TAIGÜTHUM 15 - Cho Bible Common Language 2016

Pumsa ung Kä Theingthap ciah Kheihnai

¹ Bawipa naw Moses la Aaron am shin ah thungyo gui cu,

² Israel chang gui ah hmawk ah pe goi ci. Pami tumat ah a shäm ung kheihnai a om ah a kyak ung, kheihnai cu kä theingthap ci.

³ A shäm cu hnai ne hteu ciah a kyak ung phi, kik ba ciah a kyak ung phi kä theingthap ci.

⁴ Ani ah ngoh nak, ng’yän nak phung cu kä theingthap ci.

⁵ Ani ah a ih nak tawn ci phung, kä cung

⁶ ani ah ngoh nak ung ngok ci phung naw a suisak, am su ge vai, tui angsi vai, ani cu khaw mühun güt ung kä theingthap ciah kyak ci.

⁷ Kheihnai ciah chang tawn ci phung naw a suisak, am su vai, tui angsi vai, ani cu khaw mühun güt ung kä theingthap ciah kyak ci.

⁸ Theingthap ciah chang cu kheihnai ciah m’shitui naw ang peh ah a kyak ung, cun ah chang cu asui am su vai, tui angsi vai, ani cu khaw mühun güt ung kä theingthap ciah kyak ci.

⁹ Kheihnai ciah chang ah ngoh nak om nak cu kä theingthap ci.

¹⁰ Cun ah chang ah ngoh om nak a i phi tawn ciah chang phung cu khaw mühun güt ung ka theingthap ci. Cun ah chang ah ngoh om nak sochang ciah chang phung naw, asui am su vai, tui angsi vai, ani cu khaw mühun güt ung kä theingthap ciah kyak ci.

¹¹ Kheihnai ciah chang naw a kut kä m’si ah a hei chang tumat a tawn ah a kyak ung, a tawn ah chang naw asui am su vai, tui angsi vai, ani cu khaw mühun güt ung kä theingthap ciah kyak ci.

¹² Cun ah chang naw a tawn ah m’dek am phung cu m’sheiuh vai, a tawn ah sing k’bei phung cu m’si ba ge vai.

¹³ Kheihnai ciah chang cu ak khei a khan kawn ah hnüüp chih ung a om cang vai. Cun kawn ah asui am su vai, tuici lawng ung angsi vai, cun ung ani cu theingthap ciah kyak khai.

¹⁴ A hnüüp cheit hnüüp ung ani naw mümbawk hnih käcung mümkha hnih cu Bawipa ah om nak ah Phung valuh nak ung a law püi vai, taigü am a pek vai.

¹⁵ Taigü naw tumat cu katphyawn douthak nak, tumat cu m’khih ne douthak nak ah a douthak vai. Ani naw chang ah ng’gängsei nak vai cu shikcha ah a bi vai.

¹⁶ Chang tumat cu a patui a luh law ah a kyak ung a pum avan tui ung angsi vai, ani cu khaw mühun güt ung kä theingthap ciah kyak ci.

¹⁷ Tahsui ah phi kia, mehvun sui ah phi kia, a patui naw a kawh phung cu tui ung amsi ge vai. Cun cu khaw mühun güt ung kä theingthap ciah kyak ci.

¹⁸ Pami la hnumi cu ani ng’yaw kawn ung, ani nik hnih tui ani ng’si vai. Ngani cu khaw mühun güt ung kä theingthap ci goi ah kyak ci.

¹⁹ Hnumi tumat cu a chashui a law ah a kyak ung, ani cu hnüüp chih ung kä theingthap ci. Ani tawn ciah chang phung cu khaw mühun güt ung kä theingthap ci.

²⁰ Cun ah hnumi naw a chashui a law yah ung a ngoh om nak phung cu kä theingthap ci.

^21-23 Ani ah ngoh nak, ani ah ih nak tawn ciah chang phung naw, a suisak am su vai, tui angsi vai, ani cu khaw mühun güt ung kä theingthap ciah kyak ci.

²⁴ Pami tumat cu a chashui lawk ciah hnumi awn ani ng’yaw ah a kyak ung, ani cu hnumi ah kä theingthap nak naw ng’pe nak ci, ani cu hnüüp chih ung kä theingthap ci, ani ah ih ng’yän nak phung cu kä theingthap ci.

²⁵ Hnumi tumat cu a chashui ah a khin kawn ah khaw hnüüp akda ung asi a law ah a kyak ung, käcung a chashui ah a khin kawn ah asi a law ba lä ah a kyak ung, ani cu a chashui a law ah khin ah mäih ah asi a law ah chuih kä theingthap ci.

²⁶ Acun ah a khin ung ani ah ang yän nak phung, a ngoh nak phung cu kä theingthap ci.

²⁷ Cun ah hnumi tawn ciah chang phung cu kä theingthap ci, ani cu asui am su vai, tui angsi vai, ani cu khaw mühun güt ung kä theingthap ciah kyak ci.

²⁸ A chashui ang pyi kawn ah ani cu hnüüp chih ung a om cang vai, cun kawn ah ani cu theingthap ciah kyak khai.

²⁹ A hnüüp cheit hnüüp ung cun ah hnumi naw mümbawk hnih, käcung mümkha hnih cu Bawipa ah om nak ah Phung valuh nak ung, taigü ah ma ah a law püi vai.

³⁰ Taigü naw tumat cu hmaphyawn douthak nak ah, tumat cu m’khih ne douthak nak ah a douthak vai. Acu cha ah ani naw ang ng’gängsei nak vai cu a bi vai.

³¹ Israel chang gui ah kä ami theingthap nak akbäi nak gui vai ah Moses am Bawipa naw pyen nak ci. Cun ah kyasei ani ah om nak ah Phung cu ngami naw kä lelawi sak ci gui, cun cu shaum pigaw ah ang lung ung om ci. Cun ami bi ah a kyak ung ngami cu ngawn gui khai gui.

³² Shin gui cu kheihnai om ciah pami, käcung, a patui lawk ciah pami ah phäh ah thungyo,

³³ a chashui law yah ciah hnumi, käcung, hnumi kä a theingthap yah ung ng’yaw püi ciah pami gui ah phäh ah thungyo gui ah kyak ci.