TAIGÜTHUM 25 - Cho Bible Common Language 2016

Akum Chih nak

¹ Bawipa naw Moses cu Sinai M’htung khan ah ng’thu püi ne, thumkhän a pek cu,

² Shin ah thungyo gui cu Israel chang gui am a pek gui vai ah kyak ci. Bawipa naw a ning pek gui ah khaw ung nami luh law ah a kyak ung, nangmi naw Bawipa m’tamkhah nak ah a kum chih kum päng ung khaw kä nami vawk vai. Kum chuk ung

³ nami lo ung m’shi nami phu vai, nami sapyit lo nami kyan vai, nami geit nami khäm vai.

⁴ Cun ung phi a kum chih nak ah khaw kum ät cu, khaw m’düm nak ah kum ah kyak ci, Bawipa am ap nak ah khaw kum ah kyak ci. Cun ah kum ung nami lo ung m’shi kä nami phu vai, sapyit lo phi kä nami kyan vai.

⁵ A u ah kä phu ah amät pyou ciah htang phung cu kä nami khäm vai. Kä nami kyan nak ung m’theih ciah ak theih gui phi kä nami k’bih vai; cun cu mi khaw akbe ah m’düm nak ah kum ah kyak ci.

⁶ Cun ah khaw kum ah kyong ung khaw cu kä nami chuk vawk pang ung phi, acun naw nangmi ah phäh la nami changshäm gui, nami ghüh gui, nang mi ah om tuk ciah khaw hei chang gui,

⁷ nami vuhchah gui la nami khaw ung om ciah khisa gui avan ah phäh ah ei ning pe gui khai. Cun ah khaw ung m’thawh lawk ci phung cu, ei vai ah kyak khai.

M’thawh Ba nak Kum

⁸ Khaw kum chih cu chih vei khei ung, avan ah ng’dawn ah kum phli kip lei kaw lawk ci.

⁹ Cun kawn ah a cha chih nak ah a hnüüp gha hnüüp cu, bui awt nak ah hnüüp, acun ah hnüüp ung khaw avan ung hteit ne phyungheng tum khai ah chang tumat nami tüih vai.

¹⁰ A cu cha ah nangmi naw a kum hmakip nak cu k’bäi u neta, khaw ung om ci gui avan ah ma ah phyawn nak ah mawng cu nami ng’shäu vai. A cun ah kum ah kyong ung nami yoih tuk ah khawh cham phung cu, ak htük ungka ak ci am, kä cunung, a hta nau am nami pek ba vai. Chang shäm ah kyak khai ah ami yoih ah chang cu, amät ah kyong khui ah a hteh ba vai.

¹¹ Lolai ung kä nami phu shaw ah amät pyou ciah htang phi kä nami khäm vai, kä nami kyan nak ah sapyit lo ung am theih phi kä nami k’bih vai.

¹² A kum pum cu nangmi ah phäh ah ak theing ah kyak khai. Lolai amät naw am thawk law sak gui bäng cu nangmi naw nami ei vai.

¹³ A cun ah khaw kum ah kyong ung yoih tuk ah khawh cham avan cu ak htük ah kaa nak ci am ap ba vai.

¹⁴ Cun ah kyasei nami Israel chang paw ah khawh nami yoih ah a kyak ung, kä cun ung nami hleih ah a kyak ung, kä hmai kiang ne kä nami kyak en vai.

¹⁵ A phu k’bäi vai cu, m’thawh ba nak ah a hngeng kum kä a gawk pha ung, khaw ung geit kaw am thawk nak ah khaw kum gui ah kyak ci.

¹⁶ Khaw kum akda ah a kyak ung a phu hang hlüng khai, khaw kum a ken ah a kyak ung a phu yung neim khai, a i ah kyasei ci ung yoih vai ah khaw cu geitkaw am thawk nak ah ciah a phu kyak ci.

¹⁷ Na Israel chang paw cu kä nami thuvi nak vai, Bawipa nami Khanpughi cu kyih aa ne nami läk vai.

A Kum Chih ak ah Mawng Ng’cuhcan nak

¹⁸ Bawipa ah thukhän gui la thumkhän gui cu avan nami läk vai, cun ung nangmi cu shin ah khaw ung phyawng ne nami om khai.

