TAIGÜTHUM 13 - Cho Bible Common Language 2016

Kheilei Natnak ah Mawng Thukhän gui

¹ Bawipa naw Moses la Aaron am shin ah thungyo gui cu pe goi ci.

² Chang tumat ung kheilei ah kya law hning khai ah akhei, am thak, ang gei cu avun ah khan ah a om ah a kyak ung, ani cu taigü Aaron ah ami hteh püi vai.

³ Taigü naw akhei nak cu ng’shi thäh neta, ani ah khei ung amu cu bawk ne, akhei cu a pei yung ah avun na ta, a thuuk law pi ah a kyak ung, kyih vai ah kheilei ah kyak ci. Cun cu taigü naw kä theingthap ciah chang ah kyak ciah ang ng’shäu vai.

⁴ Cun ung phi khei cu bawk ne, a pei yung ah avun ah kä thuuk pi ne, amu cu kä a bawk ah a kyak ung, taigü naw cun ah chang cu hnüüp chih ung amät kheei ne a om sak vai.

⁵ Taigü naw a hnüüp chih hnüüp ung ang shi thäh ba mä vai. A khei cu acun ah kiane kä pung law pi ciah ang ngaih ung, ani cu hnüüp chih ung kheei ne a om sak ba mä vai.

⁶ Taigü naw a hnüüp chih hnüüp ung ng’shi thäh ba mä neta, akhei cu hu law ne kä pung ba ciah a kyak ung, ani cu theingthap pyi ci nei, cine ang ng’shäu vai. Cun cu khei bäng ah phäh ah kyak ci. Cun ah chang naw a suisak am su vai, ani cu theingthap khai.

⁷ Cun ung phi taigü naw ng’shi thäh ne, ang ng’shäu kawn ah khei cu a pung law ba ah a kyak ung, ani naw taigü ah ma ah am dang ba vai.

⁸ Taigü naw ng’shi thäh ba mä neta, khei cu pung law ba ciah a kyak ung, ani naw kä theingthap ciah ang ng’shäu ba vai. Cun cu kyih vai ah kheilei ah kyak ci.

⁹ Chang tumat ung kyih vai ah kheilei a om ah a kyak ung, ani cu taigü ah hteh püi vai.

¹⁰ Ani cu taigü naw ang shi thäh vai. Acun ah khan ah ak khei cu bawk ne, mu gui phi bawk ne, hnai tui be ciah a kyak ung,

¹¹ cun cu kä ng’mang yäi ciah kheilei ah kyak ci. Taigü naw ani cu kä theingthap ciah ang ng’shäu vai. Ani kheei ne om sak vai kä hlü ci, a i ah kyasei ci ung ani kä theingthap ciah hmat yäi vai ah phäh ah kyak ci.

¹² Kheilei cu pung law ne, cun ah chang cu alu ungka naw a khaw ah khüt ne, ak khei law ah a kyak ung,

¹³ taigü naw ang shi thäh ba mä vai. Ani naw a pumsa avan küm sei a hmuh ah a kyak ung, cun ah chang cu theingthap ciah ang ng’shäu vai. Avun avan ng’lat ne a bawk ah a kyak ung ani cu theingthap ciah kyak ci.

¹⁴ Cun ah chang ung ak khei cu ng’auh ne angdang law ung ani cu kä theingthap ci.

¹⁵ Taigü naw ani cu ng’shi thäh ba mä neta, ani naw ng’auh ne khei cicu a hmuh ah a kyak ung, kä theingthap ciah ang ng’shäu vai. Ng’auh ciah khei cicu kyih vai ah kheilei ah kyak ci, cun ah chang cu kä theingthap ci.

¹⁶ Cun ung phi khei cu m’tui ung phi a bawk law ba ah a kyak ung, cun ah chang cu taigü ah a hteh vai.

¹⁷ Ani naw ng’shi thäh ba mä khai. Cun ah khei cu bawk ne ng’haam ciah a kyak ung, ani cu theingthap ciah kyak ci, taigü naw theingthap ciah ang ng’shäu vai.

¹⁸ Chang tumat cu khei sei, m’tui pyi ah kyak khai,

¹⁹ cun ung phi a bawk ah hnai ne, ak khei nak ung sen ne ng’um ne a kyak ung, ani cu taigü ah a hteh vai.

