TAIGÜTHUM 17 - Cho Bible Common Language 2016

Si ah Theingcim nak

¹ Bawipa naw Moses am thumkhän ci,

² cun cu Aaron la a hta gui la Israel chang gui am a pek gui vai ah thungyo gui ah kyak ci.

^3-4 Israel chang a u naw phi Bawipa am douthak vai ah seipat, htome, me a ngawn ah a kyak ung, Bawipa ah om nak ah Phung valuh nak ung kä a ngawn ah khoi ung, ani cu Thukhän m’shet ciah kyak ci. Ani cu si lon sak ciah kyak ci, ani cu Khanpughi ah chang ah kä kya tuba khai.

⁵ Cun ah thumkhän ah a mawng cu Israel chang gui naw bung pya ah ami ngawn ciah seime cu Bawipa ah ami law püi vai ah phäh ah kyak ci. Ngami naw cun gui cu Phung ung valuh nak ung taigü ah law püi u neta, hmuhchum-douthak nak ah ami ngawn vai.

⁶ Taigü naw si gui cu Phung ung valuh nak, sonkiang ah akit gui ung a huk vai. A thau cu khu ne ng’ui sei Bawipa naw a yei nak vai ah am khih vai.

⁷ Israel chang gui cu kä bekhüt ne, kä ami kyak en ba vai bung pya ah khogam khawihnah nak ah seima kä ami ngawn en ba vai. Israel chang gui naw shin ah thungyo lawk ciah akhin avan ung ami pan khek vai.

⁸ A u Israel chang naw phi, ami ng’lung ah om tuk ciah a u khuihei chang naw phi, m’khih douthak nak, käcung a hei khawihnah nak a douthak cu,

⁹ Bawipa am douthak vai ah kyak ci kyasei, ani naw Phung ung valuh nak ah kä kyak ciah, a hei ah a ngawn ah a kyak ah khoi ung, ani cu Khanpughi ah chang ah kä kya ba khai.

¹⁰ Israel chang gui, kä cung ami ng’lung ah om tuk ciah khuihei chang gui naw, si om ciah sa a ei ah a kyak ung Bawipa naw hnu na ne ng’hlah tak khai, ani cu a chang tumat ah kä k’bäi ba khai.

¹¹ Akghing nü ah ghin nak cu si ung om ci, cun ah kyasei Bawipa ah thumkhän cu, si avan cu chang gui ah katnak nawt heng nak ah sonkiang khan ah lawn vai. Si cu ghin nak ah kyak ci, katnak nawt heng ci.

¹² Cun ah kyasei Bawipa naw Israel chang gui a pyen nak gui cu, ami mät, kä cung ami ng’lung ah om tuk ciah khuihei chang phung naw, si om yah ciah sa cu kä a ei vai.

¹³ A u Israel chang, ami ng’lung ah om tuk ciah a u khuihei chang naw phi, theingthap ciah khisa, kä cung kha a pha ah a kyak ung, asi cu m’dek ung a huk vai, m’dek awn alin vai.

¹⁴ Akghing phung ah ghin nak cu si ung om ci, cun ah kyasei Bawipa naw Israel chang gui a pyen nak gui cu, akyong ah si om ba ciah asa cu kä ei vai. Cun ei ciah chang cu ani ah chang ah kä kya ba khai.

¹⁵ A u phi, Israel chang, kä cung khuihei chang; amät sik ciah asa, kä cung a i naw bawh a lawh ah asa, ei ciah chang phung naw, a suisak am su vai, tui angsi vai, ani kä a theingthap ba pha ah chuih, mühun güt ung a güin vai.

¹⁶ Cun ah kä mi bi läi ung, ngami cu ami mät ah om ah phäh ah ami ma lam ung yaica khai gui.