TAIGÜTHUM 24 - Cho Bible Common Language 2016

Mei Im gui Geingbawi nak vai ah Mawng

¹ Bawipa naw Moses am,

² Israel chang gui am a pek gui vai ah shin ah k’bäi nak cu m’thein ci: olive situi angcim akni pi cu mei im ung kei vai ah Phung kyong ah nami law püi vai, cun ung mei cu angtäi ah ui ne däi khai.

³ A mühun tä sei Aaron naw amdäi gui vai, a ngawi ung khaw ngawi güt amdäi vai, cun cu Bawipa ah om nak, yihdung ah akpung, Thukhän M’küm ah ama ah kyak ci, Atheingcim Pikbäih Hmun ung ah kyak ci. Shin ah thungyo cu lawk ciah khin avan ung ngaih nak vai ah kyak ci.

⁴ Ghui bäng awn ami pyan ah mei im ng’düi khan ah om ciah mei im cu Aaron naw a geing nak vai ah kyak ci. Acun gui cu Bawipa ah ma ah angdäih ah ui sei a hmuh vai ah kyak ci.

Khanpughi am Douthak ah M’htut

⁵ M’htut den khap gha lei goi cu la neta, m’htut pum gha lei goi ah ng’shai vai.

⁶ M’htut gui cu la ne m’thoot goi ah m’thoot vai, m’thoot ät ung chuk ciah Bawipa ah om nak ung om ciah ghui bäng awn vook ah tawnglang ah khan ah tha vai.

⁷ Ang thoot päng ung tui ng’ui tha vai, cun cu m’htut ah hnün ung Bawipa am ei-douthak ah m’hnüt nak ah kyak ci.

⁸ Kyin Hnüüp päng ung, lawk ciah a khin avan ung, m’htut cu Bawipa ah om nak ung tha vai. Shin cu khonglän ung Israel gui ah bi vai ah kyak ci.

⁹ M’htut cu Aaron la a hta nau gui ah kaa ah kyak ci. Ngami naw atheingcim nak ah hmun ung ami ei vai, a i ah kyasei ci ung taigü gui ah hmawk ah Bawipa am douthak ah ang htei ah theingcim ciah avang ah kyak ci.

M’tumtäng nak ah Taga nak la Hteicha ciah M’kyuk nak

^10-11 Chang tumat om ci, apa cu Egypt chang, anu cu Dan pakhui Dibri ah hta hnumi Shelomith, Israel chang ah kyak ci. Phung gaw ah kyong ah cun ah chang cu Israel chang tumat awn ng’vawk ci goi. Ani ng’vawk yah ung ani naw Khanpughi cu plah ci, cun ah kyasei ngami naw Moses ah hteh püi ci gui.

¹² Moses naw ngäng sak gui ne, ngami ah awn ani ah khan ah a i ami bi vai cu Bawipa naw am thein law vai ah ngäng ci.

¹³ Bawipa naw Moses am a pyen nak cu,

¹⁴ “Cun ah chang cu shaum pigaw k’pung ah hteh püi vä. Ani ah ang plah ng’ya tuk ci phung naw, ani shekak ciah m’dang nak ah a kut alu khan ah taih sä. Cun kawn ah changbum van naw lung awn vawi ne ngawn vä.

¹⁵ Cun kawn ah Israel gui am m’thein gui vä, Khanpughi plah tam ciah chang phung naw, acun ah mawng ung kya lawk ci phung k’chaw nak khai nei.

¹⁶ Cun kawn ah sih nak ung gawk khai. A u Israel chang phi, Israel ah om tuk ciah a u khaw hei chang phi, Bawipa plah ci phung cu, chang bum van naw lung awn vawi ne, nami ngawn vai nei.

¹⁷ “A u chang phi chang ngawn ci phung cu ngawn vai,

¹⁸ a u chang phi chang ah seime ngawn ci phung naw am thung vai. Thungyo cu hnun gui ah phäh ah hnun gui ah kyak ci.

¹⁹ “Chang tumat naw a chang paw nak khai ah a bi ah a kyak ung, amät ah bi ah mäih ah ani ah khan ah bi ba vai.

²⁰ Guh tumat a hnget sak ah a kyak ung a guh tumat hnget sak ba vai, mik tumat am dauh sak ah a kyak ung amik tumat m’dauh sak ba vai, ha tumat a hlät sak ah a kyak ung a ha tumat hlät sak ba vai. A i pang phi a chang paw ung nak khai ah a bi cu, amät ung lat ne bi ba vai.

²¹ Seime ngawn ciah chang phung naw m’thung ba khai, cun ung phi chang ngawn cicu ngawn vai.

²² Shin ah thukhän cu nami van ah phäh ah kyak ci, Israel gui la nami ng’lung ah om tuk ciah khaw hei chang avan, a i ah kyasei ci ung kei cu Bawipa nami na Khanpughi ah ka kyak ci.

²³ Moses naw Israel chang gui am shin ah a pyen nak gui kawn ah, ngami naw cun ah chang cu shaum pigaw ah k’pung ah hteh püi u ne, lung awn vawi ne ngawn ci gui. A cu cha ah Israel chang gui naw Bawipa naw Moses am ang thumkhän ah mäih ah bik ci gui.