SUKI GUI 5 - Cho Bible Common Language 2016

Deborah la Barak ah ng’Äi

¹ Cun hnüüp ung Deborah la Abinoam ah hta Barak cu shin ah ng’äi ci goi:

² Bawipa cu m’hlüngtai vä! Israel gui naw ng’tuk bi vai ah m’gäi ci gui nei; chang gui yei ne ami mät ah ngaih ah ng’düitho ci gui nei.

³ Ghangpughang gui ngai vä! Uktu gui geing na vä! Kei naw Israel Khanpughi, Bawipa am ka ng’äi khai nei, ka tum khai nei.

⁴ Bawipa, nang naw Seira khawmhtung na hteh tak sang ung, Edom khaw ungka nang na law yah ung, Khomdek thüng ne, Khawmik ungka khaw aa lawk ci nei. Ä, Khawmei ungka, tui phi kya lawk ci nei.

⁵ Khomhtung gui cu Sinai ah Bawipa, Israel gui ah Khanpughi, Bawipa ah ma ah thüng ci gui.

⁶ Anath ah hta Shamkar a om sang ung, Jaela a om sang ung, Lam k’hteit gui naw khaw kan ne kä hteit ba ci gui, hteithon ci gui cu k’ban lam ung hteit ci gui.

⁷ Israel ah gawnu gui cu omdam ne ng’düi ci gui nei, Deborah aw; nang cu Israel gui ah nu ah mäih ah kä na law pha ah chuih, ngami cu akholä ah kyak ci gui.

⁸ Israel chang gui naw Khanpughi gui ak thai ami ghü kawn ah, khaw ung ng’tuk nak om ci nei. Israel chang phya, phya phli kip ung ka, Shawi käcung k’htei kawt ci a u om ne ang?

⁹ Kei ah ka m’lung cu Israel gabawi gui la yei ne amät ah ngaih ah düihtho ciah chang gui awn, a täng ah om ci nei, Bawipa m’hlüng tai nei!

¹⁰ la bawk ung ng’cum ne, yih phah ung ngoh ciah chang gui, khaw awn hteit ciah chang gui, nami hteh nak päng ah nami ngaih-tüh vai nei.

¹¹ Ngai vä! Tui shawk ah ng’veing ung chang k’da ng’üng cang ci gui nei, ngami naw Bawipa ah näng nak pyen ci gui, Israel chang gui ah näng nak pyen ci gui nei! Bawipa ah chang gui cu ami mang gaw gui ungka ng’phäi lawk ci gui nei.

¹² Ma tawn ä, Deborah, ma tawn ä! Ma tawn ä! Ng’äi m’cu ä! Ma tawn ä! Matäng ah hteit ä, Abinoam ah hta Barak aw, na chang pha gui a hei ah hteh püi güi ä!

¹³ Bekhüt ciah chang gui ami ng’vai gui ah lawk ci gui nei; Bawipa ah chang gui cu ng’tuk ge vai ah ani ah lawk ci gui nei.

¹⁴ Ngami cu Ephraim ungka khaw nawi ah lawk ci gui, Benjamin pakhui la ak chang gui ah hnu ah läk lawk ci gui. Gabawi gui cu Machira ungka lawk ci gui, Bawi gui cu Zebulun ungka lawk ci gui.

¹⁵ Issakha gui ah ng’vai gui cu Deborah awn law ät ci gui nei; ä, Issakha lawk ci, Barak phi lawk ci, Ngami ani naw khaw ng’nawi güt ung läk ci gui nei. Cun ung phi Reuben pakhui cu ng’pai u ne; Ami law vai cu kä k’bäi hlawt ci gui nei.

¹⁶ A i ah kyasei ngami htawme gui awn a täng ah hnu ah ami om shüt ang? Htaw ng’bum gui htawshäm naw a khü cu, ngai u ne ang? Ä, Reuben pakhui cu ng’pai ci gui nei; Ngami naw ami law vai cu, kä k’bün hlawt ci gui nei.

¹⁷ Kad pakhui cu Jordan a kiangtäng ung om shüt ci, Dan pakhui cu htinpaw ung om shüt ci. Asher pakhui cu tuinu-ken ung om ci gui, Ngami cu tui lawng ung om shüt ci gui.

¹⁸ Cun ung phi Zebulun la Naphtali chang gui cu ng’tuk nak ung ami hnun gui pe ne k’tha nak ci gui nei.

¹⁹ Mekiddo tui-kem, Taanakh ung ghangpughang gui law ne tu lawk ci gui: Kanaan ghangpughang gui naw tu lawk ci gui, cun ung phi ngami naw a i ngui phi kä püi ci gui.

²⁰ Aisi gui naw khawmik ungka naw ng’tuk bik ci gui; Ngami cu khawmik ung ng’nawk u ne, Sisera cu hnu ng’tuk ne tuk ci gui nei.

²¹ Kishon tuinu ng’güüt ne law ne ngami cu hteh gui ci nei. Kei ka ng’phäi lawk khai, thaghat ne, ka ng’phäi lawk khai nei!

²² Ng’se gui cu ng’hlü u ne, m’dek ung ami khawpaw päu sei dawng lawk ci gui.

²³ Bawipa ah khanchang naw, “Meroz cu plah taam vä, plah taam vä, acun ung om ci gui cu plah taam gui vä. Ngami cu Bawipa bawm khai ah kä lawk ci gui, ani ah hmawk ah ng’tuk bik khai ah gakap ah kä kyak ci gui.

²⁴ Yeikyai nak om pikbäih ciah hnumi cu Jael ah kyak ci, Kenite chang Heber ah chu ah kyak ci phung ung om ci hnumi gui ung yeikyai nak pikbäih ah hnumi ah kyak ci.

²⁵ Sisera naw tui ng’zawi sei, ani naw seisuuk tu ci; Ani naw khawk akiom ung seisuk cu law püi ne pek ci,

²⁶ Ani naw vangtäng awn htung m’shum kawt ne, vangtäng ung bik’bi ah ng’ki kawt ci; Ani naw Sisera ah luk’am cu khen ne güt ci, alu cu ng’täih sak ci.

²⁷ Ani cu ng’lat ne am khuk ung kyuk ci, A khaw pei ah kyuk ne ng’yän ci, Ani cu a khaw pei ah ng’lat ne, kyuk ci; Ani cu m’dek ung kyu ne sik ci.

²⁸ Sisera ah anu cu m’kawt ung mangshüi ci; Ani cu shom m’kawt ah hnu ah ng’üüp ci nei. Ani naw, “A i ah kyasei a yatha gui law vai ah ami shou aih ang? A i ah kyasei ang sei gui ng’hlah law vai ah ami gimhnong ang? cik ci.

²⁹ Cüivai ciah ateih püi gui naw ami m’shan nak la, amät naw leng ba ba ne a pyen cu,

³⁰ “Ngami naw ami khäm vai la ami ng’pai gui vai ah khawh cu shui ci gui nei, gakap päng ah chei awn piam ah äh awi ah kyak khai nei” cik ci gui.

³¹ O Bawipa, na ga gui ami van cu a shin ah mäih ah si u sä, cun ung phi na teihpüi gui cu hni pyii ah mäih ah ng’shü u sä! Cun ah kyasei cun ah khaw ung khawkum phli kip ung dim deih ci.