TAIGÜTHUM 22 - Cho Bible Common Language 2016

Douthak gui ah Theingcim nak

¹ Bawipa naw Moses am m’theing ne,

² Aaron la a hta gui am a pyen sak cu, “Nangmi naw kei ah ka ming theingcim ung thüisei nak kä nami law püi vai. Cun ah kyasei Israel chang gui naw kei am ami na ap law ah theingcim ciah douthak nak cu nami kyih aa vai. Kei cu Bawipa nei.

³ Nami hta nau tumat cu kä a theingthap yah ung, Israel chang gui naw kei am ami na douthak vai ah theing ciah douthak pei ah ang et law ah a kyak ung, ani cu sonkiang ung cun kawn ah kä bi tuba phung khai. A shin naw lawk khai ah a khin avan cu shum ci nei. Kei cu Bawipa nei.

⁴ “Aaron ah hta ng’shon a u phi kheilei ung gaw ci, käcung, khei nak om ciah chang cu kä a theingthap ba pha ah chuih theingthap ciah douthak cu kä a ei en tu vai. Taigü phung naw shin ah kä theingthap ci gui, a tawn ah a kyak ung ani cu kä theingthap ci, kä theingthap ciah sih gook, bilawh nak, a patui lut lawk ciah pami,

⁵ kä theingthap ciah khisa baw, chang baw, ngawn ah a kyak ung,

⁶ a u taigü phi kä a theingthap kawn ung, mühun güt kä theingthap ci. Ani cu tui kä angsi ba pha ah chuih api ah phi theing ciah douthak cu kä ah ei en vai.

⁷ Khaw hni a hang kyak awn ah ani cu theingthap ci, cun kawn ah theing ciah douthak cu ani naw ei hning ci, cun cu ani ah ei ah kyak ci.

⁸ Ani naw amät sik ciah khisa ah meh, sa naw a lawh ah meh cu kä a ei vai, acun naw ani cu kä theingthap sak khai. Kei cu Bawipa nei.

⁹ “Taigü gui ami van naw kei ah ka pek ah thungyo gui cu ami ngaih nak vai. Kä cung ngami cu cheishoh ne sik khai gui, a i ah kyasei ci ung ngami naw theing ciah thungyo kä ami läk ah phä ah ah kyak ci. Kei cu Bawipa nei, kei naw ka theingcim sak ci nei.

¹⁰ “Taigü kyong chang bäng naw va theing ciah douthak cu ei hning ci, a hei a u naw phi kä ei vai, taigü awn a täng ah om ciah chang, kä cung a ghüh ah chang naw phi kä a ei tu vai.

¹¹ Cun ung phi taigü ah changshäm, amät ah ngui awn ak hleih, kä cunung, a im ung ami hta nak naw, taigü ah ak chaw cu ei tu hning ci.

¹² Taigü ah hta hnumi, taigü ah kä kyak ci, cei nak ci naw theing ciah douthak cu kä ei tu hning ci.

¹³ Cun ung phi, hmeinu, kä cunung, ami nawng ba ah hta hnumi cu a hta kä om sei, apa ah im ah law ba ne om tu ba ci naw, taigü ah kyak ciah apa ah chaw ah ei cu ei tu hning ci. Cun ah ei cu taigü kyong ung kyong chang ah kyak ci naw vah, ei tu hning ci.

¹⁴ “Taigü kyong chang ah kä kyak ciah chang tumat mat naw, kä hmat neta, theing ciah douthak cu a ei tu ah a kyak ung, ani naw a ei tu ah a phu cu acun ah bum hma ung bum ät awn m’khah ne taigü am a pek ba vai.

^15-16 Taigü naw cun ah douthak cu kä ei tu khin ciah chang ei tu sak ne, kä a ng’lat en sak vai; acun naw cheishoh nak la m’kyuk nak cu cun ah chang ah khan ah gawk sak khai. Kei cu Bawipa nei, kei naw douthak gui cu ka theingcim sak ci.

¹⁷ Bawipa naw Moses am thumkhän ci,

¹⁸ Cun cu Aaron la a hta gui la Israel chang avan am a pek vai ah shin ah thungyo gui ah kyak ci. Israel chang, käcung, Israel khaw ah om tuk ciah a khaw hei chang naw shaitaak kumbe nak sak, kä cunung, pängye douthak nak ah m’khih ne douthak nak, abi law ah a kyak ung, cun ah seime cu api ah phi kheihlik ciah kä a kyak en vai.

¹⁹ Do pek vai cu, cun ah seime cu api ah phi kä kheihlik ciah ak hla ah kyak khai.

²⁰ Nami douthak ah seime cu a kheihlik ah a kyak ung Bawipa naw kä dou khai.

²¹ Chang tumat mat naw shaitak ah kümbe nak, kä cunung, pängye douthak ah hmuhchum douthak nak abi ah a kyak ung, seime cu api ah phi kä kheihlik ciah kyak khai, cun cu dou pek vai kyak khai.

²² A i seime phi, a mik m’dauh, ak shum, a pumsa kä küm ci, khei ci, hnai ci, acun khe ci, m’thak ci phung cu Bawipa am kä douthak vai. Cun ah mäih seime phung cu ei douthak ah sonkiang ung kä douthak vai.

²³ Pängye douthak nak ah nangmi naw kä ng’müi ci, kä cung kä kümbe ciah seime phi, nami thak hning ci, cung phi cun cu shaitak ah kumbe nak ah douthak ah kä kyak ci.

²⁴ A i seime phi ayakci agüt, a ah, plaih ci, teek ci phung cu Bawipa am douthak nak ah kä mang vai. Nangmi ah khaw ung cun ah mäih cu kä nami mang vai.

²⁵ A khawhei chang gui naw ami law püi ah seime cu ei-douthak ah kä nami douthak vai. Cun ah seime cu kheihlik ciah k’bäi ah kyak ci. Cun gui cu kä dou vai ah kyak ci.

^26-27 Pathta, htome hta, me hta cu a hta nak ah a kyak ung, cun cu hnüüp chih ah kyong ung anu ah pei ah ka kä lak en vai. Cun ung phi cun kawn ah cun cu ei-douthak ah dou pek vai.

²⁸ Patnu la a hta, htomenu la a hta, menu la a hta, cu hnüüp ät ung khawihnah nak ah kä nami mang en vai.

²⁹ Nangmi naw yeikyai nak ah khawihnah nak cu Bawipa am nami douthak law ung thungyo gui cu nak läk vai, cu ung nangmi cu ning dou gui khai.

³⁰ Cun gui cu a cu hnüüp nami ei vai, a ngawi ung güt api phi kä nami pawih en nak vai.

³¹ Bawipa naw, “Ka thumkhän gui cu läk vä, kei Bawipa nei.

³² Kei ah ka ming theing ung thüisei nak kä nami law en püi vai, Israel chang avan naw kei cu ka theingcim ciah ang kiaa vai. Kei cu Bawipa nei, kei naw nami theingcim khai ah ka ning pyang gui khai;

³³ Kei naw Egypt khaw ah ka, ning law püi ba gui ne, nami Khanpughi ah ka kyak ci. Kei cu bawipa nei.”