SUKI GUI 4 - Cho Bible Common Language 2016

Deborah la Barak

¹ Ehud a sih kawn ah Israel chang gui cu Bawipa hnu ng’tuk püi u ne, sheka ba ci gui.

² Cun ah kyasei Bawipa naw Hazor mang gaw uk ciah Kanaanit ghangpughang Jabin am tu ne näng gui sak ci. Ani ah gabawi cu Sisera, chang khuihei gui ah om nak Hazosheth ung ka ah kyak ci.

³ Jabin ung m’si yatha phya kaw om ci, ani naw Israel chang gui cu m’ghämce ne hupdep ne khawku m’ku lung uk gui ci. Cun kawn ah Israel chang gui cu Bawipa naw am htei gui vai ah kyap m’lau ci gui.

⁴ Cun sang ung Lappidoth ah chu Deborah cu prophet ah kya ci, Israel gui ah suki ah kya ne bi bik ci.

⁵ Ani cu Ephraim khaw-gui Ramah la Bethela ah ng’lak ung Can ghing ka ah ngaw bäk bäk ci, Israel chang gui cu ani naw am khoimcha gui vaih a cu ah hteit ci ci gui.

⁶ Hnüüp ät ung ani naw, Naphtali khaw, Kedesh mang gaw ung ka Abinoam ah hta Barak cu tüi neta, “Bawipa Israel ghangpughang naw shin ah thumkhäm ning pe gui ci: ‘Naphtali la Zebulun pakhui ung ka chang phia phia la neta Tabor m’htung ah hteh püi gui vä.

⁷ Kei naw Jabin ah gakap ung gabawi S esera cu ka law püi khai, ani naw kishon tuinu ung ning tuk püi gui khai. Ani ung yatha gui la a gakap gui om khai, cun ung phi ani ah khan ah nami näng nak, ka ning pe gui khai!”

⁸ Barak naw m’shang ne, “Nang cu kei awn a täng ah na hteh tu vai zung ka hteit khai, kei awn a täng ah kä na hteh tu vai zung kä ka hteit khai,” cik ci.

⁹ A ni naw, “Bä kaw, nang awn a täng ah kei ka hteit tuk khai, cun ung phi näng nak ah phäh ah nang naw bä mtam nak kä na gah khai, a i ah kyasei ci ung Bawipa naw Sisera cu hnumi ah kut ung ap khai.” Cun ah kyasei Deborah cu Barak awn a täng ah Kadesh ah hteit tuk ci.

¹⁰ Barak naw Zebulun la Naphtali pakhui chang phia phia cu khü ne Kedesh ah hteh püi ci, Deborah cu ngami awn a täng ah hteit tuk ci.

¹¹ Acun sang ung Kenite chang Heber naw Kedesh ah pei Zanannim ung, m’dum ghing hneit ung phung tu ne om ci. Ani cu Moses ah kawi Hobab ah hta ng’shon, a hei kenite ung ka ng’plon lawk ciah kyak ci.

¹² Sisera naw Tabor m’htung ah Bazak a hteh cu ng’ya neta,

¹³ ani naw m’si natha phia kaw la akchang gui avan khü gui neta, chang khuihei gui ah om nak Harosheth ung ka Kishon Tuinu ah tüi gui ci.

¹⁴ Cun kawn ah Deborah naw Barak am, “Hteitä! Bawipa naw lam ning m’shüm ci nei! Tuhngawi ani naw Sisera ah khan ah näng nak ning pek ci nei” pyen nak ci. Cun ah kyasei Barak cu ak chang phiaphia awn a täng ah Tabor m’htung ungka naw yu kyum ci gui.

¹⁵ Bazak naw a gakap gui awn a tuk law gui yah ung Bawipa naw Sisera la a yatha gui, ak chang gui avan cu ng’phying sak gui sei, Sesera cu yatha khan ah ka kyum law ne, a khaw awn dawng ci.

¹⁶ Barak naw yatha gui la gakap gui cu khuihei gui ah om nak Harosheth ung khüt ne gawt gui ci, Sisera ah gakap avan ngawn gui ci gui, chang tumat phi kä k’pawih ci.

¹⁷ Sisera cu Kenite chang Heber ah chu Jael ah phung ah dawng ci, a i ah kyasei ci ung Hazor ghangpughang Jabin cu Heber ah kyong chang awn ng’khawt ci gui ah kyak ci.

¹⁸ Jael naw Sisera va hmuk khai ah lut law neta, ani am a pyen nak cu, “Bawi aw lut law; ka phung kyong ah lut law ä. Kä kyikyawk en ä” cik ci, cun ah kyasei, ani cu kyong ah va lut ci, ani naw gabawi ci yih ung hnu ah thup ci.

¹⁹ Ani naw cun ah hnumi am, “Na bä ni, tui khap ät na tu ä; tui ka gha ci nei” cine pyen ci. Ani naw mehvun um hmawng ne sei suuk awk sak neta, thup ba ci.

²⁰ Ani naw hnumi am, “phung ah m’kawt ung na ng’düih vai, chang tumat mat law ne, shin ung chang om ne ang? cine a ning shi ung, ka nei, na ci vai” cik ci.

²¹ Sisera cu cüm aih neta ip phiäih ci. Cun kawn ah Jael naw ng’ki la htung m’shum la ne, a pei ah a düm ah hteit neta, a hnga m’ling ung htung k’süh ne, a lu ung ng’täih ne m’dek ung ng’cai khai ah khen ci.

²² Barak naw Sisera shui ne law khäta, Jael naw ani hmuk khai lut law ne a pyen nak cu, “Shi ah law ä! Nang naw na shui ah chang cu ka ning m’hmuh khai nei” cik ci. Cun ah kyasei ani cu cunnah hnumi awn a täng ah lut tu neta, Sisera cu a lu ung htung ng’kiang sei, m’dek ung si ne ng’yän sei hmuk ci.

²³ Cun hnüüp ung Khanpughi naw Israel gui am, Kanaanit ghangpughang Jabin ah khan ah ng’näng nak pe gui ci.

²⁴ Ngami naw ani kä ami m’di pha ah chuih, ani cu nu law pi nu law pi khai ah tu hnim ci gui.