TAIGÜTHUM 14 - Cho Bible Common Language 2016

Kheihlik nak Akawn ah Ng’gängsei nak

¹ Bawipa naw Moses am,

² kheilei ungka theek ci, ng’gängsei sak ah mawng thungyo gui cu pek ci. Ani cu theingthap ciah chang ah kyak ciah ng’shäu vai ah hnüp ung taigü ah om nak ah ami law püi vai,

³ taigü naw ani cu pigaw pung ah hteh püi neta ng’shi thäh khai. Khei nak cu theek sak pyi ciah a kyak ung,

⁴ taigü naw thukbäi khai, theek ciah kha hnih, acun awn a täng ah cedar sing k’peen hta, gui asen la sing lim a law püi vai.

⁵ Cun kawn ah kha tumat cu tuici lawng ungka ami kei ah, m’dek am ah khan ung ami ngawn vai ah taigü naw bäi gui khai.

⁶ Ani naw kha a hei tumat cu la ne, cedar sing ni, gui sen ni, singlim ni awn a täng ah a ngawn ah kha ah asi ung phung khai.

⁷ Ani naw kheilei ungka theek sak pyi ah chang ah khan ah cun ah si cu chih vei k’peh khai, cun kawn ah ani cu theingthap pyi ciah pyen ne ng’shäu khai. Ani naw kha akghing cu khaw häu ung k’phäi khai.

⁸ Cun ah bik ciah chang naw a sui m’su ne, alu k’teiu ne, tui angsi vai. Cun kawn ah ani cu theingthap khai. Ani cu pigaw kyong ah lut law hning ci, cun ung phi ani cu a shaum pigaw ah akpung ah hnüüp chih a om cang vai.

⁹ A hnüüp chih hnüüp ung ani cu alu ak teiu ba vai, am khamu, amikmu la asa ung om ciah amu phung ak teiu vai; asuisak gui m’su ne tui angsi vai, ani cu akcang ah theingthap khai.

¹⁰ A hnüüp cheit ung api ah phi kä kheihlik ne, kum ät lüng ciah htomehta akhla hnih la akhik tumat a law püi vai. M’htut den pie thum, olive situi awn k’caw la oliv situi k’am ah bum thum a ät a law püi vai.

¹¹ Taigü naw cun ah chang la douthak vai gui cu Bawipa ah om nak ah phung, valuh nak ung law püi khai.

¹² Cun kawn ah taigü naw htome hta tumat cu la ne, k’am ungka bum thum a ät situi awn a täng ah thungba nak douthak ah douthak khai. Ani naw taigü ah hmawk ah aktung ah m’cümhnah nak ah Bawipa am pek khai.

¹³ Ani naw cun ah htome hta cu katphyawn douthak nak la m’khih ne douthak nak ah seime gui ami ngawn nak ah theingcim ciah hmun ung ngawn khai. Ani naw shin cu a bi bä bä vai, a i ah kyasei ci ung katphyawn douthak nak ah mäih ah thungba nak douthak cu taigü ah kaa ah kyak ci, ang htei ah theingcim ci.

¹⁴ Taigü naw htome hta ah asi amshah cu la neta, theingthap ba ciah k’bäi vai ah chang ah akpat lam hnga koi, akpat lam kutnu la akpat lam khawnu ung a tha vai.

¹⁵ Taigü naw oliv situi amshah cu la neta, amät ah eng lam kut m’ya ung kei ne,

¹⁶ akpat lam a kutpyün tumat awn yuk tawk neta, Bawipa ah om nak ah kyong ah chih vei k’peh ci.

¹⁷ Ani naw a kut m’ya ungka situi amshah la htome hta ah si amshah cu la neta, theingthap ciah k’bäi vai ah chang ah k’pat lam nga koi, k’pat lam kutnu la k’pat lam khawnu ung mek ci.

¹⁸ Ani naw am ya ung pawih ba ciah si tui avan cu, cun ah chang ah lu khan ah yuk tha ci. Shikcha ah ani cu ng’gängsei nak abi vai ah kyak ci.

¹⁹ Cun kawn ah taigü naw katphyawn douthak nak, douthak ne ng’gängsei nak a bi vai ah kyak ci. Cun kawn ah ani naw m’khih ne douthak vai ah seime cu ngawn ne,

²⁰ htang douthak vai awn a täng ah sonkiang khan ah a douthak vai. A shikcha ah ani naw ng’gängsei nak cu a bi vai. Cun ung cun ah chang cu akcang ah theingthap khai.

²¹ Chang tumat cu douthak ne a i kä a pek hning ah a kyak ung, ani naw ang ng’gängsei nak vai ah thung ba douthak ah htome hta tumat bäng a law püi vai. Cun cu taigü ah phäh ah Bawipa am aktung ah m’cümhnah ah kyak ci. Ani naw htang douthak ah oliv situi awn k’caw ah m’htut den a pie la oliv situi k’am ung bum thum a ät a law püi vai.

²² Ani naw mümbawk hnih baw, mümkha hnih baw a law püi vai, tumat cu katphyawn douthak nak vai, tumat cu m’khih ne douthak nak vai.

²³ Ang ng’gängsei nak ah a hnüüp cheit hnüüp ung, ani naw cun gui cu Phung ung luh nak ung taigü ah ma ah a law püi vai.

²⁴ Taigü naw htome hta la oliv situi cu la neta, taigü ah phäh ah aktung ah m’cümhnah nak ah Bawipa am a pek vai.

²⁵ Ani naw htome hta cu ngawn ne, asi amshah cu la neta, cun ah chang ah k’pat lam hnga koi ni, pat lam kutnu ni, pat lam khawnu ni ung a mek vai.

