TAIGÜTHUM 11 - Cho Bible Common Language 2016

Ei ah Khisa gui

¹ Bawipa naw Moses la Aaron am shin ah thungyo gui cu pe goi ci.

² Cun cu Israel chang gui ah phäh ah kyak ci. Nangmi naw khaw kawng ah khisa gui nami ei vai.

³ Cun gui cu a khawpaw ng’kye ci la a ei m’däuh ciah kyak khai.

^4-6 Cun ung phi kalauk ni, ng’hlui ni, vi ni kä nami ei vai. Cun gui cu kä theingcim ci gui, m’däuh ne ei ci gui, cun ung phi ami khawpaw kä ng’kye ci.

⁷ Vawk kä nami ei vai. Vawk cu kä theingcim ci, vawk cu a khawpaw ng’kye ci, cung phi ei kä m’däuh ci,

⁸ Cun ah khisa gui cu kä nami ei vai. Sik ciah a pumsa phi kä nami tawn vai, cun cu kä theingcim ci.

⁹ Apaai la akphlep om ciah nga phung cu nami ei vai,

¹⁰ cung phi apaai la akphlep kä om ciah tui ung nga phung cu kä ei vai.

¹¹ Cun ah ak ghing gui cu kä theingcim ciah kyak ci. Cun gui cu kä nami ei vai, sik ciah a pumsa phi kä nami tawn en vai.

¹² Apaai la akphlep kä om ciah tui ung om ciah ak ghing phung kä nami ei vai.

^13-19 Nangmi naw shin ah kha gui cu kä nami ei phung vai; Ghui langta, pängpät, phle, beek, hmukiung, langta, kaap, kalauk kha, ngamyawk, ngaleek, ngayap kha gui, ngamyawknu, ngacep, la palak gui ah kyak ci.

²⁰ Ang phia om ciah khamkho gui avan kä theingcim ci.

²¹ Cun ung phi phli khaw nak ci, ng’phäi ne hteit cicu theing ci.

²² Khanpeh, khingkhighi la khankho kying cu nami ei vai.

²³ Cun ung phi ang phia om ciah khamkhaw ak yaw hta gui la ng’vaak ci gui avan cu kä theingcim ci.

^24-28 Aka ungka ah khisa gui ah sik ciah pumsa tawn ciah chang phung cu, khaw mühun güt sei kä theingcim ci. A khawpaw mah gui avan, cun ung phi a khawpaw kä ng’kye ci gui la ei kä m’däuh ci gui cu nawng ne, phli khaw nak ciah apha mah gui avan ah kyak ci. Acun gui ah aksi pumsa phui ci phung naw asuisak am su ba ge vai, cun ung phi ani cu khaw mühun güt ung kä theingcim ci.

^29-30 Bui, pui, bang la taang gui cu kä theingcim ci.

³¹ A cun gui la acun gui aksi ah pumsa tawn ciah chang phung cu khaw mühun güt ung kä theingcim ci.

³² Acun ah aksi gui ah pumsa naw a kyak shi phi kä theingcim ci. Shin ah thungyo naw am dang cu sing, suisak, savun, samu ah khan ah a kyak shi ung phi, kä mang düt vai, cun cu tui ung hnawm vai. Cun ung phi cun cu mühun güt ung kä theingcim ci.

³³ Cun ah pumsa cu m’dek am mah khan ah a kyak ung, acun ah kyong ah om ci phung cu kä theingcim ci, k’am cu m’sheiuh vai.

³⁴ Cun ungka ei phung cu ei vai kyak ci, cun ung phi cun ah k’am ungka ah tui naw alon phung cu kä theingcim ci. Cun ah k’am ungka awk vai phung cu kä theingcim ci.

³⁵ Aksi ah pumsa naw a kyak shi phung cu kä theingcim ci, m’thulung, meibum cu gäi vai.

³⁶ Cun ung phi tuibüm, tui shawk cu theingcim ci. Acun gui ah aksi pumsa naw a tawn phung cu kä theingcim ci.

³⁷ Cun gui cu phu geit vai ah geit m’shi ah khan ah a kyak ung geit m’shi cu theing ei ci.

³⁸ Cun ung phi tui ung m’shik pyi ah geit m’shi ah khan ah tumat mat a kyak ung läi cun cu kä theingcim ci.

³⁹ Ei man ah khisa a sih ah a kyak ung acun tawn ciah chang cu khaw mühun güt ung kä theingcim ci.

⁴⁰ Chang tumat mat naw cun ah pumsa api ah phi a ei ah a kyak ung, ani naw a suisak amsu ba vai, cun ung phi ani cu khaw mühun güt ung kä theingcim ci. Aksi ah pumsa sawchang ciah chang phung naw, a suisak am su vai, cun ung phi ani cu khaw mühun güt ung kä theingcim ci.

⁴¹ M’dek ung hnüntho ciah khisa aläm hta gui cu kä nami ei vai.

⁴² Cun gui cu ng’vaak ciah phi kyak khai, a khaw phli awn hteit ciah phi kyak khai, a khaw akda awn hteit ciah phi kyak khai.

⁴³ Shin ah mäih gui ei aw ne, nami mät naw nami mät kä theingcim khai ah kä nami ci en vai.

⁴⁴ Kei cu Bawipa nami na Khanpughi ah kyak ci, nangmi cu nami theingcim vai, a i ah kyasei ci ung kei cu ka theingcim ci.

⁴⁵ Kei cu Egypt ungka ka ning law püi ba gui ciah Bawipa, cun ah kyasei kei cu nami Khanpughi ah ka kyak ci. Nangmi cu nami theingcim vai, a i ah kyasei ci ung kei cu ka theingcim ci.

⁴⁶ Shin cu khisa gui la kha gui ah mawng thukhän, tui ung om ci nü ah mawng, kawng ung hnüntho ci nü ah mawng, thukhän ah kyak ci.

⁴⁷ Nangmi naw geing na ne nami ng’thumcha vai cu, theingcim ci la kä theingcim ciah ng’lakmah nak, ei vai ah khisa la kä ei vai ah khisa ah ng’lakmah nak gui ah kyak ci.