TAIGÜTHUM 1 - Cho Bible Common Language 2016

Avan m’khih ne khawihnah nak

¹ Bawipa ah om nak ah Phung ungka naw Bawipa naw Moses cu khü neta, shin ah thu gui cu pek ci;

² Cun cu Israel gui naw khawihnah nak ami douthak law ung ami läk vai ah kyak ci. Chang tumat naw seime awn a khawihnah douthak law ung cun cu amät ah sei ah baw, me ah baw, htome ah baw kyak khai.

³ Ani naw sei tumat awn m’khih ne a douthak law ung api ah phi kä kheihlik ciah vantang cu a law püi vai. Ani naw Bawipa ah om nak ah Phung valuh nak ung a tha vai. Cun ung Bawipa naw ani cu dou khai.

⁴ Acun ah lu ah khan ah chang naw a kut a taih vai, Cun ung ani ah katnak hteh püi pyi ciah kyasei cun ah khawihnah nak cu dou pek khai.

⁵ Ani naw sei cu acu ah ngawn khai, Aaron taigü gui naw asi cu Bawipa am pek khai gui. Cun kawn ah Phung ah luh nak ung om ciah sonkiang ah akit phli ung k’peh khai gui.

⁶ Cun kawn ah ngawn ci naw avun lim ne m’sak khai.

⁷ Cun kawn ah taigü gui naw sonkiang khan ah sing hnawn u ne, m’khih khai gui.

⁸ Ngami naw khisa m’saa gui cu mei ung k’bum khai gui, alu la a thau mah ah m’khih khai gui.

⁹ A chi kyong ah kaa la a khaw gui cu chang naw tui awn am si vai, taigü bawi gui naw sonkiang ung khawihnah nak avan cu ami m’khih vai. Cun ah ei-douthak ah ang ui cu Bawipa naw yei nak ci.

¹⁰ Chang naw a me baw, a htome baw a douthak ah a kyak ung, cun cu amca ah kyak khai, kä kheihlik en khai.

¹¹ Ani naw sonkiang ah alu täng ah a ngawn vai, taigü gui naw sonkiang ah akit phli ung asi cu ami k’peh vai.

¹² Cun ah chang naw amsaa yawp ung taigü bawi naw cun gui avan cu mei ung shum khai, alu la a thau mah ah shum khai.

¹³ Cun ah chang naw apuk kyong ah kaa gui la a khaw gui cu m’si khai, taigü naw khawihnah nak cu Bawipa am pe ne, cun avan cu sonkiang khan ah m’khih khai. Cun ah ei-douthak ah ang ui cu Bawipa naw yeikyai nak ci.

¹⁴ Chang tumat naw m’khih ne douthak ah kha a douthak law ah a kyak ung cun cu mümkha käcung müm bawk ah kyak khai.

¹⁵ Cun cu taigü naw sonkiang khan ah pek khai, cun cu alu ten pit neta sonkiang khan ah am khih vai. Asi cu sonkiang ah akpung a hnu täng ah am soi vai.

¹⁶ Ani naw a ei paw la acun ungka gui cu la neta, sonkiang ah ak kyang lam m’vut phlu nak ung a ghawh vai.

¹⁷ Ani naw ang phia gui ung k’pang ne apum cu hleei ne, ang phia cu kä hleei en neta, avan cu sonkiang khan ah am khih vai. Cun ah ei-douthak ah ang ui cu Bawipa naw yeikyai nak ci.