²⁰ Taigü naw ang shi thäh vai, ak khei cu a pei yung avun gui pum ung, thuuk law pi ne, cun ung amu gui cu a bawk law ah a kyak ung, ani naw kä theingthap ciah ang ng’shäu vai. Cun ah khei cu kheilei ah kya pyi ci.

²¹ Taigü naw ng’shi thäh ne a hmuh nak ung, ak khei ung amu gui cu a bawk ah kä ng’lat ne, a pei yung ah avun ung phi kä thuuk law pi ne, ng’haam law ba ciah a kyak ung, taigü naw ani cu hnüüp chih ung kheei ne a om sak vai.

²² Ak khei cu ang shawng law pi ah a kyak läi ung, taigü naw kä theingthap ciah ang ng’shäu vai, ani cu gaw ciah kyak ci.

²³ Cun ung phi cun cu a i ah phi kä kya ne, kä ng’shawng hnga ne a kyak ung, khei ungka ng’gaai düt ne a kyak ung läi, taigü naw theingthap ciah ang ng’shäu vai.

²⁴ Chang tumat mei naw ui khäta, ak khan asa cu bawk ne, kä cung, sen ne ng’um ne a kyak ung,

²⁵ taigü naw ang shi thäh vai. Ak khei ung amu gui cu a bawk ah ng’lat ne, a pei yung avun ung thuuk law pi ne a kyak ung, cun cu mei ah uih nak ung tün ne, kheilei ah kya lawk ciah kyak ci, taigü naw kä theingthap ciah ang ng’shäu vai.

²⁶ Cun ung phi khei ung a mu gui cu a bawk ah kä ng’lat ne, a pei yung ah avun ung phi kä thuuk law pi ciah a kyak ung, ng’haam lawk ciah a kyak ung, taigü naw hnüüp chih ung kheei ne a om sak vai.

²⁷ Taigü naw a hnüüp chih hnüüp ung ang shi thäh ba mä vai. Cun cu ang shawng law pi ah a kyak ung, kheilei ah kyak khai, taigü naw kä theingthap ciah ang ng’shäu vai.

²⁸ Cun ung phi khei cu acun ah kya ne, kä ng’shawng law pi hnga ne, ng’haam law ne a kyak ung, cun cu kheilei ah kä kyak khai. Taigü naw theingthap ciah ang ng’shäu vai, a i ah kyasei ci ung cun cu mei ah uih nak ung ang gaai ah kyak ci.

²⁹ Hnumi kä cung pami tumat cu, alu kä cung, ang being ung a hlut ah a kyak ung,

³⁰ taigü naw ang shi thäh vai. Cun cu a pei yung avun ung thuuk law pi ne, cun ung amu gui cu ng’ai law ne, am liik law ah a kyak ung, cun cu kheilei ah kyak ci. Ani naw cun ah chang cu kä theingthap ciah ang ng’shäu vai.

³¹ Taigü naw ng’shi thäh neta, hlut cu a pei yung avun ung kä thuuk law pi ne, acun ung amu gui cu kä khüi ba ne a kyak ung, ani naw hnüüp ung kheei ne a om sak vai.

³² Taigü naw cun ah hlut cu a hnüüp chih hnüüp teng ba neta, cun cu kä ng’shawng law pi ne, cun ung amu phi kä ng’ai law ne, a pei yung ah avun ung phi kä thuuk law pi ne a kyak ung,

³³ cun ah alu mu cu k’teiu pek vai, a hlut pei yung cu k’tang vai. Taigü naw ani cu hnüüp chih ung kheei ne a om sak ba mä vai.

³⁴ A hnüüp chih hnüüp ung taigü naw hlut cicu ang shi thäh ba vai. Cun cu kä ng’shawng law ne, a pei yung avun ung kä thuuk law pi ne, a kyak ung ani naw theingthap ciah ang ng’shäu vai. Cun ah chang naw a sui, am su vai, ani cu theingthap khai.

³⁵ Cun ung phi theing ciah ang ng’shäu kawn ah hlut cu ak khei law ba ah a kyak ung,

³⁶ taigü naw ang shi thäh ba mä vai. Hlut cu ak khei law pi ah a kyak ung amu ng’ai cicu teng ba vai kä hlü ci, cun ah chang cu akcang ah kä theingthap ciah kyak ci.

