SUKI GUI 7 - Cho Bible Common Language 2016

Kideon naw Midianit gui Tuhnim gui ci

¹ Hnüüp ät ung Kideon la a chang gui avan cu khongawi hta ah tho law u ne, Harod tui m’lawi pei ah phung tuk ci gui. Midianit gui ah phung cu ngami ah a siiptäng Horeh m’htung pei khawnawi ung om ci.

² Bawipa naw Kideon am, “Midianit gui ah khan ah kei naw näng nak ka pek gui vai ah kei ah phäh ah nang ah na chang gui cu da aih ci gui. Ngami naw ami mät näng hning ci gui ah ngai khai gui, kei ah bä nak cu kä hmat khai gui.

³ Chang gui ah ma ah na ng’shäu vai, ‘A u phi kyik ci läi cu a im ah ng’hlat ba sä, mikmi cu shin ah m’htung Kilead ung mi om khai nei” cik ci. Cun ah kiasei phia, phya-m’ku lei-goi ng’hlat ba ci gui, phia gha om shut ci gui.

⁴ Cun kawn ah Bawipa naw Kideon am, “Na chang gui da ei gäk gäk ci nei. Ngami cu tui pei ah hteh püi gui ä, kei naw nang ah hmawk ah a cu ah ka k’pai gui khai nei. Kei naw nang awn a täng ah hteit tuk khai ah ka pyen ah chang cu hteit tuk khai, nang awn a täng ah kä hteit tuk khai ah ka pyen nak chang cu kä hteit tuk khai” cik ci.

⁵ Kideon naw chang gui cu tui pei ah hteh püi gui khäta, Bawipa naw ani am, “Ui ah mäih ah am lei awn tui m’leik ci la m’khuk dong neta tui awk cicu na k’pai vai nei” pyen nak ci.

⁶ Akut awn tui cun ne m’leik ne awk ciah chang cu phia thum lawk ci, cun kawn ung ka chang avan naw m’khuuk dong neta tui awk ci gui.

⁷ Bawipa naw Kideon am, “Tui m’leik ne awk ciah chang phia thum awn kei naw ning gung ne Midianit gui ah khan ah näng nak ka ning pek khai. Cun kawn ung ka ami van im ah ami hteh ba vai ah pyen na gui ä” pyen nak ci.

⁸ Cun ah kyasei Kideon naw Israel gui ami van cu im ah hteh ba sak gui ci, ei awk vai la phyung puuk gui phui kawt ciah chang phia thum bang k’pawih ba ci gui. Midianit gui ah phung cu ang neim nak khawnawi ung om ci.

⁹ A cu mü Bawipa naw Kideon ang thumkhän cu, “Tho law ne phung cu tu hnim ä; cun ah khan ung näng nak kei naw ka ning pek khai nei.

¹⁰ Cun ung phi cun tuk vai ah na kyih ah a kyak ung, na changshäm Purah awn phung ah yu kyum ni ä.

¹¹ Nangni naw a i ami pyen cu nani ng’yak khai, cun ung nangni naw tuk nak hning vai ah k’tha gui nani gah khai.” Cun ah kyasei Kideon la achangshäm Purah cu ga gui ah phung akit täng ah yu kyum ci goi.

¹² Midianit, Amalekit la ng’kyang ah om ciah pakhui chang gui cu khanpeh mät ah mäih khonawi ung püipyang ci gui, ngami ah kalauk gui cu tuinu kem ah laigin chü ah da ci gui.

¹³ Kideon naw gawk neta, chang tumat naw a teihpüi am ang mang ana m’thein tu sei ng’yak ci. Ani naw a pyen cu, “Barly-awn pyan m’htut pum tumat cu mi phung khan ah ng’täng law ne, phung tumat yuk pah hlit sei, cun ah phung cu ng’gäi ne m’dekung ng’phah sei, ka ng’mang nak ci” cik ci.

¹⁴ A teihpüi naw m’shang ne, “Cun cu Israel ah khim, Joash ah hta Kideon ah kyak ci! A hei ah kä ng’phlan khai! Khanpughi naw ani am, Midian la mi gakap avan ah khan ah ng’näng nak pe pyi ci nei!”

¹⁵ Kideon naw cun ah chang ah ng’mang la mang akplan cu ng’ya neta, m’khuuk khodong ne Bawipa cu khawihnah ci. Cun kawn ah Israel gui ah phung ah hteit ban eta a pyen nak gui cu, “Tho vä! Bawipa naw Midian gakap gui ah khan ah näng nak ning pe gui pyi ci nei!” cik ci.

¹⁶ Ani naw a chang phia thum cu thum ah k’pai gui neta, chang tumat am phyung puuk tumat la akyong ah mei däi ciah um tumat ci pe gui ci.

¹⁷ Ani naw am thein gui cu, “Kei phung eep ung ka gawk law ung, na teng u neta, ka bi ah mäih ah nami bi tu vai.

¹⁸ Kei ah chang bum la kei naw kami phyung puuk kami tum law ung, nangmi naw tum u ne phung veing avan ung nami m’lau vai “Bawipa ah hmawk la Kideon ah hmawk nei! nami ci vai.

¹⁹ Kideon la a chang phia cu kho kä cawih pha mäsei, ngäng ci gui ami ng’thawng thai ung, ga gui ah phung ah k’epp ung gawk lawk ci gui. Ngami naw phyung puuk tum u neta ami kawh ah um gui tupazak ci gui,

²⁰ a hei ng’pai-goi naw phi acun ah ci tuk ci gui. Ngami ami van naw ami eng täng ah meidäi, ami k’pat täng ah phyung puuk kawt u neta, m’lau ci gui, “Bawipa la Kideon ah khim nei! cik ci gui.

²¹ A chang sing phung veing ne ng’düi phäh phäh ci gui, ga gakap gui ami van m’lau ne dawng ci gui.

²² Kideon ah a chang gui naw ami phyung puuk ami tum yah ung, Bawipa naw ga gakap gui cu ami mät ah khim awn ami mät ng’tuk sak gui ci. Ngami Zarethan täng ah dawng u ne, Beth Shithhah ah khüt ci gui, Tabbath ah pei Abel meholah ah phi khüt ci gui.

²³ Cun kawn ah Naphtali, Asher, Manasseh vang goi vei ah ka chang gui cu khü gui u sei, ngami naw Midianit gui cu gawt gui ci gui.

²⁴ Kideon naw Ephraim khogui avan ung chang tüi neta a pyen cu, “Kyum law u ne Midianit gui cu tu gui vä, Jordan tuinu la Bethbarah ung khüt sei tui hta güi khäm ne, Midianit gui naw kä kat ten hlawt khai gui ah k’pang vä,” cik ci. Epraim chang gui cu a täng ah khü gui u sei, ngami naw Jordan tuinu la Bethbarah tuihta ung khüt sei k’pang ci gui.

²⁵ Ngami naw Midianit bawi chang hnih phak ci gui, Oreb la Zeeb; Oreb cu Oreb lung ung ngawn u ne, Zeeb cu Zeeb sapyit neen nak ung ngawn ci gui. Ngami naw Midianit gui cu gawt gäk gäk u neta, Oreb la Zeeb ah lu goi cu Jordan a kiangtäng ah gawk ciah Kideon ah om nak ah law püi ci gui.