TAIGÜTHUM 26 - Cho Bible Common Language 2016

Läk ci gui ah Phäh ah Hrilham

¹ Agup, amüi, lungtung, lungpawng gui cu, khawihnah vai ah kä nami pyan vai, kei cu Bawipa nami na Khanpughi nei.

² Yum nak pawi gui cu nami bi kheng geng vai, kei nami na khawihnah nak ah hmun cu, nami m’tamkhah vai, kei cu Bawipa nei.

³ “Nangmi cu kei ah thukhän ah mäih om u ne, ka thumkhän nami läk ah a kyak ung,

⁴ kei naw amät ah khin ung khaw ka aa sak khai, cun ung khonglei ung geit m’thawk khai, sing ghing gui cu m’theih khai gui.

⁵ Nami geit cu da aih sei, sing theih akni k’bih vai güt ung htang nami khäm khai, m’shi shaw vai güt ung sing theih akni nami bit khai. Nami ei hlü phung avan nangmi ung om khai, nangmi cu nami khaw ung phyawng gai ne nami om khai.

⁶ “Nami khaw ung kei naw dimdeeih nak ka ning pe gui khai, nangmi cu a i phi kä kyihkyawk ne nami ip khai. Cun ah khaw ung khisa ah ga ung ka ning phyawn gui khai, cun ah khaw ung ng’tuk nak kä om ba khai.

⁷ Nangmi cu nami ga gui ah khan ah nami näng khai,

⁸ nangmi chang hma naw chang phia nami m’khüt khai, chang phya naw chang phia phia nami m’khüt khai.

⁹ Kei naw hrilham ning pe gui ne nami hta akda ka ning pe gui khai; nangmi awn ka bi ah thukhän, kei täng ung ka cu, kei naw ka k’pang khai.

¹⁰ Nami geit khäm cu da aih khai, kum ät ung ng’büh ne pawih khai, nangmi naw pawih ciah geit phyim cu huk u ne, geit thai nami m’sep khai.

¹¹ Kei cu theing ciah Phung kyong ung nami ng’lung ah ka om khai, kei cu nangmi ungka a hei ah kä ka hteit phung khai.

¹² Kei cu nangmi awn a täng ah ka om khai; kei cu nami Khanpughi ah ka kyak khai, nangmi cu kei ah chang ah nami kyak khai.

¹³ Kei, Bawipa nami Khanpughi naw, Egypt khaw ungka ka ning law püi ba gui ci, cun ah kyasei nangmi cu changshäm ah kä nami kya ba khai. Kei naw ning yung kyak sak ciah huham cu ka cheiuh pyi ci, kei naw nami lu häng khai ah ka ning hteh sak gui khai.

Thu Kä Ngaih ah Phäh ah M’kyuk nak

¹⁴ Bawipa naw, “Kei ah ka thumkhän kä nami läk ah a kyak ung, m’kyuk nak nami gah khai.

¹⁵ Nangmi naw kei ah ka thukhän la ka thumkhän gui maa na u ne, nangmi awn thukhän ka bi nami m’shet ah a kyak ung,

¹⁶ kei naw ka ning m’kyuk gui khai. Kei naw nami khan ah leigai ka law püi khai. Kä m’htei hlawt vai ah katnak, gawpai nak gui; a cun gui naw nami mik m’dauh sak khai, nami ghin nak kholä sak khai. Nangmi naw m’shi nami geit khai, cun ung phi cun naw kä ning ni sak gui khai, a i ah kyasei ci ung nami ga gui naw ning näng gui u ne, nami geit phi ei yawp khai gui.

¹⁷ Kei naw ng’hlat ne ka ning hnungtuk püi gui khai, cun ung ning hnim gui khai gui, nangmi ning thüi na gui ci naw ning uk gui khai, nangmi cu nami kyikyawk aih khai, a u naw kä a ning gawt gui ung phi nami dawng khai.

¹⁸ “Shin gui avan kya güt sei, nangmi naw kei kä nami na läk ah a kyak ung, kei naw ka ning m’kyuk nak gui cu ak chih ah ka m’däm khai.

¹⁹ Kei naw chang ah nami ng’shei nak cu ka m’shet khai; khaw kä aa khai, nami khonglei cu chawng ne m’sii ah mäih ah guh khai.

²⁰ K’tha na ne nami bi gui avan naw kä akni ah ning ci ba gui khai, a i ah kyasei ci ung nami khonglei naw geit kä m’thawk ba khai, sing ghing gui kä m’theih ba khai gui.

²¹ “Cun güt ung phi nangmi cu ng’lüm lä u ne, kei na läk vai ah nami maa ah a kyak ung, kei naw ka ning m’kyuk nak gui cu ak chih ah ka han m’däm ba mä khai.

²² Nami ng’lung ah kyih she ciah khisa cu kei naw ka tüi lawk khai, a cun gui naw nami hta gui lo u ne, nami vuhchah gui m’di khai gui, api hta bäng ning pawih na gui khai, nami lam gui cu ng’gau khai.

²³ Shin ah m’kyuk nak gui a gawk law kawn ung phi kei kä na mi na ngaih ah a kyak ung, kä nami na läk ah a kyak ung,

²⁴ Kei cu nangmi ah khan ah ng’hlat law ba ne, ayan ka ah tah ak chih ah nui tuba khai ah ka ning m’kyuk gui khai.

