SUKI GUI 9 - Cho Bible Common Language 2016

Abimelek

¹ Kideon ah hta Abimelek naw anu ah mät yah gui ami van ah om nak Shekhem gawnu ah hteit neta, a pyen nak gui cu,

² “Shekhem chang gui am ami m’thein gui vai cu, “A i ang nami ghü kaw? Kideon ah hta chih-kip avan ah uknak ang? Käcung tumat bang ah uknak ang? Nami shüm ba vai cu Abimelek cu ami mät ah si la sa ah kyak ci nei” cik ci.

³ Anu ah mätzah gui naw Shekhem chang gui am ani ah hmawk ah shin ah a mawng cu m’thein gui ci gui, Shekhem gui naw Abimelek cu läk vai ah k’bäi ci gui, a i ah kyasei ci ung ani cu ami mätzah ah kyak ci.

⁴ Ngami naw Baala-ah-thukhäm pum im ung ka ngui chih-kip la u neta ani am pek ci gui, acun ah ngui awn ani naw chang pyai gui ng’vat gui ci.

⁵ Ani cu apa im, Ophrah ah hteit neta, lung tumat ah khan ah aphäi nau gui chih-kip, Kideon ah hta gui cu ngawn gui ci. Cun ung phi Jotham, Kideon ah hta ak hmaw pi cu ng’thup pei sei kä ngawn tuk ci.

⁶ Cun kawn ah Shekhem la Bethmilo ung chang gui ami van cu a täng ah ng’bum u neta, Shekhem ung hlim ghing theing ah hteit ci gui, acu ah Abimelek cu ghangpughang ah m’düih ci gui.

⁷ Cun ah a mawng cu Jotham naw ng’ya neta, Kerizim m’htung lai ah hteit ne ng’düi ne, m’lau ne a pyen nak gui cu, “Na ngai vä, Shekhem chang gui aw, cun ung Khanpughi naw ning ngai gui khai nei!

⁸ Huü ät ung sing ghing gui cu ami mät naw, ami mät ah ghangpughang ghü khai gui ah ng’bum ci gui. Ngami naw Olive-sing am ‘Kami ghangpughang ah kya ä’ cik ci gui.

⁹ Olive-song naw, ‘Kei naw ka ning uk gui vai a kyak ung, khanpughi gui la chang gui m’tamkhah nak vai ah mang ung kei ah ka k’pli ka kyak cu ka ng’düm sak khai nei’ cik ci.

¹⁰ Cun kawn ah sing ghing gui naw thei-ghing am, ‘Nang law ne, keimi ah ghangpughang ah kya ä’ cik ci gui.

¹¹ Cun ung phi thei-ghing naw, ‘Nangmi ka ning uk gui vai a kyak ung, kei naw tui ciah ka m’theih k’ni ka kyak cu ka ng’düm sak thai nei’ cik ci.

¹² Cun ah kyasei sing-sing gui naw Sapyit shun mä ami pyen nak cu, ‘Nang law ne kami ghangpughang ah kya ä’ cik ci gui.

¹³ Cun ung phi Sapyit shun naw, “Nangmi ka ning uk gui vai a kyak ung, khanpughi gui la chang gui yeikyai sak ciah sapyit tui ka kyak cu ka ng’düm sak khai nei” cik ci.

¹⁴ Cun kawn ah sing-ghing gui ami van naw hling-kyam am, ‘Nang law ne, keimi ah ghangpughang ah kya ä’ cik ci gui.

¹⁵ Hing-kyam naw, “Kei cu nami ghangpughang ah akcang ah nami na hmoh hlü ah a kyak ung, kei ah hnim ung law ne nami ng’zii law vai. Cun ah kä nami kyak ung ka hlin ban gui ung ka mei lut law ne Lebanon sing gui cu ui yawp khai” cik ci.

¹⁶ Jotham naw k’täi ne pyen ne, “Cun kawn ah, nangmi cu Abimelek ghangpughang ah nami hmoh yah ung akcang ah yum nak la m’tam nak om ne ang? Kideon naw shüm vai ah abi gui cu nami chang m’sui ne ang, akyong chang gui mä abi awn khinkha khai ah nami m’htei ciah kya ne ang?

¹⁷ Nami shüm vai nei, kapa naw nangmi ah phäh ah ng’tuk bik ci. Ani naw a hnunggui pe ne Midianit gui ah kut tung ka ning hun gui ci.

