah a huk vai.

³¹ Hmuhchum-douthak nak ah ngawn ah me ah thau lawh ah mäih ah cun ah thau avan a lawh vai, cun kawn ah ani naw sonkiang ung am khih vai. Cun ah kyasei cun ah ng’ui naw Bawipa cu yei sak ci. A shicha ah taigüpa naw chang ah katnak ah phäh ah khawihnah nak cu douthak sei, ani cu m’geinsei nak gah khai.

³² Chang tumat naw katnak ah phäh ah douthak vai ah htome a law püi ah a kyak ung kä kheihlik ciah akhik ah kyak khai.

³³ Acun ah khan ah ani naw a kut taih neta, sonkiang ah alu täng ah a ngawn vai, cun cu m’khih ne douthak nak ah seime gui ngawn nak ah kyak ci.

³⁴ Taigüpa naw htome ah si ung a kutpyün yuk phum neta, sonkiang ah akit gui ah alawi gui ung a hluk vai, pawih ba cicu sonkiang ah kung ah a huk vai.

³⁵ Hmuhchum-douthak nak ah htome ah thau lak ah mäih ah ani naw cun ah thau avan cu a lak vai. Bawipa am pek ah ei-douthak nak ah sonkiang awn ng’däih khai ah am khih vai. Ashicha ah taigüpa naw chang ah katnak ah phäh ah khawihnah nak cu a douthak vai, ani cu m’geinsei nak gah khai.