TAIGÜTHUM 12 - Cho Bible Common Language 2016

Hta ciah Hnumi ah Ng’gängsei nak

¹ Bawipa naw Moses am shin ah thungyo gui cu

² Israel chang gui ah hmawk ah pek ci. Hnumi cu pami ah a hta ung hnüüp chih ung kä theingcim ci, cun cu a chashui a om khin ah mäih ah kyak ci.

³ A hnüüp cheit hnüüp a hmaw cu kyon vai ah kyak ci.

⁴ Ani a theingthap ba nak vai cu hnüüp 33 hlü ba ci, asi ang chawt nak ungka naw tün ah kyak ci. Ani naw theingcim ci phung kä a tawn en vai, ang ng’gängsei nak kä a khüm pha ah chuih, theingciim ciah Phung ung kä a luh en vai.

⁵ Hnumi cu hnumi hta ah a hta kawn ah hnüüp gha lei phli ung kä theingthap ci, ani cu a chashui a om yah khin ah mäih ah kyak ci. Cun cu asi ang chawt nak ungka naw akcang ah kä a theingthap ba nak pha hnüüp chukip lei chuk ah akyong ah kyak ci.

⁶ A hta pami, käcung hnumi ah phäh ah ang ng’gängsei nak ah akhin, a khüm ah a kyak ung, ani naw Bawipa ah om nak ah Phung ah luh nak ung, taigü am m’khih ne douthak vai ah kum ät lawk ciah htome hta la katphyawn douthak nak vai ah mümkha baw, mümbawk baw a thak law vai.

⁷ Ani ah douthak nak cu taigü naw Bawipa am pek khai, cun ung ani ah kä theing nak cu k’täm ne nawt heng pek khai, ani cu akcang ah theingthap khai. Shin cu hnumi naw a hta kawn ung abi vai ah kyak ci.

⁸ Hnumi naw htome cu kä a m’hnüt law hning ah a kyak ung, ani naw mümkha hnih baw, mümbawk hnih baw a law püi vai. Tumat cu m’khih ne douthak nak vai, tumat cu katphyawn douthak nak vai ah kyak khai. Taigü naw ani ah kä theing nak cu k’täm ne nawt heng pek khai, ani cu akcang ah theingthap khai.