TAIGÜTHUM 19 - Cho Bible Common Language 2016

Theingcim la Taga ah mawng Thukhän gui

¹ Bawipa naw Moses am

² Israel chang gui a pyen nak gui vai ah am thein cu, “Nami theingcim vai, a i ah kyasei ci ung kei, Bawipa, nami na Khanpughi cu ka theingcim ci.

³ Nangmi a chang sing naw nami nu la nami pa cu nami chang m’sui vai. Kyin hnüüp cu nami k’pan khek vai. Cun cu thumkhän ka ning pek gui ah kyak ci. Kei cu Bawipa nami Khanpughi nei.

⁴ “Kei kä nami na nawng vai, a gup kä nami khawihnah vai, m’sii cu Khanpughi ah a gup ah pyang ne kä nami khawihnah vai, kei cu Bawipa nami na Khanpughi nei.

⁵ “Hmuhchum-douthak nak vai ah seime ngami ngawn ah a kyak ung, kei naw ka ning pek gui ah thungyo cu nami k’pang khek vai, kei naw nami douthak cu ka dou khai.

⁶ Meh cu seime ngawn nak ah hnüüp ung, kä cung a ngawi ung ei yawp vai. A hnüüp thum hnüüp pawih ciah meh cu m’khih vai.

⁷ A i ah kyasei ci ung cun cu kä theingthap ba ci, Cun cu chang tumat mat naw a ei ah a kyak ung, nami douthak cu kei naw kä ka dou khai.

⁸ Cun ei ciah chang cu katnak bik ciah kyak ci, kei am ami na vawihpeh a i baw düt ah cik ciah kyak ci, ani cu kei ah chang ah kä kya tuba khai.

⁹ “Nami lolai ung nami khämtawng law ah a kyak ung, akcawi akem ah khüt sei kä nami ah vai, nami hmaa shüt gui ng’hlat ba ne kä nami shui ba vai.

¹⁰ Sapyit lo ung nami hmaa shüt ah am theih gui cu ng’hlat ba ne kä nami k’bih ba vai, kiawi ciah am theih gui cu kä nami kaw ba vai, cun gui cu dukhaih ciah chang gui la a khohei chang gui ah phäh ah nami nawng pek gui vai, kei cu Bawipa nami na Khanpughi nei.

¹¹ Kä m’guuk vai, kä thuvi vai, kä hleei vai.

¹² Kä nami k’pan vai ung kei ah ming awn shaitak nak kä nami bi vai, cun naw kei ah ming khan ah thüisei nak law püi ci. Kei cu Bawipa, nami Khanpughi nei.

¹³ Chang ah kaa kä lak pek düt vai, kä guttep vai. Na ghüh ah chang ah ng’cheng cu kä na shum pek vai, mü ät phi kä na tha pek vai.

¹⁴ A hnga paang ci kä plah vai, a mik m’dauh ah ma ung ang vawn nak vai kä tha vai. Na kyih vä, kei cu Bawipa nami na Khanpughi nei.

¹⁵ Amawng ama ng’thumcha nak ung düng nak la taga nak awn bi vai, dukhaih ci shedam nak, büh mang ci kyih aa nak ah kä a kyak en vai.

¹⁶ A u chang ah mawng phi hleei ne kä ngak vai. Chang tumat cu a hnun gui ah phäh ah yung ah angceet ah a kyak ung, na saksi nak naw m’htei tu hning vai ah a kyak ung, na ng’thu tu vai. Kei cu Bawipa nei.

¹⁷ “Chang tumat mat hnungtuk ne m’lung kä m’hni nak kä na m’dang vai, cun ung phi ani awn kä täng khai ah na om vai. Cun ung ani ah hmawk ah nang naw katnak kä na bik khai.

¹⁸ A u chang ah khan ah phi phu kä na tuk vai, käcung kä na thüi nak lä vai. Cun ung phi na paw chang cu na mät na m’hni ah mäih ah na m’hni vai. Kei cu Bawipa nei.

