SUKI GUI 6 - Cho Bible Common Language 2016

Kideon

¹ Israel chang gui cu Bawipa hnungtuk püi ne sheka ba mä ci gui. Cun ah kyasei ani naw Midian chang gui am khawkum chih uk sak gui ci.

² Midianit gui cu Israel gui ah mä gaigawng pi ci gui, cun ah kyasei Israel chang gui cu lung khui ung ng’thup ci gui, amshah cu ang geing khogui zung ah ng’thup ci gui.

³ Israel gui naw m’shi ami phu phung midianit gui cu Amalekit gui la ng’kiang ma ah om ciah chang gui awn a täng ah tu law gui ci ci gui.

⁴ Ngami cu ami khaw ung phung tu ne om u ne, ami geitkaw gui cu a htumtäng Kaza gawnu ah khüt ne m’di ci gui. Ngami naw htawme gui, seipat gui, ng’sela gui avan lak ci gui, Israel gui ah phäh ah ami ghin nak vai a i kä k’pawih ci.

⁵ Ngami cu ami vuhchah gui la ami im gui am lawk ci gui, khanpeh ng’nawng ah mäih ah da ci gui. Ngami la ami kala-uk gui kä khei tai vai ah da ci gui. Ngami cu law ne cun ah khaw cu m’dimshum cu gui.

⁶ Israel gui naw ngami cu kä m’khüt tu ba gui hlawt ci gui.

⁷ Cun kawn Israel chang gui cu Midianit gui hnu ng’tuk nak püi ung Bawipa naw am htei gui vai ah kyap m’lau ci gui,

⁸ Cun ah kyasei ani naw Bawipa Israel Khanpughi ung ka shin ah ng’thu law püi ciah prophet cu tüih law gui ci: “Kei naw Egypt khaw ah khleihtein ah nami kyaknak ung ka, ka ning law püi ba gui ci.

⁹ Kei naw Egypt chang gui ung ka ning gung gui ne, shin ah khaw ung ning hnu ng’tuk püi gui ciah chang gui ka ning gung gui ci. Nangmi nami law yah ung, kei naw ngami cu k’täm gui ne, ngami ah khaw cu kei naw ka ning ap gui ci.

¹⁰ Kei naw ka ning m’thein gui ci, kei cu Bawipa nami na Khanpughi nei, nangmi naw tuhbäi nami om nak ah khaw kanak ciah Amorit gui ah khanpughi gui cu kä nami khawihnah en tu vai. Cun ung phi nangmi naw kä nami na ngai ci.

¹¹ Cun kawn ah Bawipa ah khanchang cu Ophrah gawhta ah law neta, Abiezer pahta ung ka, Joash ah akhäm, m’dung ghing ka ah ngok ci. Ani ah hta kideon cu sapyit hung ung adüm ah htang m’häi ne om ci, cun ah kiasei Midianit gui naw kä hmuk ci gui.

¹² Acun ung Bawipa khanchang dang neta a pyen nak cu, “Nget ne n’gäi ciah chang, Bawipa naw nang ning om püi ci ne!”

¹³ Kideon naw pyen tu ba ne, “Bawi aw, ka ning shi hlük ci nei, Bawipa naw na om püi gui ciah a kyak ung a i ah kyasei, shin ah akshe gui avan keimi ah khan ah a gawk law ang? Egypt khaw ah ka a law püi ba gui yah ung Bawipa naw a bi gui ah cäicat gui nai avan kami pa gui naw ami nam thein gui cu a i hawk cha ang? Bawipa naw na nawng gui ne, na hteh ta gui ne Midian gui am na ap gui ci nei” cik ci.

¹⁴ Cun kawn ung Bawipa naw, “Dämduh ciah na thagui avan nawn hteit ä, Midian gui ah kutung ka Israel gui cu gung gui ä. Kei kamät naw nang cu ka ning tüi ci nei” cik ci.

¹⁵ Kideon naw, “Cun ung phi Bawipa aw, a i hawk cha ah kei naw Israel gui ka gung gui vai ang? Manasseh pakhui ung kei ah pahta cu ak yawken pikbäih ah kyak ci, kei ah kyongchang ung kei cu kä tungte pikbäih ciah kyak ci” cik ci.

¹⁶ Bawipa naw, “Nang naw na bi hning khai, a i ah kyasei ci ung kei naw ka ning m’htei khai. Nang naw Midianit gui am chang tumat bi ah mäih ah na hnimdep gui khai.”

¹⁷ Kideon naw, “nang cu kei ung na yeikyai ciah a kyak ung, nang cu Bawipa akcang ah na kyak ah mawng kei am anm dang law ä.

¹⁸ Na bä ni, kei naw douthak ei kä ka law püi pha ah chuih kä na hteh en ta ä” cik ci. Ani naw, “Nang na law ba güt kei ka om khai nei” cik ci.

¹⁹ Cun ah kyasei Kideon cu a im ah hteit ba ne, Mehta tumat cu shong ci, htangphyawi gha awn k’caw kä shum ah m’htut cu pyang ci. Ani naw meh cu dawn ung tha ne, meh tui cu khawk ung lou neta m’dung ghing ka, Bawipa ah khanchang ah om nak law püi ne, ani am pek ci.

²⁰ Khanchang naw ani am, “meh la m’htut cu shin ah lung khan ah taih neta, meh tui awn shawi ä” cik ci. Kideon naw acun ah bik ci.

