TAIGÜTHUM 21 - Cho Bible Common Language 2016

Taigü gui ah Theingcim nak

¹ Bawipa naw Moses am thumkhän ne, Aaron tu taigü gui am a pyen sak cu, “A u taigü naw phi amätyah a sih ung, cun ah gook a htüm nak tu awn amät naw amät kä theingthap khai ah kä a bi vai.

² Cun ung phi, anu, apa, a hta, a hta hnumi, a phäi nau,

³ kä cunung, a im ah om ciah kä ceimah ciah abe ah a kyak ung läi a htüm tu vai.

⁴ Ceimah law ne mätyah ah kya lawk ciah chang a sih nak ung a htüm tu ung, amät naw amät kä theingcim khai ah kä a bi en vai.

⁵ “A u taigü naw phi a thüi am dang nak ah a lu kä ak teiu vai, am khamu kä ak teiu vai, a pumsa kä ak phleim vai.

⁶ Ani cu a theingcim vai, kei ah ka ming ung kä a thüisei vai. Ani naw ei-douthak nak cu kei ung ana douthak vai, ani cu a theingcim vai.

⁷ Taigü naw plet ciah hnumi, kä ng’lami htüm, ami nawng ah hnumi cu kä ak chu nak vai, ani cu theingcim ciah kyak ci.

⁸ Chang gui naw taigü cu theingcim ciah ami k’bäi vai, a i ah kyasei ci ung ani naw ei-douthak nak cu kei am na pek ci, kei cu Bawipa, ka theingcim ci, ka chang gui ka theingcim sak gui ci.

⁹ Taigü ah hta hnumi a plet ah a kyak ung, apa m’thüi ciah kyak ci, ani cu m’khih ne ngawn vai.

¹⁰ “Taigütung cu alu khan ung shawi nak vai ah phyutheh situi om pyi ci, ani cu taigü sui, sui khai ah ng’ap pyi ci. Cun ah kyasei ani naw alu kä huih ah kä a om en vai, a thüisei nak m’dang ne asui kä ak teh en vai.

^11-12 Ani cu kei ung ng’ap pyi ciah kyak ci, amät naw amät kä theingthap khai ah kä a bi en vai, kä cung theingcim ciah ka Phung nawng shüt ne phi kia, anu pa ah a kyak ung phi aksi htüm nak ah im ung luh ng’lang ne phi kia, amät naw amät kä theingthap khai ah kä a bi en vai.

¹³ Ani naw hnumi hta cüm ak chu nak vai.

¹⁴ Hmeinu, ami nawng ah hnumi, plet ciah hnumi, kä a chu en nak vai. Ani naw amät ah pakhui ungka hnumi hta cüm a chu nak vai.

¹⁵ Kä cun ung theingthap khai ah a hta nau gui cu kä theingthap ciah kya lawk khai gui. Kei cu Bawipa ah kya ne, kei naw ani cu khei ne taigütung ah ka m’düih ci.”

¹⁶ Bawipa naw Moses am thumkhän ne,

¹⁷ Aaron am a pyen nak cu, “Nang ah na htangshon ungka a pumsa kä küm ci phung naw ei-douthak nak cu kei am kä ana douthak en law vai. Cun cu ngawi yä a cun ah kyak khai.

¹⁸ A pumsa ung kä küm ciah chang phung naw, douthak nak kä a bi vai; am dauh, ak shum, ak awng, ak ang,

¹⁹ a kut hnget, a khaw hnget,

²⁰ akhei khun, a khei hnget, amik nak ci, kheihlik ci, la akpup gui.

²¹ Aaron ah htangshon taigü cu, a pumsa ung kä küm ci a om ah a kyak ung, acun naw ei-douthak nak cu kei am kä ana douthak en law vai.

²² A cun ah mäih chang naw, kei am ami na thak law ah ei cu a ei vai. Theingcim ciah ei-douthak la atheingcim pikbäih ah ei-douthak avan ah kyak ci.

²³ Cun ung phi pumsa ung kä küm ciah chang läi cu, theing ciah yihdung pei ah kä a law vai, sonkiang ah pei ah phi kä a ng’et vai. Shin ah theingcim ci gui cu ani naw kä ang lat sak en vai, a i ah kyasei ci ung kei cu Bawipa, kei naw ka theingcim sak ci.”

²⁴ Shin cu Moses naw Aaron am, Aaron ah hta gui am, la Israel chang gui avan am, a pyen nak gui ah kyak ci.