TAIGÜTHUM 10 - Cho Bible Common Language 2016

Nadab la Abihu ah Katnak

¹ Aaron ah hta gui Nadab la Abihu naw mei-dawn la phäh phäh ni ne, acun ung meicak tha ni ne, tui ng’ui awn shawi neta, Bawipa am pek ci goi. Cun ung phi cun ah mei cu kä theingcim ci, a i ah kyasei ci ung cun ah ani pek vai ah Bawipa naw thumkhän kä pe goi ci.

² Ang ghit ah Bawipa naw mei yuk chah law sei, acun naw Bawipa ah ma ge ung sik khai goi ah k’ui goi ci.

³ Cun kawn ah Moses naw Aaron am, “Shin cu Bawipa naw a yuk ng’thu law yah ung a pyen ah mawng ah kyak ci, ‘Kei ah khuut bik ci phung naw kei ah theingcim nak cu a kyih aa vai; kei naw ka bämang nak cu ka chang gui ung ka m’than khai’ cik ci.” Cun ung phi Aaron cu kä chawkchek ne om ci.

⁴ Moses naw Aaron ah pukhaw Uzziel ah hta goi, Mishael la Elzaphan cu khü goi neta a pyen nak goi cu, “Shi ah law neta, nami phäi goi ah pumsa cu theingcim ciah k’pyu ungka hteh püi ne, Phung ah akpung ah tha ni ä.”

⁵ Ngani naw law ni ne gook gui cu suisak mah ah, Moses naw thumkhän ne a pyen nak goi ah mäih ah Phung ah akpung ah hteh püi ci goi.

⁶ Cun kawn ah Moses naw Aaron la a hta goi Eleazar la Ithamar am, “Nani lu kä huih ne kä nani om en vai, nani thüisei ciah mäih ah nani sui kä nani k’teh en vai. Cun ah nani bi ung nani sik khai, chang van ah khan ah Bawipa cu m’lungshe khai. Cun ung phi nami Israel chang gui ami van cu Bawipa naw a yuk chah law ah mei awn sik ciah phäh ah ami kyah vai nei.

⁷ Pung ung valuh nak cu kä nami hteh tak vai, kä cung nami sik khai. A i ah kyasei ci ung nangmi cu hluknak ah Bawipa ah situi awn theing pyi ah nami kyak ci. Cun ah kyasei ngami cu Moses ah pyen ah mäih ah bik ci gui.

Taigü gui ah Thum

⁸ Bawipa naw Aaron am,

⁹ “Nang la na hta gui cu yu baw, beer baw nami awk phung ung kei ah om nak ah Phung ung kä nami valuh en vai, nami luh ung nami sik khai. Shin cu nami htangshon avan naw nami k’pan vai ah thukhän nei.

¹⁰ Nang naw na ng’thumcha vai cu Khanpughi ah a khäm la mang hmün vai ah ng’lakmah nak, theingcim ci la kä theingcim ci gui ah ng’lakmah nak gui ah kyak ci.

¹¹ Kei naw Moses ung ka ning pek gui ah ng’thukhän avan cu Israel chang gui am na m’thein gui vai nei.”

¹² Moses naw Aaron la om ba ciah a hta goi Eleazar la Ithamar am, “Bawipa am ei-douthak ungka pawih ciah htang-douthak cu na lak vai, acun awn k’caw kä shum ah m’htut cu pyang neta, sonkiang pei ah nami ei vai, a i ah kyasei ci ung cun ah douthak cu anghtei ah theingcim ciah kyak ci.

¹³ Cun cu a theingcim nak ung nami ei vai, cun cu Bawipa am douthak ah ei ungka, nang la na hta gui ah chaw ah kyak ci, cun cu Bawipa naw kei ung ana thumkhän ah kyak ci.

¹⁴ Nang la na kyongchang gui naw, taigü gui ah hmawk ah Bawipa am aktung ah m’cümhnah la aktung ah pektak ah amakaw la aphei khaw gui cu nami ei vai. Nangmi naw cun gui cu a i yah ah phi a theing nak ung nami ei hning ci. Israel chang gui ah hmuhchum-douthak nak ungka shin ah douthak gui cu nangmi ah chaw ah nang la na hta gui am ning pek gui nei.

¹⁵ Cun ah khin ung ngami naw aphei khaw la amakaw cu ami law püi vai, a thau cu ei-douthak ah Bawipa am pek vai. Shin avan cu Bawipa ah thumkhän ah mäih ah nang la na htanau gui naw ngawiyä nami khäm vai ah kyak ci.

¹⁶ Moses naw katphyawn douthak nak ah me ah mawng ng’shi gui neta, ami m’khih pyi ah kyasei hmat ci. A shin ah phäh ah ani cu Eleazar la Ithamar ah khan ah m’lungshe neta ani naw ak thäh cu,

¹⁷ “A i ah kyasei nangmi naw katphyawn douthak nak cu a theing nak ah hmun ung nami ei ang? Shin cu ang htei ah theingcim ci, chang van ah katnak nawt heng nak vai ah Bawipa naw a ning pek gui ah kyak ci.

¹⁸ Cun ah si cu theing ciah Phung kyong ah kä law püi man nei, kei ah thumkhän ah mäih ah khawihnah nak cu acu ah nami ei yawp vai.”

¹⁹ Aaron naw, “Tuhngawi katphyawn-douthak nak kei naw ka ei ah a kyak ung, Bawipa naw shin ah kyihkyawk vai gui cu kei ah khan ah gawk law sak sä cik ci.

²⁰ Moses naw cun cu ng’ya neta yum ci.