SUKI GUI 21 - Cho Bible Common Language 2016

Benjamin Pakhui gui ah Ami Chu gui

¹ Israel chang gui cu Mizpah ung ng’bum u neta Bawipa ung küikyang ciah shaitak bik ci gui: “A u Benjamin am phi kami htahnumi cu kä kami chu na sak khai”

² Cun ah kyasei Israel chang gui cu Bethel ah hteit u ne, Khanpughi ah ma ah mü hnu güt ung ngok ci gui. Ngami cu m’lau ne akaa ah kyap ci gui:

³ Bawipa, Israel Khanpughi, a i ah kiasei nei shin ah a kyak ve? A i ah kyasei ang Benjamin pakhui cu Israel ung ka ami maih düt ve?”

⁴ A ngawi ung khaw ngawihta chang gui naw acun ung sonkyang co ci gui, hmu chum khawihnah douthak u ne m’khih ne a pum ah khawihnah ci gui.

⁵ Ngami naw, “Mizpah ung Bawipa ah ma ah ng’bum nak ung Israel pakhui avan ung ka, kä ng’bum tuk ci om ne ang?” cine ng’shik ci gui. (Mizpah ung kä hteit tuk cicu ngawn vai ciah küikyang ciah ami thukan te ah hmawk ah kyak ci.)

⁶ Israel chang gui cu ami nau Benjamin ah phäh ah thüisei u neta, “Tuhngawi Israel naw a pakhui tumat m’chüh ci nei.

⁷ K’pawih ba ciah Benjamin pami gui ah ami chu vai cu a i hawk cha ah mi bik khai ang? Mikmi naw kami hta hnumi gui ngami am kä kami chu na sak khai cine, küikyang ciah shatak Bawipa ung mi bi pyi ci nei” cik ci gui.

⁸ Mizpah ung ami ng’bum nak ung Israel pakhui ung ka, kä hteit tuk ci om ne ang ciah k’tä law ba u neta, Kilead khaw Jebesh ung ka, a u phi kä hteit tuk ciah hmat ci gui;

⁹ gakap ming a mi khü law ung a u phi kä äi ci.

¹⁰ Cun ah kyasei chang bum gui naw m’gäi pi k’bäih ciah chang phia phia gha lei goi cu shin cha ah m’cäi ne tüi ci gui, “Nangmi Jebesh ah hteit ne hnumi, nausen mah mah chang päng nami ngawn vai.

¹¹ Pami avan la lamihta ah kä kyak ciah hnumi nu päng nami ngawn vai nei.”

¹² Jebesh ung om ciah chang gui ungka lamihta phia phli om sei hmuk ci gui, cun gui cu ngami naw Shilon phung ah law püi ci gui, cun cu Kaanan khaw ung ah kyak ci.

¹³ Cun kawn ah chang bum gui naw Rimmon lung song ung om ciah Benjaminit gui am kä ng’tuk ba vai ah ng’thu m’khäh ci gui.

¹⁴ Benjamin gui law ba u sei, Israel gui naw Jebesh ung ka kä ngawn ne ami law püi gui ah hnumi hta gui cu pe gui ci gui. Cun ung phi ngami ah hmawk ah kä ng’büh ci.

¹⁵ Chang gui cu Benjaminit gui ah phäh ah thüisei ci gui, a i ah kyasei ci ung Bawipa naw Israel pakhui ah kawng ät nak cu am shet ah hmak ah kyak ci.

¹⁶ Cun ah kyasei chang bum ung ami ng’vai gui naw, “Benjamin pakhui ung hnumi kä om ba ci nei. K’pawih ba ciah pami

¹⁷ gui ah chu gui vai, a i hawk cha ah mi cik khai ang? Israel naw pakhui gha lei goi ung ka, tumat phi kä m’chüh khai nei. Benjamin pakhui ang shon vai ah mikmi naw mi shui khai nei.

¹⁸ Cun ung phi mikmi naw mi hta hnumi gui kämi chu na sak gui hning khai, a i ah kyasei ci ung, Benjamin am a hta hnumi chu nak sak ci phung tamnak gah khai ah mi tam pyi ah kyak ci.”

¹⁹ Cun kawn ah ami ngaih cu, “Shilon ung akum tä bi ah Bawipa ah pawi cu gawk law ge ci nei.” (Shilon cu Bethela ah asiip, Lebanah ah a htum, Bethela la Shekhem ah ng’lak lam ah akiang ah kyak om ci.)

²⁰ Ngami naw Benjaminit gui am, “Nangmi cu sapyit lo ah hteit ne ng’thup ne,

²¹ ngäng vä. Pawi yah ung Shilon ung ka hnumi hta gui ng’lam khai gui ah ami law ah a kyak ung, sapyit lo ung ka nami law vai. Hnumi hta gui ung ka, nami mät phäh phäh naw nami chu vai nami k’pai vai, cun kawn ah Benjamin khaw ah nami law püi gui vai.

²² Ami pa gui, käcung ami phäinau gui law ne ami ning häu law gui ah a kyak ung, nami pyen vai cu, “Nami bä ni, na khäm sak gui vä, a i ah kyasei ci ung, keimi naw kami chu gui vai ng’tuk nak ung kami lak ka kä kyak ci. Nangmi naw nami na pek gui ah phi kä kyak ci, nangmi nami shaitak nami m’shet ciah kä kyak ci,” cik ci gui.

²³ Benjaminit gui naw phi acun ah bik ci gui; Shilon ung ng’lam ciah hnumi hta gui ung ka, tumat naw tumat ciah ami chu vai ah ghü u ne, hteh püi ci gui. Cun kawn ah ami mät ah khawpäng ah hteit ba u ne, gawnu gui co ba u ne, acun ung om ci gui.

²⁴ Acun sang ung k’pawih ba ciah Israel gui cun phi hteit ba ci gui, ak chang sing cu ami mät ah pakhui phäh phäh, kyongkhui phäh phäh, pyu im phäh phäh ung hteit ba ci gui.

²⁵ Cun sang ung Israel gui ung ghangpughang kä om ci. A changsing cu ami mät ah m’hni ah om ci gui.