TAIGÜTHUM 27 - Cho Bible Common Language 2016

Bawipa M’cümhnah nak ah mawng Thukhän gui

¹ Bawipa naw Moses am,

² shin ah thungyo gui cu Israel chang gui ah phäh ah pek ci. Chang tumat naw aktung ah shaitak a küm be sak nak ah Bawipa am a pek ah a kyak ung, ak ka ung k’bäi gui ah ngui a pek nak awn cun ah chang cu phyawng hning khai,

^3-7 Aküikyang ah m’hnüt bäi nak cu: — pami ng’vai kum ku ungka naw chukip: ngui pit 50, — hnumi ng’vai: ngui pit 30, — pami nong kum 5 ungka naw kum 20 ngui pit 20, — hnumi nong ngui pit 10 — a hmaw hta pami kum 5 ah kaa ngui pit 5 — a hmaw hta hnumi ngui pit 3 — pami a kum 60 ah däm ci ngui pit 15 — hnumi kum 60 ah däm ci ngui pit 10

⁸ Shaitak bik ciah chang cu dukhaih aih ne m’hnütbäi ah phu kä ah pek hning ah a kyak ung acun ah chang cu taigü ah hteh püi vai, taigü naw ang neim pi ah k’bäi ne pek khai ah chang ah aci ah bik khai.

⁹ Shaitak nak cu seime ah a kyak ung cun cu a Bawipa naw a dou thei vai ah douthak ah kyak khai, Bawipa am m’cümhnah vai phung cu theingthap ci.

¹⁰ Shaitak bik ciah chang naw seime a hei awn kä am thawng ba vai. Am thawng ba ah a kyak ung ani nik hnih cu Bawipa ah kaa ah kyak khai.

¹¹ Shaitak nak cu kä theingthap ciah seime ah a kyak ung cun cu a Bawipa ah dou thei vai ah douthak ah ka kyak ci kyasei cun ah chang naw seime cu taigü ah a hteh püi vai.

¹² Taigü naw cun cu ani a kat ah ciah a phu k’bäi khai, a phu cu a cun ah kyak khai.

¹³ Cun ah chang naw cun cu a hleih tuba hlü ah a kyak ung a phu ah khan ah bum hma ung bum ät awn am khah vai.

¹⁴ Chang tumat naw a im cu Bawipa am a ap ah a kyak ung a ni la a kat teng neta taigü naw a phu cu k’bäi khai, cun cu a phu ah kyak khai.

¹⁵ Im ap ciah chang tumat naw im cu ak khleih tuba hlü ah a kyak ung im ah a phu ah khan ung bum hma bum ät awn m’khah ne a peik vai.

¹⁶ Chang tumat naw a kholo cu Bawipa am a ap ah a kyak ung m’shi a i chü, ang shaw cu khei neta, a phu cu k’bäi vai, htang pye m’ku cu ngui k’cang phe gha phu nak ciah m’hnüt vai.

¹⁷ Ani naw a lolai cu am thawh ba nak ah kum ang pyi vai ama pek ah a kyak ung cun cu a phu k’be phu nak khai.

¹⁸ Ani naw a kawn ah a ap ah a kyak ung M’thawh Banak ah a hneng Kum ung khüt ciah khokum khei neta, taigü naw tuhbäi a phu cu akbäi shüm vai, a phu yuk cha ne akbäi vai.

¹⁹ Lolai ap ciah chang naw ak khleih tuba hlü ah a kyak ung a phu lüng ah khan ah bum hma bum ät awn am khah vai.

²⁰ Ani naw Bawipa ah kä khleih tuba cang ah chang tumat mat ah a yoih ba ah a kyak ung, ani naw ak khleih tuba nak hning vai cu häu ciah kyak ci.

²¹ M’thawh Banak ah a hneng Kum a gawk law ah a kyak ung cun ah lolai cu Bawipa naw a khäm ah khawh ah kya lawk ci. Cun cu taigü gui naw ami khäm vai.

²² Chang tumat naw amät naw ak khleih ah lolai cu Bawipa am a ap ah a kyak ung,

²³ M’thawh Banak ah hneng Kum ung khüt khai ah khokum gui cu khei neta, taigü naw a phu cu akbäi vai. Cun ah hnüüp ung cun ah chang naw a phu cu a pek kheng geng vai, ngui cu Bawipa ah khäm ah kyak ci.

²⁴ M’thawh Banak Kum a gawk law ung lolai cu ak htük ungka nak ci am baw, a hta nau am baw pek ba vai.

²⁵ A phu avan cu a küikyang ah m’hnütbai nak awn, ng’müi khai ah k’bäi vai.

²⁶ Seime gui ah a hta htük gui cu Bawipa naw a khäm pyi ah kyasei, ng’päi ye nak douthak ah a u naw kä ap hning ci, seipat hta, htome hta, me hta gui cu Bawipa ah a khäm ah kyak ci.

²⁷ Cun ung phi kä theingthap ciah seime ah a hta htük gui cu, a küikyang ah m’hnüt ah a phu lüng ah khan ah bum hma bum ät m’taih ne ak khleih ba vai. Kä a khleih tuba ah a kyak ung, a phu k’bäi ah mäih ah chang a hei ah yoih vai.

²⁸ Bawipa am yum nak awn a ap phung cu a u naw kä yoi hning ci. Kä khleih ba hning ci. Cun cu chang ah a kyak ung phi, seime ah a kliak ung phi, lolai ah a kyak ung phi, cun cu Bawipa naw angdäih ah a khäm pyi ah kyak ci.

²⁹ Chang ah a kyak ung phi yum nak awn ap pyi cu kä khleih ba vai, ani cu ngawn vai.

³⁰ Lolai ung m’thawk ci avan ungka bum gha bum ät cu htang ah a kyak ung phi, sing m’theih ah a kyak ung phi Bawipa ah kaa ah kyak ci.

³¹ Chang tumat mat naw cun gui ungka a khleih tuba hlü ah a kyak ung a phu lüng ah khan ah bum hma ung bum ät m’taih ne ak khleih tuba vai.

³² Vuhchah gha a law päng ung tumat cu Bawipa ah kaa ah kyak ci. Seime gui khei law ah a kyak ung, a gha nak tumat päng cu Bawipa ah kaa ah kyak ci.

³³ Kaa nak ci naw seime gui cu kä a ghü en vai. A shekha seime gui cu kä ghü vai, ani naw a i phi kä m’thawng hlai hning ci. Seime tumat cu a hei tumat awn am thawng ba ah a kyak ung, ani nik hnih cu Bawipa kaa ah kyak khai. A i phi kä khleih tuba hning khai.

³⁴ Shin cu Bawipa naw Moses am Sinai M’htung khan ah Israel chang gui ah hmawk ah a pek ah thumkhän gui ah kyak ci.