²¹ Cun kawn ah Bawipa ah khanchang naw zawn neta, meh la m’htut cu akawh ah htung m’sawng ah am dawng awn tawk ci. Lung ung mei däi law neta meh la m’htut cu mei naw ui ci. Cun kawn ah khanchang cu maih ba ci.

²² Ani naw a hmuh cu Bawipa ah khanchang ah kyak ciah Kideon naw hmat neta, kyikyawk ne a pyen cu, “Bämang ciah Bawipa, kei naw na khanchang cu hmai chum ne ka hmuk ci nei!”

²³ Cun ung phi Bawipa naw ani am, “Dimdeeih sä, kä na kyih vai nei. Nang kä na sik khai nei” pyen nak ci.

²⁴ Kideon naw acun ung Bawipa am soukiang cawh pen eta ang ming a sui cu, “Bawipa cu Dimdeeih nak” ciah kyak ci. (Cun cu Ophrah ung tuhgüt ng’düi ci, cun cu Abiezer pahta ah ka ah kyak ci.)

²⁵ A cu mü Bawipa naw Kideon-am am thein cu, “Na pa ah vantang la ne, kum chih lung ciah a hei vangtang mä la neta, na pa naw Baala ah hmawk ah a cawh ah sowkiang phye ne, acun ah pei ung ka Asherah khanpughinu ah a gup cu na chupit vai.

²⁶ Shin ah m’dek plum ung Bawipa na khanpughi ah hmawk ah akni ah soukiang na cawh vai. Cun kawn ah ak hnihnak ah vantang la ne apum avan douthak ne na m’khih vai, Asherah gup na chukpit cu sing ah mang ne na m’khih vai.”

²⁷ Kideon naw akchangshäm sing gha khü gui neta, Bawipa a pyennak ah mäih ah bik ci. Ani naw a kyongchang gui la gawnu ung om ciah chang gui cu kyih gui aih neta, shin cu hnüüp ung kä bi ah, mü ung bik ci.

²⁸ A ngawi ung khawngawi hta, gawnu ung chang gui tho law u neta, Baala ah soukiang la Asherah gup tukpit ah kyak ci la sonkiang so ne, ak hnih nak ah vantang m’khih ah kyak cicu hmuk ci gui.

²⁹ Ami mät gui ng’shi tu u ne, “A u naw ang shin ah abi?” cik ci gui. Ngami naw ng’shikca u neta Joash ah hta Kideon naw abi ah hmat ci gui.

³⁰ Cun kawn ah ngami naw Joash am, “Shin ung na hta law püi ä, keimi naw kami ngawn khai nei! Ani naw Baala sonkiang phye ne a pei ung ka Asherah gup phi tupit ci nei” cik ci gui.

³¹ Cun ung phi Joash naw cun ah k’thäh ciah chang avan am, “Nangmi Baala ah phäh ah nami ng’düi ne ma? Ani nami ghung ne ma? Acun ah phäh ah ng’düi ne ma? Acun na phäh ah ng’düi ci phung cu khawngawi kä ang phlän pha ung ngawn vai nei. Baala cu khanpughi ah a kyak ung amät gung sä. Ani ah sonkiang ah a kyak ung amät naw amät gung sä. Ani ah sonkiang cu chuk pyi ah kyak ci nei” cik ci.

³² Acun ung tün ne, Kideon cu Jerubbaala ah ming ci, a i ah kyasei ci ung Joash naw, “Baala cu a mät gung sä; Shin ah chukpit cu ani ah sonkyang ah kyak ci nei? a ciah phäh ah kyak ci.

³³ Cun kawn ah Midianit gui, Amalekit gui la ng’kiang ma ah om ciah pakhui gui cu ng’bum u neta, Jordan Tuinu hei kat u ne, Jeyreela khaw nawi ung phung tu ne om ci gui.

³⁴ Bawipa ah mümcha naw Kideon cu pha ne k’pan neta, cun ah chang gui gawt gui khai ah Abiezer pahta gui cu phyung puuk tum ne khü gui ci.

³⁵ Ani naw Manasseh khawpäng avan ung chang gui tüi ne, khü gui ne gawt sak gui ci. Ani naw Asher, Zebubun la Naphtali pakhui gui phi chang tüi ne khü gui sei, law u ne ng’dawn ne gawt tuk si gui.

³⁶ Cun kawn ah Kideon naw Khanpughi am, “Israel gui gung gui khai ah kei na na mang vai ah nak bäi cu, kei am na na pyen nak ci,

³⁷ Kei naw htang m’häi nak ah m’dek ung htawmu ka m’shän khai. A ngawi ung khawngawi htawmu bang ah khan ah k’dam baw ne, m’dek ung kä baw ne a kyak ung, nang naw kei cu Israel gui gun vai ah na na mang ciah ka hmat khai nei” cik ci.

³⁸ Cun cu akcang ah kia tukcang ci. Kideon cu a ngawi ung khawngawi hta tho law ne, htawmu suine ten khäta damtui khawk ät lawk ci.

³⁹ Kideon naw Khanpughi ah, “Kei ah khan ah kä m’lungshe en ä; thu m’kha ät bang na pyen ba sak ä. Na bä ni, hnü ät bang htawmu awn na m’nüm ba sak ä. Tuhbäi ung htawmu cu hu ne, m’dek cu ng’shüi sä” cik ci.

⁴⁰ A cu mü ung Khanpughi naw acun cang ah bik ci. A ngawi ung khaw ngawi htawmu cu hu ne, m’dek cu k’dam ne ng’shüi ci.