SUKI GUI 20 - Cho Bible Common Language 2016

Israel gui ng’tuk vai ah pawnghtei ci gui

¹ Israel chang gui avan, a siiptäng Dan ungka naw a htumtäng Beersheba ung khüt ci, a kyangtäng Kilead khaw ungka naw avan cu ng’khü tuk ci gui. Ngami cu Mizpah ung Bawipa ah ma ah tumat ah ng’tum ci gui.

² Israel pakhui avan ah ami ng’vai gui cu Khanpughi ah chang gui ami bum nak ung om ge ci gui, cun ung khaw awn hteit ne ng’tuk khai gakap 400, 000 lawk ci gui.

³ Cun yah ung a hei Israel chang gui ami van Mizpah ung ami ng’bum cu Benjamin chang gui naw ng’yak ci gui. Israel chang gui naw, “Na m’thein gui ä, shin ah katnak cu a i hawk cha ah kya lawk ci ang?” cine ng’shik ci gui.

⁴ Ak chu ami ngawn pek ah Levit naw pyen ne, “Kei la ka chuba cu Benjamin khawpäng Kibea ah hteit ne kani ip tuk ci.

⁵ Kibeah chang gui law ne na tu u ne, mü ah im cu koi ci gui. Ngami naw na ngawn khai gui ah k’tha nak ci gui, cun nak vai sü ung ka chuba cu k’pyei ne tah u sei, ani cu sik ci.

⁶ Ani ah pum cu la ban eta, at ne bou ne, Israel pakhui gha lei goi ung khui ät ung m’ta ät ci ka ning m’khäh gui nei. Shin ah chang gui naw mi ng’lung ah akshe bi ne cheishoh u ne, pletdeng ci gui nei.

⁷ Shin ung nami van cu Israel ah nami kyak ci. Shin ah mawng ung mikmi naw a i mi bik khai ang? cik ci gui.

⁸ Chang gui ami van a täng ah ng’düi law u neta, “Mikmi ung ka phung ung om ci phi, im ung om phi, a u a imah kä hteit ba khai nei.

⁹ Shin cu mikmi ah bi vai ah kyak ci: mikmi naw htung ng’zuk ne, chang ghü ne Kibeah cu mi tuk khai.

¹⁰ Israel chang bumgha bum ät naw ei vai phui khai, cun kawn ungka naw Kibeah cu am kyut vai, cun cu Israel khaw ung pletdeng ne katnak ami bi ah phäh ah kyak ci” cik ci gui.

¹¹ Cun ah kyasei Israel chang gui ng’bü nak tumat ah ng’bum u ne, gawnu tuk vai pawng ci gui.

¹² Israel pakhui gui naw Benjamin pakhui ah khawpäng avan ung chang tüi ne thu ami pyen cu, Nangmi naw nami katnak ah cheishoh ah mawng cu a i ang?

¹³ Tuhbäi, Kilead ung katnak bik ci gui cu na ap gui vä, cun ung keimi naw ngawn gui u ne, Israel ung ka shin ah akshe cu kami heng khai nei” cik ci gui. Cun ung phi Benjamin chang gui naw a hei Israel gui cu a i ah kä sui gui ci gui.

¹⁴ Benjamin khaw mang gaw avan ung ka gui cu Kileah ah law u ne, a hei Israel chang gui cu tuk gui vai ah pawng ci gui.

^15-16 Ngami naw cun hnüüp ung ami mang gaw gui ung ka gakap phia, phia m’ku lei chuk khü ci gui. Cun ung ka, Kileah mang gaw chang, ak eng ah ng’hlawi ci bang phia chih cu ghü ne k’bum ci gui. Ngami ak chang sing cu yaili awn lumu ma ät phi kä ng’chei khai ah kap hning ci gui ah kya ci.

¹⁷ A hei Israel pakhui gui naw gakap 400, 000 m’thei gui ci gui.

Benjamin gui ami tuk ah mawng

¹⁸ Israel gui cu Bethela ah khawihnah nak ah hmun ung htet u neta, Khanpughi cu ng’shik ci gui, “A i pakhui naw Benjamin gui cu a tuk ma vai ang?” Bawipa naw, “Judah pakhui” cik ci.

¹⁹ Cun ah kyasei Israel gui cu a ngawi ung khaw ngawi tün ge ne Kileah mang gaw pei ah pung tuk ci gui.

²⁰ Ngami cu Benjamin gakap tuk vai ah hteit u ne, mang gaw hmai na ne gakap tha ci gui.

²¹ Benjamin gakap gui cu mang gaw ung ka lut law u ne, hnüüp kä ng’pyi pha sei, Israel gakap phia, phia m’ku lei goi ngawn ci gui.

^22-23 Israel gui cu khawihnah nak ah hmun ah hteit u ne, Bawipa ah ma ah mühun güt kyap ci gui. Ngami naw ng’shi ba u ne, “Keimi kami nau Benjamin tuk vai ah ng’tuk nak ah kami hteh ba mä vai ang?” cine ng’shik ci gui. Bawipa naw, “Ä” cik ci. Cun ah kiasei Israel gakap gui cu k’thagui la ba u neta, azanta ah mäih ah ami gakap gui cu tha ba ci gui.

²⁴ Ngami naw ak hnih vei ank ah Benjamin gakap gui cu tu ba mä ci gui.

²⁵ Acun ah a hnih vei nak ung Benjamin gui cu Kileah ung ka lut law u neta, Israel gakap phia phia gha lei cheit ngawn ci gui.

