TAIGÜTHUM 18 - Cho Bible Common Language 2016

Hlawi vai ah Ng’yawpawm nak

¹ Bawipa naw Moses am,

² Israel chang gui am am thein gui vai ah a pyen nak cu, “Kei cu Bawipa nami na Khanpughi nei.

³ Ayan ä nami om nak tuman ah Egypt chang gui ah om ih cu kä nami läk tu vai, kei naw tuhbäi ka ning hteh püi nak gui ah Kanaan khaw ah chang gui ah om ih phi kä nami läk vai.

⁴ Ka thukhän gui cu nami ngaih vai, ka thumkhän cu nami bi vai. Kei cu Bawipa nami na Khanpughi nei.

⁵ Kei naw ka ning pek gui ah om ih la thukhän gui cu nami läk vai; a cu cha ah bi ne nami hnun gui cu nami hun vai nei, kei cu Bawipa nei.”

⁶ Bawipa naw shin ah thungyo gui cu pe gui ci. Nami mätyah kyong chang awn kä nami ng’yawpawm en vai.

⁷ Na nu yawpawm ne na pa kä na m’thüi en vai. Na mät ah nu cu kä na thüi ng’aa sak vai.

⁸ Na pa ah a chu hei gui phi yawpawm pe ne, na pa kä na m’thüi en vai.

⁹ Im tumat ung nami om ung phi, kä nami om ung phi, na be, käcung, na ng’nam be cu kä na yawpawm en vai.

¹⁰ Na hta ah hta hnumi cu kä na yawpawm vai, cun naw na thang ni m’shet khai.

¹¹ Na be m’shum cu kä na yawpawm vai, ani phi na be ah kyak ci.

^12-13 Na nikhaw kä na yawpawm vai, ani cu na pa ah be ah baw, na nu ah pai nau ah baw kyak khai.

¹⁴ Na pukhaw ah chu kä na yawpawm vai, ani cu na pikhaw ah kyak ci.

¹⁵ Na hta m’shum hnumi cu kä na yawpawm vai.

¹⁶ Na phäi nau ah chu kä na yawpawm vai.

¹⁷ Na yawpawm tu man ah hta hnumi, kä cunung, a hta ah hta hnumi cu kä na yawpawm vai; ngami cu na mätyah ah kyak khai, ng’een aih khai.

¹⁸ Na chu a ghin yah ah chuih na chu ah pai nau kä na chu nak tuba vai.

¹⁹ A chashui law yah ciah hnumi cu kä na yawpawm vai, a i ah kyasei ci ung ani cu kä theingthap ci.

²⁰ Chang ah chu kä na yawpawm vai, cun naw kä ning theingthap sak khai.

²¹ Molek khanpughi khawihnah nak ung mang vai ah, na hta nau cu kä na ap gui vai. Acun naw Bawipa Khanpughi ah a ming ah thuui nak vai cu law püi khai nei.

²² A u pami phi ak pami paw awn kä a ng’yawpawm en vai, cun cu Khanpughi naw thüi nak ci.

²³ A u pami, a u hnumi phi khisa awn kä a ng’yawpawm en vai, cun ah akshe ung ng’hlah nak naw kä ning theingthap sak khai.

²⁴ Shin ah bilawh nak gui awn nami mät kä theingthap khai ah kä nami ci vai, cun cu khogam khawihnah ci gui naw ami mät kä theingthap khai ah ami bi nak ah kyak ci. Cun ah khogam khawihnah ci gui cu nangmi kä nami law pha ung cun ah khaw ung om pyi ci gui. Ngami cu Bawipa naw k’täm gui sei nangmi nami lut hlawt ci.

²⁵ Ngami ah hnünthawh naw khonglei kä theingthap sak ci, cun ah kyasei cun ah khaw cu Bawipa naw m’kyuk ne, acun ung om ciah chang gui cu hnungtuk püi gui ci.

^26-27 Ngami naw shin ah kä akni gui bi u ne, khaw cu kä theingthap sak ci gui, cun ung phi cun ah kä nami bi en tu vai. Nami van, Israel gui la nami om ghawm ciah khohei chang gui naw Bawipa ah ang thumkhän gui cu nami k’pan vai.

²⁸ Cun ung nangmi kä nami gawk pha ung ana om ciah khogam khawihnah ci gui cu khonglei naw a hnungtuk püi gui ah mäih ah, nangmi kä ning hnungtuk püi gui khai.

²⁹ Nangmi nami hmat ci, shin ah kä akni bik ciah chang phung cu, Khanpughi naw a chang tumat ah kä k’bäi ba khai.

³⁰ Cun kawn ah Bawipa naw, “Ka ning pek gui ah thumkhän cu läk vä, nangmi kä nami gawk law pha ung shin ah khaw ung ana om ci gui ah om ih gui cu kä nami läk en vai. A shin ah mäih bi nak awn nami mät kä theingthap khai ah kä nami ci en vai nei. Kei cu Bawipa nami na Khanpughi nei.