TAIGÜTHUM 3 - Cho Bible Common Language 2016

Hmuhchum-Douthak nak

¹ Chang tumat naw a sei cu hmuhchum-douthak nak ah a law püi ah a kyak ung api ah phi kä kheihlik en ciah sei, vantang ah kyak khai.

² Cun ah chang naw sei ah lu k’khan ah a kut taih neta, Bawipa ah om nak Phung valuh nak m’kawt ung a ngawn vai. Aaron tuu taigüpa gui naw asi cu sonkiang ah hnu akit phli ung ami k’peh vai.

³ Cun kawn ah sei ah asa gui cu ei-douthak ah Bawipa am ami pek vai. A chi kyong ung a thau avan,

⁴ amke la cun ung a thau gui, amsin ungka akni pi gui,

⁵ Cun gui cu m’khih ne douthak nak gui awn a täng ah sonkiang khan ah taigüpa gui naw ami m’khih vai. Cun ah ei-douthak ah ang ui cu Bawipa naw yei nak ci.

⁶ Me baw, htome baw hmuhchum douthak nak ah mang vai a kyak ung, akhik phi bäi, ak hla phi bäi khai, cun ung phi kä kheihlik en khai.

⁷ Chang naw htome a douthak vai ung,

⁸ htome ah lu khan ah a kut taih neta, Phung ah düma ah a ngawn vai. Taigü gui naw asi cu sonkiang ah akit phli avan ung ami k’peh vai.

⁹ Ashin gui cu ei-douthak ah Bawipa am ami pek vai: athau, ak htüng guh ung m’chün ah ang mei kyäng, a chi kyong ah om ciah a thau avan,

¹⁰ amke gui la acun ung a thau gui, amsin ungka akni pi,

¹¹ Shin gui avan cu Bawipa am ei-douthak ah sonkiang ah khan ah taigü bawi naw am khih vai.

¹² Chang naw me a douthak law ah a kyak ung,

¹³ me ah khan ah a kut taih neta, Phung ah düma ah a ngawn vai. Taigüpa gui naw asi cu sonkiang ah akit phli avan ung k’peh khai gui.

¹⁴ Ashin gui cu ei-douthak ah Bawipa am ami pek vai; a chi kyong ah a thau avan,

¹⁵ amke gui la cun ung a thau gui, amsin ungka akni pi,

¹⁶ Bawipa naw a yeikyai nak ah ei-douthak ah shin gui avan cu sonkiang ung taigüpa naw am khih vai. Athau avan cu Bawipa naw khäm ci.

¹⁷ Athau la asi cu a u Israel chang naw phi kä a ei en vai. Cun cu Israel chang phung naw ami om nak päng ah angtäi sei ami k’pan vai ah thungyo ah kyak ci.