TAIGÜTHUM 23 - Cho Bible Common Language 2016

Yumnak ung Pawi gui

¹ Bawipa naw Moses am,

² Yumnak pawi gui ah mawng shin ah thungyo gui cu pek ci. Cun cu Israel chang gui khawihnah vai ah ami ng’bum yah ung ah kyak ci.

³ Nangmi ung nami bii nami bi nak vai ah khaw hnüüp chuk om ci. Cun ung phi a hnüüp chih hnüüp kyin hnüüp cu, ng’düm nak ah hnüüp ah nami shüm ba vai. Cun ah hnüüp ung a i kä nami bi vai, khawihnah vai ah nami ng’bum vai. Nangmi a hawi nami om ung phi, kyin hnüüp cu Bawipa ah khäm ah kyak ci.

⁴ Shin ah pawi gui cu k’bäi nak ah khin ung ami bi vai.

Phyawn nak Pawi la K’caw kä Shum ah M’htut

⁵ Phyawn nak pawi Bawipa m’tamkhah nak cu, acha ät nak ah a hnüüp gha lei phli hnüüp, hni ang shü law ung nami tün vai.

⁶ A hnüüp gha lei hma hnüüp ung k’caw kä shum ah m’htut htun nak ah pawi cu tün ne, hnüüp chih ah kyong ung nangmi cu k’caw shum ah m’htut kä nami ei en vai.

⁷ Shin ah hnüüp gui ah a hnüüp ät hnüüp, nangmi cu khawihnah vai nami ng’bum vai, a hnüüp tä nami bi ah bii, a i phi kä nami bi en vai.

⁸ Hnüüp chih ah kyong ung ei douthak nak cu Bawipa am nami douthak vai. A hnüüp chih hnüüp ung nangmi cu khawihnah vai ah nami ng’bum ba vai, cun ung phi a hnüüp tä nami bi ah bii cu a i phi kä nami bi vai.

^9-10 Bawipa naw a ning pek gui ah khaw ung nami gawk law ung, htang nami khäm law ung, ak htük bäih ah htang pawk cu taigü ah nami law püi vai.

¹¹ Ani naw cun cu aktung ah douthak ah Bawipa am pek khai, cun ah kyasei Bawipa naw ning dou gui khai. Taigü naw cun cu Kyin Hnüüp ah acituh hnüüp a pek vai ah kyak ci.

¹² Htang douthak nak ah hnüüp ung, kum ät lüng ciah htome akhla, kä kheihlik en ci awn khawihnah ne, m’khih ne douthak nak nami bi vai.

¹³ Acun awn a täng ah m’htut den koi phli cu, olive situi awn k’caw ne nami pek vai. Shin ah douthak nak ah ang ui cu Bawipa naw yeikyai nak ci. Acun awn a täng ah sapyit tui um ät cun phi, douthak ne nami pek vai.

¹⁴ Thui an, htang hlaw, m’htut ng’shai ung tün ne geit thai phung cu Khanpughi am douthak nak kä bi pha ah chuih, kä ei vai. Shin ah thungyo gui avan cu nami hta nau gui avan naw, lawk ciah a khin avan ung ami ngaih nak vai ah kyak ci.

Geitkhäm Pawi

¹⁵ Kyin Hnüüp, Bawipa am htang pawk nami pek nak ah acituh hnüüp ung tün ne, hnüüp chih, chih vei nami khei vai.

¹⁶ A hnüüp hmakip hnüüp, a chih vei kyin nak ah acituh hnüüp ung Bawipa am a hei akthai ah htang douthak nak cu pek ba vai.

¹⁷ A kyong khui päng naw m’htut pum goi ci law püi ne, aktung m’cümhnah nak ah Bawipa am pek vai. M’htut a pum phung cu m’htut den koi phli, k’caw shum ne ng’shai neta, khäm ah htang phung ungka, ak htük bäih htang douthak nak ah Bawipa am pek vai.

¹⁸ Acun ah m’htut awn a täng ah chang gui naw kum ät lüng ciah htome hta chih, vantang tumat, htome khla hnih cu ami law püi vai. Cun gui cu a i phi kä kheihlik en khai. Cun gui cu htang douthak la sapyit tui douthak nak awn a täng ah m’khih ne douthak ah douthak vai. Shin ah douthak nak ah ang ui cu Bawipa naw yeikyai nak ci.

¹⁹ Acun ah mäih ah katphyawn douthak nak ah me m’ca hta tumat la hmuh chum douthak nak ah kum ät ci lüng ciah htome m’ca hnih awn ami douthak vai.

²⁰ Taigü naw m’htut la htome m’ca hnih cu taigü gui ah hmawk ah aktung ah m’cümhnah nak ah Bawipa am pek khai. Shin ah douthak nak gui cu theingcim ci.

²¹ Cun ah hnüüp ung nami mät ah bii a i phi kä nami bi vai, cun ung phi khawihnah vai ah nami ng’bum vai. A hawi ami om ung phi nami hta nau gui naw, shin ah thungyo gui cu lawk ciah a khin avan ung ami ngaih nak vai.