¹⁸ Cun ung phi tuhngawi nangmi naw kapa ah kyong chang cu ng’hlat ne nami hnu ng’tuk püi ci nei. Nangmi naw a hta gui, chih kip cu lung tumat ah khan ah nami ngawn ci, Abimelek, akchang sham hnumi awn ani hta cu Shekhem ghangpughang ah nami hmoh ci.

¹⁹ Tuhbäi, tuhngawi nangmi naw Kideon la akyongchang ah khan ah nami bi cu dung ne nik ciah a kyak ung Abimelek awn nami yeikyai khai, ani phi nangmi awn yeikyai khai.

²⁰ Kä cun ah a kyak ung, Abimelek ung ka mei tho law ne, Shekhem la Bethmillo ung chang gui cu ui yawp sä. Shekhem la Bethmillo ung chang gui ung ka mei tho ne Abimelek cu ui sä” cik ci.

²¹ Cun kawn ah aphäi Abimelek kyih neta, Jotham cu dawng ne, Beer ah hteit ne om tuk ci.

²² Abimelek naw Israel cu kum thum ung uk ci.

²³ Cun kawn ah Khanpughi naw Abimelek la Shekhem chang gui cu ng’gen sak gui sei, ngami naw ani cu hnung’tuk püi ci gui.

²⁴ Shin ah a kyak cu, Abimelek la Kideon ah hta chih-kip ngawn vai ah k’tha pek ciah Shekhem chang gui naw ami hmakat nak ami chaw nak ah kyak ci.

²⁵ Shekhem chang gui naw Abimelek hnu ng’tuk püi u ne, m’htung lai ung mah khai ah chang tha ci gui. Ngami naw cunah lam ung hteit ciah chang päng guttep ci gui. Acun ah mawng cu Abimelek am chang gui naw m’thein ci gui.

²⁶ Ebed ah hta Kaala cu a phäi nau gui awn Shekhem ah lawk ci, Shekhem chang gui naw ani cu yum ci gui.

²⁷ Ngami ami van ami sapyit lo ah hteit ci gui, sapyit theih bit u ne, sapyit tui pyang ci gui, cun kawn ah pawi bik ci gui. Ngami cu ami Khanpughi ah pum im ah hteit u ne, a cu ah ei aw u neta, Abimelek ah mawng pyen ne gaih ci gui.

²⁸ Kaala naw, “Mikmi Shekhem chang gui cu a i ah mäih chang gui ang? A i ah kyasei Abimelek ah bi mi bi ang? A ni a u ang? Kideon ah hta ah kä kia ne ang? Zebula naw ani ah ng’thu ngai ci, cun ung phi a i ah kyasei mikmi ani ung mi ng’bi vai ang? Nami pahta m’düih ciah nami pupa Hamor ung bekhüt vä!

²⁹ Kei naw shin ah chang gui ma ka tawn läi ung, Abimelek cu ka nawt heng khai nei! Kei naw ani ka pyen nak khai, “Na gakap gui k’tha be sak ne, law ne na tu law ä!”

³⁰ Kaala naw cun a ci cu, mang gaw uktu Zebula naw ng’ya neta m’lungshe ci.

³¹ Ani naw Arumah ung Abimelek am chang tüi ne a pyen nak cu, “Ebed ah hta kaala la anau gui cu Shekhem ah lawk ci gui nei, ngami naw nang cu mang gaw ung kä ning luh sak khai gui nei.

³² Nang la na chang gui cu mü ung hteit u ne, loma ung nami ng’thuh vai nei.

³³ Khongawi ah hni pyii ung tho law u ne, mang gaw cu ang ghitah nami tuk vai nei. Kaala la ak chang gui naw ning tu gui khai ah ami law ah a kyak ung, nami tha gui avan awn nami tuk gui vai nei! cik ci.

³⁴ Cun ah kyasei Abimelek la ak chang gui cu mü ung hteit u ne, Shekhem gaw k’pung ah k’phli ah ng’pai ne ng’thup ci gui.

³⁵ Abimelek la ak chang gui naw Kaala lut law ne, mang gaw m’kawt un gang düih cu hmu u neta, ami ng’thuh nak ungka naw tho lawk ci gui.

³⁶ Kaala naw hmu gui neta Zebula am a pyen nak cu, “Teng ä! M’htung-lai ah ka chang gui kyum lawk ci gui nei!” Zebula naw, “Cän gui kä chang gui nei, Khomhtung ung püpüi gui nei” cik ci.

³⁷ Kaala naw pyen ba ne, “Cän chang gui nei, m’htung lai ung ka kyum lawk ci gui, amshah cu ng’cä-bang ciah oak-sing ungka naw lam ung lawk ci gui nei!”