¹⁹ “Ka thumkhän cu nami ngaih vai. Vuhchah ah seime gui k’caw ne kä ng’ghui sak vai. Lo tumat ung geit m’shi ming goi kä geit vai. Ming hnih awn tah sui, kä sui vai.

²⁰ Changshäm hnumi hta cu pami tumat naw a chu nak tuba, cun ung phi a i kä a pek, kä a hlawt pha ung, pami a hei awn ani ng’yaw ah a kyak ung, ngani cu m’kyuk goi vai, cun ung phi kä ngawn goi vai, a i ah kyasei ci ung hnumi cu changshäm ah kya lä yah ci.

²¹ Pami naw kei ah om nak ah Phung luh nak ung, thung ba nak douthak bi nak vai ah htome amca a law püi vai.

²² Cun kawn ah taigü naw ng’gängsei nak cu a bilawh vai. Cun cu cun ah chang ah katnak nawt heng nak ah kyak ci. Khanpughi naw ani cu m’geinsei khai.

²³ “Nangmi Kanaan khaw ah nami gawk law ba ung, m’theih ciah sing avan nami geit vai, ak htük ah khaw kum thum ung am theih cu kä theingthap ciah nami hmat vai. Cun ah khin ung kä nami ei vai.

²⁴ A kum phli kum, am theih avan cu douthak nak ah nami ap vai. Cun cu kei, Bawipa ung m’tamkhah nak nami m’dang nak ah kyak khai.

²⁵ Cun ung phi a kum hma kum am theih cu nami ei vai. Cun ah avan nami bi ah a kyak ung nami sing gui cu m’theih law pi khai. Kei cu Bawipa nami na Khanpughi nei.

²⁶ “A sa kyong ah asi om yah ciah meh cu kä nami ei vai. Cecai nak ah ei phung cu kä nami ei vai.

²⁷ Lu gün ne lumu kä nami k’teiu vai, ng’being mu kä nami k’teiu vai.

²⁸ Nami mät naw nami mang kä nami guk vai. Aksi ah phäh ah thüsei ne pumsa kä nami k’phleim vai. Kei cu Bawipa nei.

²⁹ “Nami hta hnumi gui cu chang pawmyau ah kä nami kyak sak vai, kä nami thüi sak vai. Cun ah nami bi ah a kyak ung nangmi cu a hei khanpughi gui ah nami ng’hlat ci kyak khai. Khaw avan phi m’guk plet nak awn be khai.

³⁰ Kyin hnüüp cu nami k’pan kheng vai. Kei nami na khawihnah nak ah hmun cu nami m’tam ngak vai. Kei cu Bawipa nei.

³¹ Aksi ah mümcha naw a luh nak ah chang cu m’cumcäi vai ah kä nami hteh shi vai. Cun ah nami bi ah a kyak ung nangmi cu kä theingthap ciah nami kyak khai. Kei cu Bawipa nami na Khanpughi nei.

³² “Aghi ang vai gui cu chang m’sui ne, nami m’tam ngak vai. Kyih aa ne nami cuun ngaih vai. Kei cu Bawipa nei.

³³ “Nami khaw ung om tuk ci gui ah khaw hei chang gui cu akshe ah kä nami om nak gui vai.

³⁴ Nami Israel chang paw ah mäih ah nami om püi gui vai. Nami mät naw nami mät nami m’hni ah mäih ah nami m’hni gui vai. Yan ä nangmi cu Egypt khaw ah khaw hei chang ah nami kya man ci nei, nami shüm ba vai. Kei cu Bawipa nami na Khanpughi nei.

³⁵ “Nüt nak, khiin nak, nän nak ung, a u chang phi kä nami thuvi nak vai.

³⁶ Düng ciah nüt nak, düng ciah khiin nak, düng ciah nän nak cu nami mang vai. Kei cu Bawipa nami na Khanpughi nei. Kei naw Egypt khaw ah kaa ka ning law püi ba gui ci.

³⁷ Ka thukhän gui la thumkhän gui avan nami läk vai nei. Kei cu Bawipa nei.”