TAIGÜTHUM 16 - Cho Bible Common Language 2016

Katnak Ma nak ah Hnüüp

¹ Aaron ah hta goi ani sih kawn ah Bawipa naw Moses am ng’thu pyen nak ci, ngani cu kä theingcim ciah mei Bawipa am douthak ni khäta, a ngawn goi ah kyak ci.

² Ani naw “Na nau Aaron am na m’thein ba vai, ani cu yihdung ah ak um a theingcim nak pikbäih ung amät ah khin bäng ung a hteh vai, a i ah kyasei ci ung cun ung, Thumkhän M’küm ah a khüm ah khan ung, khongmei ung kei cu ka ng’dang ci. Ani naw kä a ngaih ah a kyak ung ani cu ngawn vai kyak khai nei.

³ Ani cu katphyawn douthak nak vai ah vantang hta la m’khih ne douthak nak vai ah htome akhla hta a law püi kawn ah va, a theingcim nak pikbäih ung lut hlawt khai” cik ci.

⁴ Cun kawn ah Bawipa naw shin ah m’shümthein nak gui cu pek ci. Aaron cu a theingcim nak pikbäih ung kä a hteh pha ung, tui angsi vai, taigü sui gui a sui vai, Linen suinu la chi, kheipat la lupawng gui a sui vai.

⁵ Israel chang avan naw katphyawn douthak vai ah me amca hnih la m’khih ne douthak vai ah htome amca tumat ami pek vai.

⁶ Ani naw amät ah kat nawt heng nak vai la amät ah kyong chang ah phäh ah a khawihnah nak ah vantang cu a douthak vai.

⁷ Ani naw me hnih cu Bawipa ah om nak ah Phung valuh nak ung a law püi vai.

⁸ Lung hnih la ne m’hnüt ami tawk vai, tumat cu “Bawipa ah phäh,” a hei tumat cu “Azazela ah phäh” ah kyak khai.

⁹ Aaron naw Bawipa ah phäh ah m’hnüt tawk ne ghü ah me awn khawihnah ne, katphyawn douthak nak a douthak vai.

¹⁰ Azazela ah phäh ah ghü ah me cu akghing ah Bawipa am ap vai, bungpuk ah Azazela am thak vai. Cun cu chang gui ah katnak nawt heng nak ah kyak ci.

¹¹ Aaron naw amät ah phäh la a kyong khui ah phäh ah katphyawn douthak nak ah vantang awn a khawihnah law ah a kyak ung,

¹² ani naw sonkiang ungka meicak awn be ciah meidawn la, ang ui akni shum goi cu la neta, a theingcim nak pikbäih ung a law püi vai.

¹³ A cu ah Bawipa ah om nak ung ani naw ang ui cu mei ung a shum vai, cun ah ang ui ah ak khu naw Thukhän M’küm ah a khüm cu shung khai, cun ung ani cu a i kä hmuk khai, kä sik khai.

¹⁴ Ani naw vantang ah si amshah cu la neta, a khüm ah khan ah a kutpyün gui awn akpeh vai. Thukhän M’küm ah ama lam ung chih vei akpeh vai.

¹⁵ Cun kawn ah ani naw chang gui ah phäh ah katphyawn douthak ah me cu ngawn khai. Asi cu Atheingcim Pikbäih Hmun ung law püi neta, a khüm ah khan ah k’peh khai, cun kawn ah Thukhän M’küm ah ama ung k’peh khai, vantang ah si a bi ah mäih ah a bi ah kyak ci.

¹⁶ Ani naw shicha ah Israel chang gui ah kä theingthap nak la ami katnak avan ungka naw ng’gängsei nak cu Atheingcim Pikbäih Hmun ung ami bi ah kyak ci. Ani naw shin cu Phung ung a bi vai ah kyak ci, a i ah kyasei ci ung cun cu shaum pigaw ah ng’lung ung om ci, cun cu kä theingthap ci.

¹⁷ Aaron cu ng’gängsei nak bik khai ah Atheingcim Pibäih Hmun ung a luh ung tün ne, kä a luh law ba pha ah chuih Phung ah kyong ah a u phi kä a om vai. Ani cu amät ah phäh, akyong chang ah phäh la chang avan ah phäh ah ng’gängsei nak a bi kawn ah,

¹⁸ ani cu m’khih ne douthak vai la ng’gängsei vai ah sonkiang ung a hteh vai. Ani naw vantang ah si amshah la me ah si amshah cu la neta, sonkiang ah ak kit gui a lawi gui avan ung a mek vai.