²⁶ Taigü naw situi amshah cu amät ah eng lam kut m’ya ung kei ne,

²⁷ akpat lam a kutpyün gui awn tawk neta, Bawipa ah om nak ung chih vei ak peh vai.

²⁸ Ani naw si awn a mek nak ung situi awn phi a mek vai; chang ah pat lam hnga koi, akpat lam kutnu la akpat lam khawnu ung.

²⁹ A kut m’ya ung pawih ba ciah situi cu cun ah chang ah lu ung a tha vai. A cu cha ah ng’gängsei nak ah mawng cu bilawh vai.

³⁰ Cun kawn ah ani naw mümbawk kä cung mümkha tumat cu a douthak vai.

³¹ Cun cu katphyawn douthak ah kyak ci, a hei tumat cu htang douthak nak awn a täng ah m’khih ne douthak vai. Acun cha ah taigü naw ng’gängsei nak cu a bi vai.

³² Shin cu kheilei ung gaw ciah chang ah ng’gängsei nak vai ah ami k’bäi cu kä douthak hning ciah chang ah phäh ah thukhän ah kyak ci.

Imkyong ung Kheilei

³³ Bawipa naw Moses la Aaron am,

^34-35 kheilei ah ng’pe nak ah im gui ah a mawng cu shicha ah thungyo cu pe goi ci. (Shin gui cu Bawipa naw ami khäm vai ah a pek law gui vai ah Kanaan khaw ah ami luh kawn ah, Israel chang gui naw ami bi vai ah kyak ci.) Bawipa naw khei nak cu a im ung yuk chah sei chang tumat naw a hmuh ah a kyak ung, ani naw taigü am hteit ne am thein vai.

³⁶ Taigü naw khei nak ah mawng ng’shi thäh khai ah cun ah im ung kä a hteh pha ung, im ungka a päng avan a nawt heng sak gui vai. Im ung om ciah a päng nü cu kä theingthap ciah k’bäi vai ah kyak ci. Cun kawn ah ani cu cun ah im ah hteit ne,

³⁷ kheilei ah mawng cu ang shi thäh vai. K’paang ung kheilei ah kya ne ei ciah ang kying gui, asen gui, khei nak a om ah a kyak ung,

³⁸ ani naw im cu hteh ta ne, hnüüp chih ung a khai vai.

³⁹ A hnüüp chih hnüüp ani naw hteh ba shi ne ang shi thäh ba vai. Khei nak cu ng’shawng law pi ne a kyak ung,

⁴⁰ ani naw ak bäi gui cu, kheilei ah kawh nak ah lung cu la ne, mang gaw akpung, kä theingthap ciah hmun ung a ghawh vai.

⁴¹ Cun kawn ah ani naw a kyong täng paang cu hlook ne, plasta cu khawk neta, mang gaw akpung kä theingthap ciah hmun ung a tha vai.

⁴² Cun ah ghawh ah lung gui ah hnün ung, a hei lung gui tha ba vai, paang cu plasta akthai awn hluk ba vai.

⁴³ Lung gui ghawt ne, im cu k’tuh ne, hluk ne, pyan ba kawn ah kheilei naw a kawh ba nak ah a kyak ung,

⁴⁴ taigü naw hteit ne a teng ba vai. Cun cu ang shawng law pi ah a kyak ung im cu kä theingthap ciah kyak ci.

⁴⁵ Cun ah im cu phyet vai, lung gui sing k’peen gui, la hluk nak gui avan cu mang gaw akpung kä a theingthap nak ung hteh püi ne tha vai.

⁴⁶ Cun ah im khai yah ung lut ciah chang phung cu, khaw mühun güt ung kä theingthap ciah kyak ci.

⁴⁷ Cun ah im kyong ung ngok ci, ng’yän ci, käcung ei awk ciah chang phung naw a suisak am si ba ge vai.

⁴⁸ Taigü naw law ne a teng law ung, im cu hluk ba kawn ah kheilei kä ang dang ba ah a kyak ung, ani naw im cu theingthap ci, cine ang ng’shäu vai. A i ah kyasei ci ung kheilei cu maih khai ah heng pyi ah kyak ci.

⁴⁹ Im gäsei nak vai ah ani naw kha hnih, cedar sing ni, gui asen la sing ah a lim cu a law püi vai.

⁵⁰ Ani naw kha tumat mat cu tuici awn k’be ah m’dek am ah khan ah a ngawn vai.

⁵¹ Cun kawn ah ani naw cedar sing, sing lim, gui asen la ghing ciah kha cu a lak vai, cun kawn ah a ngawn ah kha ah asi ung la tuici ung ak phung vai. Cun kawn ah ani naw im cu chih vei akpeh vai.

⁵² Ashi cha ah ani naw im cu kha ah asi ni, tuici ni, kha akghing ni, cedar sing ni, sing lim ni, gui asen ni awn ang ng’gängsei sak vai.

⁵³ Cun kawn ah ani naw kha akghing cu mang gaw ah akpung khaw häu ung am shon vai. Ashicha ah ani naw im ah phäh ah ng’gängsei nak cu a bi vai, cun ung im cu theingthap khai.

⁵⁴ Shin gui cu kheilei gaw nak ah mawng thukhän gui ah kyak ci.

^55-56 Cun gui cu hlut, hnai, kä cung kheihlik gui; suisak la im ung om ciah kheilei nat nak gui ah kyak ci.

⁵⁷ Shin ah thukhän gui naw, a i yah ung kä theingthap ci, a i yah ung theingthap lawk ci, cicu dang sak ci.