²⁶ Cun ung Israel chang gui ami van Bethela ah hang kai u ne kyap ci gui. Ngami cu a cu ah Bawipa ah ma ah ngaw u neta mühun güt ung ei kä ei ci gui. Ngami naw hmuhchum douthak nak cu douthak u ne, khawihnah nak along ah m’khih u ne, cun gui avan cu Bawipa ah ma ah bik ci gui.

^27-28 Cun ah ung Khanpughi ah Thukhän M’küm cu Bethela ung om ci. Aaron ah tu, Eleazar ah hta Phinehas cu acun ngäng m’htei ciah kyak ci. Chang gui naw Bawipa ng’shi ba u ne, kami nau Benjamin gui cu kami tuk ba vai ang, käcung kami m’lung k’si vai ang?” cik ci gui. Bawipa naw, “Tu gui vä. Ngami ung kei naw ngami ah khan ah näng nak ka ning pe gui khai nei” cik ci.

²⁹ Cun ah kyasei Israel gui naw ami gakap gui cu Kibeah veing ne ng’thuh sak gui ci gui.

³⁰ Cun kawn ah akthum vei nak ah Benjamin gakap cu tu law ba vai u neta, ayan ung ka ah mäih ah Kileah hmai nak khai ah ng’tuk nak vai ah hmun ung ami gakap gui cu tha ci gui.

³¹ Benjamin gui cu ngami tu gui khai gui ah lut law u khätah mang gaw awn ang shawng ah hteh püi gui ci gui. Kä cun pha ung ngami naw Bethela lam khaw ng’piä la Kibeah lam ung Israel amshah ngawn ci gui. Ngami naw Israel thum kip ngawn ci gui.

³² Benjaminit gui naw, “Keimi naw ngami cu a yanä ah mäih ah kami tu that ba gui ci nei” cik ci gui. Cun ung phi Israel gui naw lam ung k’däk ne, mang gaw awn ng’shawng khai ah hteh püi gui vai ah k’bäi ci gui.

³³ Cun ah kyasei Israel gakap aktung gui cu hnu ng’säih u ne, Baaltama ung bum ba ukhäta, Kileah koi ciah chang gui cu, mang gaw ng’veing lung song gui, ami ng’thuh nak ung ka, ang ghit ah ng’phäi lawk ci gui.

³⁴ Israel avan ung ka ami ghü ah chang phya gha naw Kibeah cu tuk ci gui, ami ng’tuk cu nui ci. Benjaminit gui naw ami m’di law gui vai cu kä hmat ci gui.

³⁵ Bawipa naw Israel gui am Benjamin gakap näng nak vai pe gui ci. Israel gui naw cu hnüüp ung ami ga 25, 100 ngawn ci gui,

³⁶ Cun ung Benjamin gui naw ami shung cu hmat lawk ci gui. Israel gakap aktung cu Benjaminit gui ung ka hnu ng’säih ci gui, a i ah kyasei ci ung ngami naw Kibeah veing ne ami thuh gui cu ngaih u ci gui.

Israel gui Ami Näng ah Mawng

³⁷ Cun ah chang gui cu ang ghit ah Kibeah ah dawng ne, mang gaw kyong ah püi u ne, chang päng ngawn ci gui.

³⁸ Israel gakap aktung la ng’thup ci gui naw m’hnütnak tumat tha ci gui. Ngami naw gawnu ung ka meikhu nu gui thawk law sei ami hmun ah a kyak ung,

³⁹ akpung ah ng’tuk nak ung om ciah Israel gui cu ng’hlat law ba khai gui. Cun sang ung Benjamin gui naw Israel thum kip ngawn pyi ci gui. Ngami ami mät ng’hta u ne, “Ä, a yanä ah mäih ah tuhbäi phi mi tu thak ba gui ci nei” cik ci gui.

⁴⁰ Cun kawn ah ami m’hnüt nak cu dang lawk ci; meikhu ng’mei nu gawnu ung ka tün ne khu lawk ci. Benjaminit gui cu ami hnu täng ah va mang ba u ne, mang gaw avan mei ah däi sei hmu u neta cäicat ci gui.

⁴¹ Israel gui cu ng’hlat law ba ci gui, cun ung Benjamin gui cu, ngami m’di law gui khai gui ah hmat u neta cäicat ci gui.

⁴² Ngami cu Israel gui ung ka, khaw ng’pyä täng ah dawng ci gui, cun ung phi kä phiawng hlawt ci gui. Ngami cu gakaptung la mang gaw ung ka lut law ba ci gui ah ng’lak ung pha ne, m’di gui ci gui.

⁴³ Israel gui naw ga gui cu khaai gui u neta, kä ng’düm phung ne Kibeah akiang ung khüt ne gawt täm gui ci gui, ami m’hni ah ngawn gui ci gui.

⁴⁴ Benjamin gakap aknipi phya phya gha lei cheit ngawn ci gui.

⁴⁵ Amshah gui cu ng’hlat ne, khaw ng’piä ung dawng ne Rimmon lung song ah gawk ci gui phia hma cu lam pei ung ah ami ngawn gui. Israel gui naw k’pawih ba ci gui cu Kidom güt ung k’täm gui u ne, phia m’ku ngawn ba gui ci gui.

⁴⁶ Acu hnüüp Benjaminit phya, phya m’ku lei hma cu ngawn gui ci gui, ami van cu m’gäi ciah gakap ah kyak ci.

⁴⁷ Cun ung phi chang phia chuk cu phiawng u ne Rimmon Lung song ah dawng ci gui, a cu ah cha phli om ci gui.

⁴⁸ Israel gui cu ng’hlat law ba u ne, pawih ba ciah Benjamin gui avan ngawn ci gui, pami gui, hnumi gui la ak hmaw gui ni, seima gui ni avan ngawn ci gui. Gawnu gui avan phi mei awn m’khih ci gui.