TAIGÜTHUM 2 - Cho Bible Common Language 2016

Htang Douthak nak gui

¹ Chang tumat naw Bawipa am htang douthak nak abi ah a kyak ung, ani naw khui khai ah a den ma vai. Situi luh ne ang ui a shum vai.

² Cun kawn ah Aaron tuu taigü gui ah a law püi vai. Taigü bawi naw htang den shum ät, la situi ni, ang ui ni avan la neta, sonkiang khan ah am khih vai. Cun cu Bawipa am avan douthak m’khih nak ah kyak ci. Cun ah ei-douthak ah ang ui cu Bawipa naw yeikyai nak ci.

³ Pawih ba ciah htang-douthak cu taigü gui naw khäm ci gui. Cun cu ang htei ah theingcim ci, Bawipa am douthak ah ei ungka lak ah kyak ci.

⁴ M’htut douthak hlü ah a kyak ung meibum ung ng’shai vai. Cun cu k’caw kä shum en ah pyan vai. Cun cu m’htut den ak khui situi awn hläuh ne pyan ah m’htut, käcung situi awn shon ah m’htut ah kyak khai.

⁵ M’si k’am ung shon ah m’htut douthak hlü ah a kyak ung m’htut den cu situi awn hläuh ne pyan vai, k’caw kä shum vai.

⁶ Cun cu chem ne ak khan ah situi awn shawi neta, douthak ne pek vai.

⁷ Hlaw k’am ung shon ah m’htut douthak ah a kyak ung, m’htut den situi awn hläuh ne pyan vai.

⁸ Cun cu Bawipa am douthak vai ah law püi ne, taigüpa am pek vai, ani naw sonkiang ung tha khai.

⁹ Taigüpa naw amshah cu lak khai, cun cu Bawipa am avan douthak ah m’hnüt nak ah kyak khai, ani naw sonkiang khan ah m’khih khai. Cun ah ei-douthak ah ang ui cu Bawipa naw yeikyai nak ci.

¹⁰ Pawih ciah douthak cu taigü gui naw khäm ci gui, cun cu ang htei ah theingcim ci, cun cu Bawipa am douthak ah ei ungka lak ah kyak ci.

¹¹ Htang douthak Bawipa am nami pek law phung cu, k’caw awn kä pyan en vai. Bawipa am douthak vai ah ei ung k’caw la khoitui kä nami shum phung vai.

¹² Akum tä sei nami khäm htük ah püm htang cu Bawipa am douthak vai ah nami law püi vai, cun ung phi cun cu sonkiang ung kä m’khih vai.

¹³ Htang douthak phung ung m’shii shum vai, a i ah kyasei ci ung nang la Khanpughi ah ng’lak ung thukhän cu m’shii naw dang sak ci. (Nami douthak vai phung ung m’shii nami shum kheng geng vai.)

¹⁴ Khäm htük ah püm htang Bawipa am douthak vai na law püi ah a kyak ung kyang pyi ciah htang, kä cung phyawn pyi ah htang na pek law vai.

¹⁵ Situi awn hläuh ne ang ui na luh vai.

¹⁶ Taigüpa naw ei la situi ateih la ne am khih vai, cun cu m’hnüt nak ah bi ah kyak ci, ang ui gui avan phi a cun ah bi ah kyak ci, Cun cu Bawipa am ei-douthak ah kyak ci.