¹⁹ Khaw ng’lei naw geit gui m’thawk sak khai, nami ei hlü phung avan nangmi ung om khai, nangmi cu phyawng ne nami om khai.

²⁰ Cun ung phi chang amshah naw a kum chih kum ah kyong, a i ei vai aw, a i lo ung phi kä phu shaw ung, a i geit phi kä khäm ung, cine ng’shi hning ci gui.

²¹ Bawipa naw khaw cu a kum chuk kum hrilham k’be khai, cun ah kyasei a cun ah khaw naw kum goi ung ei vai m’thawk sak khai.

²² Akum cheit kum nami lo gui nami phu shaw ba sang ung, a kum chuk kum nami khäm cu nami ei vai om ba lä khai, a cu kum nami phu shaw kä nami khäm pha ah chuih nami ei ng’büh vai phi om ba khai.

Khawh Cham M’thawh Ba nak

²³ Nami khaw cu chang naw a khäm vai ah kä nami yoih vai, a i ah kyasei ci ung cun cu nangmi ah kaa ah kä kyak ci, Khanpughi ah kaa ah kyak ci, nangmi cu shin ah khaw ami bi tu sak ah khaw hei chang ah mäih ah nami kyak ci.

²⁴ Khaw nami yoih ah a kyak ung khaw nak htük ci naw a thon ba vai ah ami ci vai.

²⁵ Israel chang tumat cu dukhaih ne a khaw yoi khai ah a kyak law ung amät ung ng’een pi ci naw ak hleih tu pek vai.

²⁶ Thon tu pek khai ah amätyah kä om ciah chang ah a kyak ung, amät ng’büh mang law ne, a thon nak ba vai a khawh a om law ung, amät naw a thon ba vai.

²⁷ Cun ung ani naw m’thawh ba nak ah a hngeng kum güt khaw kum khei neta, hleih tuk ciam a thung ba vai, cun ung a khaw cu a kaa ah kya ba khai.

²⁸ Cun ung phi ani ung khaw thon nak ba vai kä a om ah a kyak ung, cun ah khaw cu m’thawh ba nak ah a hngeng kum ung khüt sei, khaw thong ciah chang ah kut ung om sä. Acun ah kum ung cun ah khaw cu kaa na htük ciam pek ba vai ah kyak khai nei.

²⁹ Chang tumat naw mang gaw kyong ah om ciah im cu a yoih ah a kyak ung, a yoih nak hnüüp ungka naw kum ät ah kyong ung hleih ba hning ci.

³⁰ Ani naw kum ät ah kyong ung kä a hleih ba hlawt ah a kyak ung, ani naw ak hleih nak tuba nak hning cu ng’pyi khai, cun ah im cu hleih tuba ci la a htangshon ah khawh ah kyak khai. Cun cu m’thawh banak ah kum ung phi pek ba vai kä kyak khai.

³¹ Cun ung phi kä ng’vong ah pigaw gui ung im gui läi cu, lo ah mäih ah kyak ci. Ka nak htük ci naw hleih ba hning ci. M’thawh banak kum ung phi pek ba hning ah kyak ci.

³² Cun ung phi Levit gui läi naw, mang gaw kyong ah om ciah ami khawh cu, a i yah ung phi hleih ba hning ci gui.

³³ Mang gaw tumat ungka im tumat cu Levit naw yoi neta, kä a hleih tuba hlawt ah a kyak ung, M’thawh Banak Kum ung acun ah im cu ani am pek ba vai, a i ah kyasei ci ung, ami mang gaw kyong ah om ciah ami im cu, Israel gui ah ng’lung ah Levit gui ah ng’täi ciah ami khawh ah kyak khai.

³⁴ Cun ung phi Levit mang gaw gui ah ang veing ung om ciah lolai gui cu kä yoih vai, cun cu khaw ng’län ung ngami ah khawh ah kyak khai.

Dukhaih Ciam Pu M’hnih

³⁵ Na pei ah om ciah Israel na chang paw cu, dukhaih law ne amät naw amät kä am htei hlawt ah a kyak ung, na chang ghüh ah mäih ah na pektak vai. Cun ung nang ah pei ah ani cu om tu gäk gäk hning khai.