³⁷ Cun ung phi taigü ah hmuh nak ung, hlut cu kä pung ne, amu gui a gham law ba ah a kyak ung, hlut cu ng’mang pyi ciah kyak ci, taigü naw cun ah chang cu theingthap pyi ciah ang ng’shäu vai.

³⁸ Pami kä cung hnumi cu avun ung a bawk ah angdum ah a kyak ung,

³⁹ cun ah chang cu taigü naw ang shi thäh vai. Angdum cu a bawk ng’haam ah a kyak ung cun cu vun ung ang um düt ah kyak khai, cun ah chang cu theingthap khai.

^40-41 Pami tumat cu a hnu täng ah phi kia, amca täng ah phi kia, alu mu a kiawi ah a kyak ung, cun naw kä theingthap khai ah kä kyak sak ci.

⁴² Cun ung phi a cun ah lu ung sen kha shuuk ne ak khei law ah a kyak ung, cun cu kheilei ah kyak ci.

⁴³ Cun cu taigü naw ang shi thäh vai. Cun cu bawk ne hnai ciah hlut ah a kyak ung,

⁴⁴ taigü naw kä theingthap ciah ang ng’shäu vai. Cun cu alu ung kheilei ah ak khei ah phäh ah kyak ci.

⁴⁵ Kheilei ung gaw ciah chang naw sui kheei a sui vai, alu kä a huih vai, a hmai ak ka lam a uk vai, “Kä theingthap ci, kä theingthap ci” cine am lau vai.

⁴⁶ Ani cu cun ung a gaw ah chuih kä theingthap ciah kyak ci. Chang awn ng’shawng ne shaum pigaw ah k’pung ah a om vai.

Khei Nak ah Mawng Thukhän gui

⁴⁷ Kheinak ah kawh nak ah suisak, htomu kä cung linen,

⁴⁸ linen kä cung htomu suisak, kä cung me vun, me vun awn pian,

⁴⁹ cun cu ng’kyiing law ne baw, sen law ne baw a kyak ung, cun cu khei nak pung lawk ciah kyasei, taigü am m’hnuh vai.

⁵⁰ Taigü naw ng’shi thäh neta, hnüüp chih ung cun cu kheei ne a gim vai.

⁵¹ Ani naw a hnüüp chih hnüüp ng’shi thäh ba sei, khei nak cu ang shawng law ah a kyak ung, cun cu kä theingthap ciah kyak khai.

⁵² Cun cu taigü naw am khih vai, a i ah kyasei ci ung khei nak ah ng’pek nak cu mei awn m’di vai kyak ci.

⁵³ Cun ung phi ng’shi thäh neta, cun ah khan ah khei nak cu kä ng’shawng law hnga ciah taigü naw a hmuh ah a kyak ung,

⁵⁴ tui awn m’si neta, hnüüp chih ung a hei ah gim ba mä vai ah ani naw pyen khai.

⁵⁵ Cun kawn ah ani naw ng’shi thäh ba mä khai, cun ah khei nak cu amüi kä ng’thawng ci kyasei, kä ng’shawng law pi ciah a kyak ung phi, cun cu kä theingthap lä ci. Cun cu mei awn m’khih vai, a i ah kyasei ci ung, cun cu a hnu täng baw, ama täng baw thuk ciah kyak ci.

⁵⁶ Cun ung phi taigü naw ng’shi thäh ba mä neta, khei nak cu ng’haam lawk ciah a kyak ung, sui ungka ah a kyak ung phi mehvun ungka ah a kyak ung phi, ani naw ak teh vai.

⁵⁷ Cun kawn ah khei nak cu ang dang law ba mä ung, cun cu pung law ba ciah kyak ci. Cun cu ka mah naw am khih vai.

⁵⁸ Ani naw cun cu tui awn m’si sei, khei cu kä ang dang law ba ah a kyak ung, ani naw tui ung amsi ba vai, cun ung cun cu theingthap ciah kyak khai.

⁵⁹ Shin cu suisak ah khan ung khei nak a kawh ah mawng thukhän ah kyak ci. Cun ah suisak cu, htomu baw, linen baw, linen ah ak khan ah baw, kä cung htomu sui, käcung mehvun awn pyan ah kyak ci; Shin cu theingthap ci la kä theingthap ci, a i hawkcha ah m’hnüt bäi nak ah mawng thukhän ah kyak ci.