TAIGÜTHUM 20 - Cho Bible Common Language 2016

Thu Kä Ngai ci M’kyuk nak gui

¹ Bawipa naw Moses am

² Israel chang gui am, am thein gui vai ah pyen nak ci, “Nangmi ungka, kä cunung, nami ng’lung ah om tuk ciah a khaw hei chang tumat mat naw, a hta hmaw tumat mat cu Molek khanpughi khawihnah nak vai ah a pek ah a kyak ung, chang gui avan naw ani cu sik khai ah lung awn ami vawih vai.

³ Chang tumat mat naw a hta tumat mat cu Molek am pe ne, khawphung theing cu kä theingthap khai ah bi ne, ka ming theing a thüisei sak ah a kyak ung, kei naw hnungtuk ne ka ng’hlah tak khai, ani cu ka chang tumat ah kä ka k’bäi ba khai.

⁴ Ani ah bilawh ah phäh ah chang gui naw ani cu nawng düt u ne sih nak kä ami pek ah a kyak ung,

⁵ Kei ka mät naw cun ah pami la a kyong chang avan cu hnungtuk ne ng’hlah ta neta, Molek khawihnah ciah chang avan cu ka hnungtuk püi khai. Kei naw ka chang ah kä ka k’bäi ba gui khai.

⁶ “Chang tumat mat cu aksi ah mümcha ah luh nak ah chang, m’cumcäi tuk khai ah a hteh ah a kyak ung, kei naw hnungtuk ne ka ng’hlah tak khai. Ka chang tumat ah kä ka k’bäi ba khai.

⁷ Nami mät naw nami mät nami theingcim sak vai, a i ah kyasei ci ung kei cu Bawipa nami na Khanpughi ah kyak ci.

⁸ Ka thukhän gui nami läk vai, a i ah kyasei ci ung kei cu Bawipa kei naw ka ning theingcim sak gui ci.

⁹ Bawipa naw shin ah thungyo gui cu pe gui ci. A u chang phi anu apa plah ciah chang phung cu, ngawn vai, ani cu amät ah sik nak vai bik ciah kyak ci.

¹⁰ Pami tumat naw a Israel paw ah chu a kat püi ah a kyak ung, hnumi la pami ani nik hnih cu ngawn goi vai.

¹¹ Chang tumat cu apa ah chu tumat mat awn ng’yawpawm nine, apa am thüi ah a kyak ung, hnumi la pami ani nik hnih cu ngawn goi vai. Ngani cu ani mät ah sih nak vai ma nak ci goi ah kyak ci.

¹² Chang tumat cu a hta ah chu awn ani ng’yawpawm ah a kyak ung, ani nik hnih ngawn goi vai. Ngani cu ani mät ah sih nak vai ma nak ci goi ah kyak ci.

¹³ Pami tumat cu a hei pami awn ani ng’yawpawm ah a kyak ung, ngani cu kä akni pi bik ci goi ah kyak ci, ani nik hnih ngawn goi vai. Ngani cu ani mät ah sih nak vai ma nak ci goi ah kyak ci.

¹⁴ Pami tumat naw hnumi tumat la anu a chu nak goi ah a kyak ung ami van thum cu m’khih ne ngawn gui vai. Cun cu thüisei nak vai ami bi ah hmawk ah kyak ci, acun ah mäih cu nami ng’lung ah api ah phi kä bilawh vai.

¹⁵ Pami tumat cu seime awn ani ng’yawpawm ah a kyak ung amät la seime cu ngawn vai.

¹⁶ Hnumi tumat cu seime awn ani ng’yawpawm vai ah abi ah a kyak ung ani la seime cu ngawn vai. Ngani cu ani mät ah sih nak vai ma nak ci goi ah kyak ci.

¹⁷ Pami tumat naw a be, kä cung, abe m’shum a chu nak ah a kyak ung, ngani cu chang khli ah ng’lung ah thui ng’aa ci goi kyasei, chang bum ungka naw k’täm goi vai. Ani cu a be chu nak ciah kyasei, kya lawk ci phung ma nak khai ah kyak ci.

¹⁸ Pami tumat cu a chashui law yah ciah hnumi awn ani ng’yawpawm ah a kyak ung, ani nik hnih cu chang bum ungka naw k’täm goi vai. A i ah kyasei ci ung ngani cu kä theingthap ciah mawng thungyo m’sheit ci goi ah kyak ci.

¹⁹ Pami tumat cu anikhaw awn ani ng’yawpawm ah a kyak ung, ang een aih su ah kya lawk ciah a mawng phung ma na ne yaica khai goi.

²⁰ Pami tumat cu a pukhaw ah chu awn ani ng’yawpawm ah a kyak ung, ani cu a pukhaw m’thüi ciah kyak ci. Ani la hnumi cu m’kyuk nak gah khai goi, a u phi a hta kä om khai.

²¹ Pami tumat cu a phäi nau ah chu, ak chu nak ah a kyak ung, ngani cu ani hta kä om sei sik khai goi. Ani cu kä theingthap ci bi ne a phäi nau m’thüi ciah kyak ci.

²² Bawipa naw, “Ka thukhän gui la ka thumkhän gui avan cu nami k’pan kheng vai. Cun ung nangmi cu kei naw ka ning hteh püi nak gui ah Kanaan khaw ung hnungtuk püi nak kä nami hmuk khai.

²³ Acu ah om ciah chang gui ah ami thung man cu kä nami thei en tu vai. Kei naw cun ah khogam khawihnah ci gui cu ka k’täm gui khai. Cun ah kyasei cun ah khaw ung nangmi nami lut hning ci. Avan akshe ah ami om ih nak awn kei ah khan ah shemshai khai ah bilo ci gui.

²⁴ Cun ung phi büh mang ne amdek nik ciah shin ah khaw cu, nami khäm vai ah shai ka tak ci nei, kei naw cun cu ka ning pe gui khai nei. Kei cu Bawipa nami na Khanpughi nei, kei naw nangmi cu a hei pakhui gui ungka, m’khoi ne ka ning m’düih gui khai nei.

²⁵ Nangmi naw theingthap ci la kä theingthap ciah khisa gui la kha gui cu hmat phyak khai ah m’khoi m’cha ne nami bi vai. Kä theingthap ciah khisa la kha gui cu kä nami ei vai, kei naw kä theingthap ciah ka k’bäi pyi ah kyak ci, nami ei ah a kyak ung a cun naw kä ning theingthap sak gui khai.

²⁶ Nangmi nami theingcim vai, kei bäng ung nami ng’khäm vai. A i ah kyasei ci ung kei cu Bawipa, kei cu ka theingcim ci. Kei naw chang khuihei gui ungka ka ning k’pai gui ci, cun ah kyasei nangmi cu kei bäng ung nami ng’khäm vai.

²⁷ A u pami, a u hnumi phi aksi ah mümcha naw a kai ah chang cu lung awn vawi ne ngawn vai, a u chang phi a cun ah bik ciah chang cu a sih nak vai ma nak ciah kyak ci.”