SUKI GUI 3 - Cho Bible Common Language 2016

Cun ah khaw ung om ba lä ciah pakhui gui

¹ Cun ah kyasei Bawipa naw pakhui amshah gui cu cun ah khaw ung om sak gui lä ci, cun cu Kanaan khaw ng’tuk nak ung kä ng’tu tu man ciah Israel gui am nüm nak gui vai ah kyak ci.

² Ani naw shin ah abi cu ang shon päng ung Israel chang gui am ng’tuk ah mawng am thei nak gui ah kyak ci, ak tung piah kä ng’tu tuman ci gui ah hmawk ah kyak ci.

³ Cun ah khaw ung om tu lä ci gui cu, Philistin mang gaw hma, Kanaanit gui avan, Sidonian gui, la Lebanon m’htung ungka naw Hamath hteng ung khüt ciah Baala Hermon m’htung ung om ciah Hivit gui ah kyak ci.

⁴ Ngami cu Israel gui m’nüm nak gui vai ah kya ci, Bawipa naw Moses ung ami pupa gui am a pek ah thumkhän ami läk la kä cun ah hmat nak vai ah kyak ci.

⁵ Cun ah kyasei Israel chang gui cu Kanaanit gui, Hittit gui, Amorit gui, Perizzit gui, Hivit gui la Jebusit gui ah ng’lung ah khäng ne om ci gui.

⁶ Ngami cu acun gui awn ng’chungla u ne, ami khanpughi gui phi khawihnah tuk ci gui.

Othniela

⁷ Israel chang gui naw Bawipa cu ami khanpughi ah m’hnih ci gui, ani hnu ng’tuk püi ne sheka u ne, Baala la Asherah ah gup gui cu khawihnah ci gui.

⁸ Cun ah kyasei Bawipa naw Israel gui ah khan ah m’lungshe neta Mesopotamia ghangpughang Kushan Rishathaim ah tu ne näng sak ci, ani naw kum cheit ung uk gui ci.

⁹ Cun kawn ung Israel gui cu Bawipa ah ma ah kyap ne m’lau ci gui, cun ah kyasei ngami m’hlaut gui khai ah chang cu ani naw tüi lawk ci. Cun cu Kaleb ah nau ak hmaw pi Kenaz ah hta Othniela ah kyak ci.

¹⁰ Bawipa ah mümcha cu ani ah khan ah gawk law sei, ani cu Israel gui ah ang vai ah kya lawk ci. Othniela cu ng’tuk vai ah hteit sei, Bawipa naw ani am Mesopotamia ghangpughang ah khan ah näng nak pek ci.

¹¹ Cun ah khaw ung khaw kum phlikip dimgei nak om ci, cun kawn ah Othniela cu sik ci.

Ehud

¹² Israel chang gui cu Bawipa hnu ng’tuk püi ne sheka ba mä ci gui. Acun ah phäh ah Bawipa naw Moab ghangpughang Eglon cu Israel gui ah ta khüighat sak pi ci.

¹³ Eglon naw Ammonit gui la Amalekit gui cu ng’dawn püi gui neta, Israel gui tu gui ne, Cantoi manggaw ah ming ciah Jerikho cu khäm ci gui.

¹⁴ Israel gui cu Eglon gui ah ka ung khawkum gha-lei cheit om ci gui.

¹⁵ Cun kawn ah Israel gui cu Bawipa ah ma ah kyap m’lau u sei, ngami m’hlawt gui khai ah chang tumat tüih gui ci. Ani cu Ehud ak eng ah ng’hlawi ci, Benjamin pakhui Kera ah hta ah kyak ci. Israel chang gui naw Ehud cu douthak vai hteh püi ne Moab ghangpughang Eglon ah hteh sak ci gui.

¹⁶ Ehud naw vang goi-vei ghat ne dawng lawk ciah shim cu pyang ci. Cun cu akpat täng aphei ung sui ah ka ung khit ne tha ci.

¹⁷ Cun kawn ah ani naw douthak vai gui cu Eglon am thak ci, Eglon cu ang htei ah plan ci.

¹⁸ Ehud naw douthak gui a pek kawn ah, acun law püi ci gui cu ami im ah hteh ba sak gui ci.

¹⁹ Cun ung phi Ehud amät läi cu Kilkal a pei, lung lung a gup gui ah pei ah hteit ci, cun ung ka Eglon ah hteit ban eta, a pyen nak cu, “Ka bawi aw, nag am dümah ka ning m’thein vai thu om ci nei.” Cun ah kyasei ghangpughang naw ak changshäm gui am, “Kani mät bang na nawng goi vä!” cik ci. Ngami ami van pung ah hteit ci gui.

²⁰ Cun sang ung ghangpughang cu Khawgei hapnak ah kyong ung amät ngok ci, Ehud lut law neta, “Kei ung Khanpughi ah ng’thu ka ning m’thein vai om ci nei” ci sei, ghangpughang cu ng’düi lawk ci.

²¹ Ehud naw akpat täng pheikhaw ung ka khim cu, ak eng täng kut awm yu saw neta, ghangpughang ah a poi cu k’tawk ci.

²² Khim cu atang mah ah avan lut khäta, a thau naw uk ci. Ehud naw ghangpughang ah poi ung khim cu kä phawng ba ci, cun cu a khaw goi ah ng’lak ung a hnu täng ah ng’kyang lawk ci.

²³ Cun kawn ah Ehud cu lut law ban eta, shoh hei khai ne, htawh awn hei pik neta,

²⁴ hteh tak ci. Changshäm gui law u neta shoh khai ah kyasei hmuk ci gui, cun ung phi ghangpughang cu akyong ah amät ng’naw k’phyam ciah ngai ci gui.

²⁵ Ngami naw akshou hta ami ngäng te, cun ung phi ani naw shoh kä hmawng law pi khäta, ngami naw htawh la u ne shoh hmawng ci gui. Acu ah ami bawi cu k’cigem ung si ne ng’yän ci.

²⁶ Ngami naw ami ngäng yah ung Ehud cu dawngei ci. Ani cu lung a gup gui phlän ne Seirah ah phyawng ne gawk ci.

²⁷ Ani cu Ephraim khaw-gui ung gawk neta, k’phyung puuk tum ne Israel chang gui cu ng’tuk nak ah khü gui ci; cun kawn ah khaw-gui zung ka naw kyum law ba püi gui ci.

²⁸ Ani naw, “Na läk law vä! Bawipa naw nami ga, Moabit gui ah khan ah ng’näng nak ning pek gui pyi ci nei” cik ci. Cun ah kyasei ngami cu Ehud läk ne kyum law ba u ne Moabit gui naw Jordan tuinu ami kah nak vai ah hmun cu khäm ci gui; ngami naw chang tumat am phi tui kä kah sak ci gui.

²⁹ Cu hnüüp ung ngami naw Moabit gakap akbä pi gui phya gha ngawn ci gui, a u phi kä phyawng ci.

³⁰ Cun hnüüp ung Israel gui naw Moab cu tu hnin ci gui, ami khaw cu khawtum cheitkip ung dimdeih ci.

Shamkar

³¹ Cun tawi lawk ciah ami ng’vai cu Anath ah hta Shamkar ah kyak ci. Ani naw htung m’shum awn philistine chang phya chuk cu ngawn gui ne, Israel gui cu gung gui ci.