²² Nami lo ung geit nami khäm ung, akcawk akem ung khüt sei kä nami shui vai, nami hma pyi ah htang cu ng’hlat ba ne kä nami shui ba vai, dukhaih ci gui la khaw hei chang gui ah phäh ah nami nawng shüt vai. Bawipa cu nami Khanpughi nei.

Kum Thai Pawi

^23-24 A cha chih nak ah a hnüüp ät nak cu ng’düm nak ah hnüüp, aktung ah na ngaih nak vai, phyungheng ang gin law ung khawihnah vai ah nami ng’bum law vai.

²⁵ Bawipa am ei-douthak cu nami thak vai, nami mät ah bii a i phi kä nami bi en vai.

Bui awt nak ah Hnüüp

^26-27 A cha chih nak ah a hnüüp gha nak cu chang gui ah katnak nawt heng nak ah khokum ng’veing, theingthap ci bi nak ah hnüüp ah kyak ci. Cun ah hnüüp ung a i phung kä nami bi vai, khawihnah vai ah a täng ah nami law vai, ei-douthak nak cu Bawipa am nami pek vai.

²⁸ Cun ah hnüüp ung a i kä nami bi vai, a i ah kyasei ci ung cun ah hnüüp cu katnak nawt heng nak ah bii bi nak ah hnüüp ah kyak ci.

²⁹ Cu hnüüp ung chang tumat mat naw ei a ei ah a kyak ung, ani cu Khanpughi ah chang tumat ah kä k’bäi ba vai.

³⁰ Cun ah hnüüp ung chang tumat mat naw bii a bi ah a kyak ung, Bawipa amät naw ani am ngawn khai.

³¹ Shin ah thungyo gui cu a hawi ami om ung phi, nami hta nau gui ami van ah khan gawk khai.

³² Cun ah cha a hnüüp kaw nak hni ng’shu ungka naw, a hnüüp gha nak ng’hni ng’shu ung khüt ci cu, ng’düm nak hnüüp aktung ah nami ngaih nak vai, cun ah khin ung a i phi kä ei vai.

Ng’yii nak Pawi gui

^33-34 Ng’yii nak Pawi gui cu a cha chih nak ah a hnüüp gha lei hma ung tün ne, hnüüp chih ung ng’täi sei bi ah kyak ci.

³⁵ Cun ah hnüüp gui ah a hnüüp ät hnüüp ung khawihnah vai ah a täng ah law u ne, a hnüüp tä nami bi ah bi cu kä nami bi vai.

³⁶ Cun ah hnüüp chih ung a hnüüp tä sei, ei-douthak nak cu nami bi vai. A hnüüp cheit ung khawihnah vai ah a täng ah law ba mä u ne, ei-douthak nak nami douthak vai. Cun cu khawihnah nak ah hnüüp ah kyasei nangmi naw a i kä nami bi en vai.

³⁷ (Shin gui cu yumnak pawi gui, a cun ung nangmi naw Bawipa m’tam nak ah khawihnah vai ah ng’bum u ne, ei-douthak nak, m’khih douthak nak, htang douthak nak khawihnah nak la sapyit tui douthak nak cu nami douthak ci. Cun cu a hnüüp tä sei k’bäi ah mäih ah bi ah kyak ci.

³⁸ Shin ah pawi gui cu kyin nak hnüüp päng k’be nak ah kyak ci. Shin ah douthak nak gui cu nami m’cümhnah nak päng k’be nak ah kyak ci. Shaitak nak ah kümbe nak vai ah nami douthak gui la nami pängye douthak gui cu, Bawipa am nami pek ah kyak ci.)

³⁹ Nangmi naw nami lo ung geit nami khäm law ah a kyak ung, shin ah pawi cu hnüüp chih ung nami bi vai, a cha chih nak ah a hnüüp gha lei hma hnüüp ung nami tün vai. A hnüüp ät nak cu ng’düm nak vai ah aktung hnüüp ah kyak khai.

⁴⁰ Cun ah hnüüp ung nami sing ghing gui ah am theih akni pi gui cu nami k’bih vai, hliip ah ng’ban gui, sing khu ah ng’ban gui shum ät cu la neta, Bawipa nami Khanpughi m’tamkhah nak ah yum nak ah pawi cu nami tün vai.

⁴¹ Cun cu hnüüp chih ung nami bi vai. Shin ah thungyo gui cu nami hta nau gui naw lawk ciah a khin avan ung ami k’pan vai.

⁴² Israel chang gui ami van cu ng’yii nak ung hnüüp chih ami om vai,

⁴³ Cun ah kyasei ani naw Egypt khaw ah ka a law püi ba gui yah ung, Israel chang gui cu ng’yii nak ung om khai gui ah Bawipa naw pyang gui ci, cicu nami hta nau gui naw hmat khai gui. Cun cu Bawipa nami Khanpughi nei.

⁴⁴ A shikcha ah Moses naw Israel chang gui am, Bawipa m’tamkhah nak ah yumnak pawi gui ah, ngaih nak vai ah thungyo gui cu pe gui ci.