¹⁹ A kutpyün awn si gui cu sonkiang ah khan ah chih vei ak peh vai. A shikcha ah ani naw Israel chang gui ah katnak cu ng’gängsei sak ne, theingcim nak a bi ah kyak ci.

Hlawt ah Me

²⁰ Aaron naw Atheingcim Pikbäih Hmun ung ng’gängsei nak a bi cu a pyi kawn ah Bawipa ah om nak ah Phung la sonkiang ung om ba ciah Azazela ah phäh ah ami ghü ah me akghing cu, ani naw Bawipa am a pek vai.

²¹ Ani naw a kut avan cu me ah lu khan ah taih neta, Israel chang gui ah ami shetkat avan, ami katnak avan, ami thüngphyong nak avan cu, acun ah khan ah ng’yu ne ng’paa nak ci, cun cu me ah lu khan ah k’plon yawp ah kyak ci. Cun kawn ah ami m’hnüt bäi ah chang am, me cu bung ah k’täm ne gawt sak ah kyak ci.

²² Cun ah me naw ami katnak avan phui ne, chang ah kä om nak ah khaw ah hteh püi khai.

²³ Cun kawn ah Aaron cu Phung kyong ah lut ne, Atheingcim Pikbäih Hmun ung kä a luh pha ung asui ah taigü suinu gui cu suut ba ci, a cu ah nawng shüt ci.

²⁴ Ani cu atheingcim hmun ung tui ng’si neta, amät ah sui cu a sui ba vai. Cun kawn ah ani cu hteit ba ne, amät ah katnak la cun ah chang gui ah katnak nawt heng nak ah m’khih ne douthak nak cu a douthak vai.

²⁵ Ani naw katphyawn douthak nak ah seime ah a thau cu sonkiang khan ah am khih vai.

²⁶ Bung hmu Azazela ah om nak ah me k’täm ciah chang cu shaum pigaw ah kä a law ba pha ung, asui am su vai, tui angsi vai.

²⁷ Vantang la me cu katphyawn douthak nak ah mang ah kyak ci, cun gui ah si cu katnak hteh püi khai ah Atheingcim Pikbäih Hmun ung hteh püi ah kyak ci, cun cu shaum pigaw ak pung hteh püi ne m’khih vai ah kyak ci. A vun, a sa la a chikyong avan cu m’khih vai.

²⁸ Cun m’khih ciah chang cu shaum pigaw ah kyong ah kä a law ba pha ung, asui am su vai, tui angsi vai.

Bui awt nak ah Hnüüp ngaih mah nak

²⁹ Shin ah thungyo gui cu lawk khai ah a khin avan ung ngaih mah nak gui vai ah kyak ci. A cha chih nak ah, a hnüüp gha hnüüp ung Israel chang gui la ami ng’lung ah om tuk ciah a khawhei chang gui cu ei ami hlawi vai, a i phi kä ami bi vai.

³⁰ Acu hnüüp ung bilawh ah thung gui cu bilo ne, ami katnak avan ung ng’gängsei sak gui vai. Cun ah kyasei ngami cu theingthap khai gui.

³¹ Cun ah hnüüp cu ang htei ah theingcim ciah hnüüp ah kyak ci. Ei ami hlawi nak la a i kä ami bi nak ah khaw hnüüp ät ah kyak ci. Shin ah thungyo gui cu lawk ciah a khin avan ung ngaih nak vai ah kyak ci.

³² Taigütung, apa ah khui m’düng khai ah phyuh theh ne, phyisä ne, ami ci naw, ng’gängsei nak ah bilawh thung cu a bilawh vai. Ani naw taigü sui cu a sui vai.

³³ Atheingcim Pikbäih Hmun, pawih ba ciah Bawipa ah om nak ah Phung, sonkiang, taigü gui, la chang gui avan ah ng’gängsei nak ah bilawh thung cu a bi vai.

³⁴ Shin ah thungyo gui cu lawk ciah a khin avan ung ngaih nak vai ah kyak ci. Shin ah bilawh thung cu Israel chang gui ah katnak avan ng’gängsei nak ah kum ät ung hnü ät ciah bi vai. Cun ah kyasei Moses naw Bawipa ah thumkhän ah mäih ah bik ci.