²⁵ Mi thukhän nami m’shet ah phäh ah ning m’kyuk gui khai ah ng’tuk nak kei naw ka law püi khai, nangmi cu nami mang gaw kyong ah phyawng ne nami ng’bum ba ah a kyak ung, kei naw nami ng’lung ah kä m’htei hlawt vai ah natnak ka tüi lawk khai. Nami ga gui ah ma ah nami kut nami chah khai ah ning k’ceet gui khai gui.

²⁶ Kei naw nami ei awk vai cu ka ning tukpit pe gui khai, cun ah kyasei hnumi gha naw ngami ung om ciah m’htut avan ami ng’shai nak vai ah meibum tumat bäng hlü khai gui. Ngami naw nän ne tei khai gui, cun avan nami ei yawp kawn ah phi nangmi cu nami cawi ba lä khai.

²⁷ Shin gui avan a kyak kawn ung phi kei nami na maa lä ung, kei na läk vai ah nami maa lä ung,

²⁸ kei naw m’lungshe nak awn nangmi ah khan ah ng’hlat law ne, ayan ä kaa ah tah, ak chih ah ka pi khai ah ka ning m’kyuk gui khai.

²⁹ Nami cawi nak cu nui aih khätah nami mät ah hta hmaw gui phi nami ei khai.

³⁰ M’htung khan ung nami khawihnah nak ah hmun gui cu kei naw ka m’di khai, ang ui sonkiang gui cu ka gäi khai, sik ciah nami pumsa gui cu kyu ne ng’yän ciah nami ka, a gup gui ah khan ah ka yuk ghawt khai, kä ni aih ciah a kyong ah,

³¹ Nami mang gaw gui cu di nak ung ka ng’hlah sak khai, nami khawihnah nak ah hmun gui cu ka m’di khai, nami khawihnah nak gui cu kä dou ne ka mak khai.

³² Kei naw nami khaw cu ng’pyi khai ah ka m’di khai, cun ung om ciah ga gui cu cun ah dishum nak hmu neta ng’thüng khai gui.

³³ Kei naw nami khan ah ng’tuk nak law püi ne, a khawhei yung ah ka ning püi sak gui khai. Nami khonglei cu ng’gau khai, nami mang gaw gui cu dishum khai.

^34-35 Cun kawn ah khonglei cu akbe ah ang düm ah phäh ah yei khai, cun cu nangmi ah pek ah kä kyak ci, khonglei cu ng’yän ne om khai, ng’düm khai, cun yah ung nangmi cu ga gui ah khaw ah omktu ah kya ne nami om tuk khai.

³⁶ “Kei naw omktu khaw ah nami om tuk ci gui cu ang htei ah ka ning kyihkyawk sak gui khai. Khaw khi sei sing hnah a hnün hngaw ung nami dawng khai, nami pei ah ga kä om sei phi nami ng’täng khai.

³⁷ A u naw kä a ning gawt gui ung phi tumat ah khan ah tumat nami ng’goot khai. Nangmi naw a i ga gui phi kä nami tu tuba hlawt khai.

³⁸ Nangmi cu omktu khaw ah nami sik khai, nami ga gui ah khonglei naw ning m’yaw gui khai.

³⁹ Nangmi ungka nami ga gui ah khaw ung api pawih ba ci gui cu akholä ah kyak khai, cun cu nami mät ah katnak la nami pupu gui ah katnak ah phäh ah kyak khai.

⁴⁰ “Cun ung nami htangshon gui naw ami katnak la ami pupa gui ah katnak cu ng’yu ba khai gui, cun ah pupa gui cu kei na lüm u ne, na hnungtuk püi ci gui ah kyak ci gui.

⁴¹ Ngami hnungtuk püi gui ne ami ga gui ah khaw ah omktu ah ka tüih gui vai ah na kyak sak ci gui. Ak hnu ah nami htangshon gui cu m’lung neim u ne, ami katnak la ami hnungtuk püi nak ah phäh ah ng’gei nak pe u ne ami kyak ung,

⁴² kei naw Jakob ni, Isaak ni, Abraham ni ung thukhän ka bi cu ka shüm ba khai. Khonglei ka pek gui vai ah ka shaitak cu kei naw ka m’thai ba khai.

⁴³ Ak htük ung, a i ah a kyak ung phi, khonglei naw a chang gui cu heng gui khai, cun ah kyasei ani cu akbe ah ng’düm khai. Cun kawn ah ngami naw ka thukhän gui la ka thumkhän gui ami hnungtuk püi ah phäh ah ng’gei nak akbe pek khai gui.

⁴⁴ Cun tu pang ung phi, ngami cu ami ga gui ah khonglei ung ami om tu yah ung kei naw akbe ah kä ka nawng gui khai, kä ka m’di gui khai. Ngami awn thu ka khän cu a cun naw ng’pyi sak khai, kei cu Bawipa nami Khanpughi ah ka kyak ci.

⁴⁵ Ami pupa gui ung thukhän ka bi cu kei naw ka m’thai ba khai, cun cu Egypt khaw ah ka, ka chang gui law püi ba gui ne, pakhui avan am ka huham ka m’dang nak ah kyak ci. Cun ah kyasei, Kei, Bawipa cu ami Khanpughi ah ka kyak ci.

⁴⁶ Shin cu Sinai M’htung ah Israel chang gui ah hmawk ah Bawipa naw Moses am a pek ah thukhän gui la thumkhän gui avan ah kyak ci.