³⁶ Ani ung ang lawn kä na lak vai, Khanpughi na kyih aa vai, na Israel chang paw cu na pei ah na om sak vai.

³⁷ Ani am ngui nak pu ung ang lawn kä na pek sak vai. Ei na yoih nak ung k’pawih khai ah kä na bi vai.

³⁸ Shin cu Bawipa nami Khanpughi ah thumkhän ah kyak ci, ani naw Egypt khaw ah ka, ning law püi ba gui ne, Kanaan khaw cu ning pe gui ci, acu ah ani cu nami Khanpughi ah kyak khai.

Changshäm Hlawt nak

³⁹ Na pei ah om ciah Israel na chang paw cu dukhaih law aih neta, changshäm vai ah amät naw amät a ning yoih nak ah a kyak ung, changshäm ah mäih ah kä na om püi vai.

⁴⁰ Ani cu chang ghüh ah mäih ah na pei ung om ne, M’thawh Banak ah hngeng Kum güt ung na khut bik khai.

⁴¹ Cun ah khin ung ani la a hta gui cu nang ah kyong ungka naw ami kyong khui ah hteit ba khai gui, ami pupa ah khaw ah hteit ba khai gui.

⁴² Israel chang gui cu Bawipa ah changshäm ah kyak ci gui, ani naw Egypt khaw ah ka law püi ba gui ci; ngami cu changshäm ah kyak khai ah kä yoih gui vai.

⁴³ Ak ghat ah kä nami om püi gui vai, nami Khanpughi cu nami kyih aa vai.

⁴⁴ Changshäm nami ng’yak hlü ah a kyak ung, nami pei ng’leng pakhui gui ungka nami hleih vai.

⁴⁵ Nangmi naw nami pei ng’leng ah om tuk ci gui ah a khaw hei chang gui ah hta nau gui phi, nami hleih hning ci. Nami khaw ung ami hta nak gui ah cun ah a hmaw gui cu nami khawh ah kyak ci.

⁴⁶ Nangmi naw ngami cu nami hta gui naw ami kaa nak vai ah nami nawng shüt hning ci. Ngami naw ami ghin ah chuih nami hta gui ah bii bik khai gui. Cun ung phi nangmi naw nami Israel chang paw cu ak ghat ah kä nami om püi gui vai.

⁴⁷ Nami pei ah om tuk ciah khaw hei chang cu büh mang law ne, nami Israel chang paw cu dukhaih law ne, cun ah khaw hei chang käcung, a kyong chang ah changshäm ah amät naw amät ang yoih ah a kyak ung,

⁴⁸ ani ami hleih kawn ah, ani hleih ba hning ci, a phäi nau tumat mat,

⁴⁹ a pahta, ng’nam phäi nau, käcung amätyah ng’een naw hleih ba hning ci; käcung amät ang bi hning ah a kyak ung, amät ah ng’päi ye nak vai amät naw hleih ba hning ci.

⁵⁰ Ani naw amät hleih ciah chang cu am cäi vai, amät naw amät a yoih nak ungka naw M’thawh Banak ah hngeng Kum ung khüt sei, khaw kum cu ngani naw khei ni neta, ani ah lawt nak vai ah a phu cu, chang ghüh ah ng’cheng awn m’täng ne ani k’bäi vai.

^51-52 Ng’pyi pyi ciah khaw kum gui cu khei neta, hleih tuk ciah hleih nak ah a phu m’shah cu, ani naw m’thung ba khai.

⁵³ Ani cu a kum tä sei chang ghüh ah mäih ah ghüh ah kyak ci. Ani cu a bawi naw ak ghat ah kä a om püi vai.

⁵⁴ Ani cu shin ah mäih ah lawt nak kä a om ah a kyak ung, ani la a hta gui cu M’thawh Banak ah hngeng Kum ung m’hlawt gui vai.

⁵⁵ Israel chang tumat cu angtäi sei changshäm ah kä kya hlawt khai, a i ah kyasei ci ung Israel chang gui cu Khanpughi ah changshäm ah kyak ci gui. Ani naw Egypt khaw ah ka law püi ba gui ci. Ani cu Bawipa ngami ah Khanpughi.