³⁸ Cun kawn ah Zebula naw ani am, “Ak ghuih ah na ng’thu gui ca a hawi ang? Shin ah chang Abimelek ung a i ah kyasei mi ng’bi ang cik cicu nang ngah maw. Shin gui cu nang naw na gaih tu ah chang gui nei. Atuhbäi hteit ne tu gui ä” cik ci.

³⁹ Kaala naw Shekhem chang gui chäng gui ne Abimelek cu tuk ci.

⁴⁰ Kaala cu dawng sei, Abimelek naw gawt ci. Mang gaw m’kawt zung pum ah chang gui akda cu leim bai ci gui.

⁴¹ Abimelek cu Arumah ung om ci Zebula naw Kaala la a phäi nau gui cu Shekhem ung ka k’täm gui ci, cun ah kyasei ngami cu cun ung kä om tu ba ci gui.

⁴² A ngawi ung Abimelek naw Sechem chang gui cu ami lo ah hteit khai gui ah pawng u sei hmu gui ci.

⁴³ Cun ah kyasei ani naw ak chang gui la gui ne, thum ah k’pai gui neta, loma ung ng’thuh sak gui ne, ngäng sak gui ci. Chang gui mang gaw ung ka lut law u sei ani naw hmu gui neta, ngami ngawn gui vai ah ami ng’thuh nak ung ka lut kawk ci.

⁴⁴ Abimelek la akchang gui mang gaw m’kawt ngäng vai ah ang ghit ah ami hteh yah ung, a hei ng’bum goi naw loma ung chang gui cu tu gui u ne, ami van ngawn gui ci gui.

⁴⁵ Hnüüp pum mü ne ng’tuk ci gui. Abimelek naw mang gaw khäm ne, chang gui ngawn ne, cin gaw phye neta, m’dek phi m’shi awn phyang shut ci.

⁴⁶ Shekhem imlung ung om ciah ami ng’vai gui ami van naw cun ah mawng cu ng’ya u neta, ami phyawn vai ah khäng htek ciah Baala-thukhän pum im kyong ah lut ne om ci gui.

⁴⁷ Cun ah ami ng’bum cu Abimelek am m’thein u khäta,

⁴⁸ Ani cu ak chang gui awn Zalmon m’htung ah hang kai ci gui. Acu ah ani naw ghei la ne sing ban tupit neta, ak phleing ung tai ne kawt ci. Ani naw ak chang gui phi ang ghit ah ami cit u vai ah pyen na gui sei, acun ah ci tuk ci gui.

⁴⁹ Cun ah kyasei ak chang sing naw sing ban tu u ne; Abimelek cu läk ci gui, cun ah im khäng ung hnu ng’tuk khai ah sing pum ci gui. Ngami naw akyong ah om ci gui mah ah mei awn m’khih ci gui, cun ah kim nu ung om ciah chang ami van sik ci gui, ami van hnumi pami phia gha vai lawk ci gui.

⁵⁰ Cun kawn ah Abimelek cu Thebez ah hteit ne, mang gaw k’koi neta tu ne chäm ci.

⁵¹ A cu ah im ng’ki tänghän om ci, cun ah mang gaw ung ka, hnumi ni, pami ni, ami ng’vai gui ni ami van, a cu ah dawng ci gui. Ngami naw akyong täng ah shoh hei khai u neta, m’kiung khan ah kai ne om ci gui.

⁵² Abimelek naw cun ah tänghän tuk khai ah gawk law neta, tänghän im mei awn m’khih khai ah m’kawt ung kai lawk ci.

⁵³ Cun ung hnumi tumat naw gawtlung awn alu ung yuk vawi sei, a lu-am teek ne ng’bou ci.

⁵⁴ Ani naw ang ghit ah ani ah li-chim kawt ciah chang nong tumat cu khü neta, “Na khim yu phawng ne, na ngawn ä. Hnumi naw ana ngawn ah chang naw a pyen vai kä ka ng’ya hlük ci nei” cik ci. Cun ah kia khäta chang nong naw k’dauh sei ani cu sik ci.

⁵⁵ Israel gui naw Abimelek aih cu hmu u neta, ami van ami im ah hteit ba ci gui.

⁵⁶ Abimelek naw a phäi nau gui chihkip ngawn gui ne apa hnungtuk püi ne katnak abi ah phäh ah shik cha ah Khanpughi naw am kyuk ah kyak ci.

⁵⁷ Khanpughi naw Shekhem chang gui cun phi ami shekat ah phäh ah yaica sak gui ci, cun cu Kideon ah hta Totham naw acun ah ami kyak vai ah a pluhtam gui kyak ci.